Вы тут

«Я ўлюбілася ў вашу краіну!»


Удзельніцы конкурсу «Mіss Suрrаnаtіоnаl 2013» у Беларусі гладзілі зубра, вучылі народныя танцы, выходзілі на лёд і дарылі кнігі Нацыянальнай бібліятэцы

За мінулыя тыдні дзяўчаты з 85 краін свету — гэта канчатковая колькасць сёлетніх канкурсантак — аб'ехалі ці не палову нашай краіны з экскурсіямі. Сафійскі сабор у Полацку і Брэсцкая крэпасць, палацы ў Лідзе і Нясвіжы, Белавежская пушча і аквапарк у Гродне, прадпрыемства БелАЗ і страусавая ферма — ва ўсіх гэтых месцах пабывалі прыгажуні, якія не ўтойвалі свайго захаплення ад убачанага.

Высокія і прыгожыя

Але такая насычаная праграма не перашкодзіла ўдзельніцам «Mіss Suрrаnаtіоnаl 2013» займацца галоўнай справай — падрыхтоўкай да фінальнага шоу, на якім і будзе абрана каралева прыгажосці. Пад'ём а сёмай раніцы, штодзённыя фотасесіі, дэфіле і рэпетыцыі з харэографамі — такі расклад чакае маленькую армію прыгажосці ажно да 6 верасня. «Заняткі настолькі шчыльна распісаны, што Мінск мы бачылі пераважна з акна аўтобуса», — крыху расчаравана ўздыхаюць дзяўчаты.

Зрэшты, некалькі аб'ектаў беларускай сталіцы ўдзельніцы ўбачылі і зблізку, і знутры. У Лядовым палацы дзяўчаты паглядзелі хакейны матч з удзелам каманды «Юнацтва-Мінск», а лёд «Мінск-Арэны» выпрабавалі і самі — безумоўна, з дапамогай хакеістаў.

Днямі ж каля паўсотні канкурсантак зазірнула ў Нацыянальную бібліятэку Беларусі. І не проста на экскурсію, а з важнай місіяй — перадаць у падарунак кнігі і фотаальбомы аб сваіх краінах.

1378333716939_1

«Нашу бібліятэку штодня наведваюць тысячы чытачоў, часта прыязджаюць замежнікі, афіцыйныя дэлегацыі, у тым ліку і кіраўнікі іншых краін. Але настолькі прыгожыя і высокія госці зазірнулі да нас упершыню. І, шчыра прызнацца, нягледзячы на ранейшае дэканства на «дзявочым» факультэце бібліятэчна-інфармацыйных сістэм і працу ў жаночым калектыве, ад сустрэчы з такой колькасцю прыгажунь я крыху разгубіўся», — прызнаўся дырэктар установы Раман Матульскі. Затое цяпер, паводле яго слоў, ён гатовы здаваць геаграфію экстэрнам і не пераблытае на карце свету ніводную краіну, якую прадстаўляе кожная з дзяўчат. Тым больш, што і самі ўдзельніцы падрыхтаваліся да візіту ў храм ведаў як след: акрамя кніг пра гісторыю, культуру і традыцыі сваёй краіны, некаторыя з іх прывезлі геаграфічныя карты (як прадстаўніца Нігерыі) або міні-сцягі (як канкурсантка з Тога). Прыгажуня з Латвіі падарыла невялічкую кнігу «Пашпарт Латвіі», якая імітуе вонкава афіцыйны дакумент, але насамрэч распавядае пра гісторыю станаўлення гэтай дзяржавы. Дзяўчаты з Польшчы, Індыі, Турцыі, Італіі, наадварот, прывезлі вялізныя фаліянты з мноствам фотаздымкаў.

Яйкі страусаў,альбомы і «магніцікі»…

Падчас невялікага перапынку дзяўчаты падзяліліся ўражаннямі ад падарожжа па краіне, расказалі, што ім найбольш запомнілася ў Беларусі і што, акрамя яскравых успамінаў, яны павязуць з сабой дадому. «За той адносна невялікі прамежак часу, што мы тут знаходзімся, я ўлюбілася ў вашу краіну, у вашы нацыянальныя стравы, у тую прыязнасць, шчырасць і спакой, які адчуваецца ў людзях», — адзначыла Метцы Салана з рэспублікі Эль-Сальвадор.

1378333719583_2

Мексіканцы Жаклін Маралес вельмі спадабалася наладжанае днямі катанне на каньках. «Але я пастаянна баялася ўпасці. Праўда, мне пашанцавала, і сутыкнення з лёдам не адбылося. Больш за тое, я навучылася нават вельмі прыстойна катацца для першага ў жыцці выхаду на лёд. А калі нам дазволілі самім крыху пагуляць у хакей — было проста выдатна!»

Прыгажуня са Шры-Ланкі падышла да выбару сімвалічнага падарунка бібліятэцы ўдумліва. Прывезеная ёю кніга, па-першае, распавядае пра адметны светапогляд і асноўную рэлігію яе краіны — будызм (25-гадовая Гаеша Перэра і сама глыбока рэлігійны чалавек), а па-другое, напісана яна на сінгальскай мове (адна з асноўных моў Шры-Ланкі, на якой размаўляе каля 13 мільёнаў насельніцтва. — Аўт.). «Нядаўна прэзідэнт Шры-Ланкі наведваў Беларусь з візітам, сустракаўся з вашым Прэзідэнтам, быў падпісаны шэраг пагадненняў аб супрацоўніцтве. Я ўсцешаная, што сувязі паміж нашымі краінамі ўмацоўваюцца, і спадзяюся, што праз нейкі час у Беларусі будуць вывучаць культуру і мову Шры-Ланкі», — загадкава ўсміхнулася дзяўчына, прыемна ўразіўшы сваёй дасведчанасцю ў пытаннях не толькі культурных, але і палітычных. Зрэшты, гэта і не дзіўна: на радзіме Гаеша працуе актрысай і тэлевядучай, мае вялікую папулярнасць (толькі ў сябрах на «Фэйсбуку» яе падтрымліваюць звыш 27 тысяч прыхільнікаў) і свой удзел у конкурсе разглядае як пэўную місію па збліжэнні розных культур.

— Не магу сказаць, каб беларускі клімат стаў для мяне выпрабаваннем. На першы погляд, адрозненне паміж намі толькі ў адсутнасці мора і пляжаў, — падзялілася Гаеша, для якой сёлетні конкурс прыгажосці далёка не першы ў жыцці. — Спадабалася ваша кухня, зацікавілі народныя традыцыі — да беларускай культуры ў ланкійцаў апошнім часам вялікая цікавасць, у тым ліку і дзякуючы конкурсу прыгажосці. Уражанняў ад краіны наогул вельмі шмат: з кожнага дня нашых паездак я выкладваю ў сацыяльныя сеткі дзясяткі фота, каб маімі вачыма людзі Шры-Ланкі маглі больш уважліва паглядзець на Беларусь. Што павязу з сабой дадому? Вось набыла некалькі яек страусаў на ферме, альбомы і, натуральна, «магніцікі» з краявідамі ў падарунак сям'і і сябрам! (Смяецца.)

Канкурсантка з Венесуэлы Ані Фуэнмаёр з лацінаамерыканскім імпэтам прызналася, што найярчэйшым уражаннем апошняга тыдня для яе стала наведванне хакейнага матча і магчымасць самой выйсці на лёд:

1378333722468_3

— У дзяцінстве я каталася на каньках, але з таго часу мінула вельмі шмат гадоў і я ўсё забылася. І калі арганізатары шоу сказалі нам, што можна будзе патрэніравацца з дапамогай прафесійных хакеістаў, я прыйшла ў захапленне. Нас нават крыху павучылі гуляць у хакей. Гэта было незабыўна, тым больш у кампаніі такіх моцных і гожых хлопцаў! Асобна хочацца адзначыць хакейны матч — у Венесуэле няма магчымасці бачыць гульні жыўцом, толькі па тэлевізары, а гэта ж зусім іншая атмасфера і эмоцыі…
Дадому Ані павязе самыя цёплыя ўспаміны ў сэрцы і вельмі шмат беларускіх сувеніраў у чамаданах, у тым ліку некалькі прыгожых чарак для калекцыі сваёй матулі і вырабы з саломкі. «Мне вельмі падабаецца Беларусь. Кожны рэгіён, дзе мы пабывалі, адметны па-свойму, непаўторны, і, можа быць, я тут застануся… Але гэта толькі пасля шоу, а пакуль вельмі чакаю свайго тату, які прыедзе на фінал падтрымаць мяне».

— Дзяўчына з Панамы хоча прыехаць у Беларусь яшчэ раз, са сваімі бацькамі, і прасіла мяне, па магчымасці, правесці экскурсію па тых жа мясцінах, дзе мы пабывалі падчас паездкі, каб бліжэй пазнаёміць бацькоў з беларускай культурай і менталітэтам. Бо, кажа, проста словамі ўражанні ад нашай краіны не перадаць, — смяецца перакладчыца Дар'я.

Хто выбірае, як выбіраюць

Да фіналу конкурсу «Mіss Suрrаnаtіоnаl 2013» і, адпаведна, выбару самай прыгожай, абаяльнай і прывабнай з 85 удзельніц засталіся лічаныя дні. Але некалькі «прамежкавых» тытулаў ужо раздадзена. Так, у конкурсе талентаў перамагла прадстаўніца Малайзіі Нэнсі Маркус, якая выканала танцавальнае папуры на сусветна вядомыя хіты. А па выніках шматлікіх фотасесій і дэфіле журы вызначыла пераможцаў у намінацыях «Міс Элегантнасць» (ёй стала прадстаўніца Швецыі Салі Ліндгрэн), «Міс Індывідуальнасць» (Муція Датул з Філіпінаў), «Міс Топ-Мадэль» (Валерыя Дону з Малдовы) і «Міс Фотагенічнасць» (Дэзірэ Дэль Рыа з Пуэрта-Рыка).

Увогуле, суддзяў і гледачоў чакае нялёгкі выбар. Каманда АНТ, якая працуе з канкурсанткамі практычна кругласутачна, адзначае матываванасць, прафесійны падыход і адказнасць удзельніц: многія не навічкі ў мадэльным свеце, таму гатовы бясконца шліфаваць лёгкую паходку і дабівацца натуральных усмешак.

1378333725314_4

Пасля скандальнага конкурсу «Міс Мінск» у многіх узнікала пытанне, хто і як правярае ўдзельніц падобных конкурсаў на, скажам так, адпаведнасць не толькі мадэльным, але і маральным стандартам у паўсядзённым жыцці. «Пры выбары нашай удзельніцы «Mіss Suрrаnаtіоnаl» мы на 100% адказна падыходзілі да гэтага пытання, — рэжысёр-пастаноўшчык фінальнага шоу, кіраўнік дырэкцыі спецпраектаў тэлеканала АНТ Анжэліна Мікульская падобным пытанням ужо не здзіўляецца. — У век інтэрнэту мала што можна ўтаіць — кожны як на далоні, да таго ж дае плён роспыт аднакурснікаў ці аднакласнікаў, суседзяў… Выбіраць было з каго, але Вераніка аказалася ў любым сэнсе лепшай. За ўсіх астатніх канкурсантак адказваюць аргкамітэты конкурсу ў іх краінах, а падчас знаходжання ў Беларусі, па-першае, дзяўчат паўсюдна суправаджае ахова, а па-другое, у іх проста няма часу на глупствы».

— Абсалютна ўсе ўдзельніцы разумеюць значнасць гэтага конкурсу і сваю адказнасць, — дадае РR-менеджар праекта Юлія Віскуб. — І хоць усе яны хвалююцца, але выкладваюцца па поўнай праграме. Нават тыя, хто ў нашым клімаце, памножаным на стомленасць, крыху прыхварэў, на фінальнае шоу выйдуць у найлепшым настроі і з усмешкай, вось убачыце!

Пераканацца ў гэтым можна будзе ўжо зусім хутка: 6 верасня ў Палацы спорту пройдзе фінал конкурсу «Mіss Suрrаnаtіоnаl 2013». Над пастаноўкай шоу працуе вялізная каманда рэжысёраў, стылістаў, харэографаў і фатографаў, а дапамагаюць беларускаму боку афіцыйныя прадстаўнікі конкурсу з Міжнароднай асацыяцыі прыгажосці (Польшча). Тэлеверсія фінальнай імпрэзы будзе паказана ў 100 краінах свету. А квіткоў на «жывое» шоу, дарэчы, у мінскіх касах засталося вельмі мала.

Вікторыя ЦЕЛЯШУК

Выбар рэдакцыі

Грамадства

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Палацы, паркi, сядзiбы. На Брэстчыне вядзецца вялiкая работа па аднаўленнi гiсторыка-культурных аб'ектаў

Адным з першых у вобласцi пачалi рэстаўрыраваць велiчны палац Сапег у Ружанах.

Грамадства

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Шопiнг з дапоўненай рэальнасцю. Тэхналогii 3D-мадэлявання адкрыюць новы фармат гандлю

Наша краiна займае трэцяе месца ў сваiм рэгiёне па колькасцi бескантактавых транзакцый.

Грамадства

Неспадзяваныя падарожжы. Як не згубiцца ў лесе?

Неспадзяваныя падарожжы. Як не згубiцца ў лесе?

Цёплае i вiльготнае надвор'е, якое вось ужо чацвёрты тыдзень з невялiкiмi перапынкамi пануе ў Беларусi, штурхае да таго, каб пайсцi ў лес.