Экалагічнае свята: тры ў адным

Полацкі раён сустрэне ўдзельнікаў і гасцей прысвечаных экалогіі мерапрыемстваў. Цэнтрам раённай імпрэзы «Экафэст-2013» стане дзіцячы аздараўленчы летнік «Чайка». Менавіта там, паблізу Казімірава, 14 верасня правядуць грыбны чэмпіянат, фестываль «Ад экалогіі
прыроды да экалогіі душы», а таксама свята «Гасцюем у полацкага Лесуна».

«Экафэст-2013» дапоўніць музычная шоу-праграма з непасрэдным удзелам артыстаў тэатра гумару і эстрадных мініяцюр «Полацкі жарт».

Грыбны чэмпіянат

За грыбныя трафеі будуць змагацца больш як 120 камандаў.

Сярод удзельнікаў супрацоўнікі прамысловых прадпрыемстваў, сельсаветаў, прадпрыемстваў энергетыкі і сувязі, будаўніцтва і дарожнай гаспадаркі, гандлю, бытавога абслугоўвання, адукацыйных устаноў і грамадскіх аб'яднанняў.

Паколькі прафесійнае журы будзе ўлічваць не толькі колькасць і якасць грыбных трафеяў, але і фотамайстэрства, у склад кожнай каманды залічаць некалькі фатографаў-аматараў.

Акцэнт у спаборніцтве зробяць менавіта на фотаконкурсе «Грыбнымі сцежкамі», які наглядна ўвасобіць «ціхае паляванне».

Ад экалогіі прыроды да экалогіі душы

Гэты фестываль парадуе модным паказам адзення з другаснай сыравіны, музычнымі выступленнямі экалагічных агітбрыгад, цырымоніяй папаўнення радоў маладых эколагаў, а таксама конкурсамі і шматлікімі гульнямі. Актыўнымі ўдзельнікамі стануць больш як 150 школьнікаў Полацкага раёна.

Арганізатары плануюць свабодны мікрафон «Прабач, прырода», выставу бульбы і дэгустацыю бульбяных страў.

На майстар-класах гасцей навучаць плесці з лазы і саломкі, рабіць сувеніры з прыродных матэрыялаў. Уразіць і флешмоб «Мы адказваем за нашу планету». На чарзе — выставы кветкаводаў-дызайнераў, аранжыроўшчыкаў. Кожны атрымае эстэтычнае задавальненне ад пано, карцін, калажоў, аб'ёмных кампазіцый і дываноў выключна з прыродных матэрыялаў. Госці ацэняць выставу «Дары восені» і прыгажосць хатніх улюбёнцаў. Бяздомным жывёлам дапаможа адпаведная акцыя.

Гасцюем у полацкага Лесуна

Забаўляльная праграма «Лясныя прыгоды ў хатцы Лесуна» пакіне дзяцей у захапленні.

Арганізуюцца і чатыры дворыкі з выстаўкамі-дэгустацыямі.

Удзельнікі прэзентуюць візітоўкі, а таксама буклеты рэцэптаў прыгатаваных беларускіх страў: юшкі, грыбнога супу, мёду па-дрэтунску, шашлыку, пірага з брусніцамі, гарбаты, морсу і не толькі.

Маргарыта СІДАР.