Вы тут

Захавальнік беларускага Паазер'я


Курс верталёта «МІ-2», на борце якога вялікімі літарамі выведзена «Беллесавія», пачынаецца з пляцоўкі колішняга аэрапорта пад Полацкам. Спачатку вінтакрылая машына ляціць уздоўж сіняй стужкі Дзвіны да вёскі Гараны, робіць разварот на 90 градусаў і трымае курс на Расоншчыну, Верхнядзвінск, Мёры... На гэтым паўночным кірунку пад фюзеляжам машыны зноў вымалёўваецца выразны сілуэт Дзвіны, заціснутай высокімі ляснымі берагамі, з залатымі плёсамі і доўгімі астравамі пасярэдзіне. У душы пілота-назіральніка Уладзіміра Пірага — прыемнае хваляванне: ён дакладна ведае, што праз некалькі хвілін на левым дзвінскім беразе з'явяцца абрысы невялікіх вёсак Панізава, Алішанцы, Бражнікі. Неўзабаве ўбачыць і сваю родную вёску Пераслоўку. Бераг яго дзяцінства!

Не адну сотню разоў Уладзімір пралятае над сваёй маленькай радзімай, але пачуцці ад убачанага ў ім ніколькі не паменшыліся, нікуды не зніклі. Можа, і дзіўна гэта. Дзіўна таму, што раней ніколі не думаў, што выбера менавіта паветраную ахову лясоў, што будзе амаль штодня разглядаць бацькоўскі дом з блакітных вышынь. Ведае, што гэтак атрымалася па волі добрага лёсу і што яму ў гэтым, несумненна, пашанцавала.

1379108352494_1

Ён вырас на беразе Дзвіны і назаўсёды палюбіў край дзівоснай прыроды. Але пра тое, што стане паветраным ахоўнікам лесу, і тым больш усяго Паазер'я, Уладзімір нават не марыў.

Пасля школы Уладзімір спрабаваў паступіць у ваенную акадэмію, але не хапіла балаў. Каб не губляць час, пайшоў у Друйскае СПТВ, набыў прафесію механізатара меліярацыйных работ, паспеў папрацаваць у калгасе на трактары. Тэрміновую службу нёс у паветрана-дэсантных войсках. Пасля арміі аднёс дакументы ў лясны тэхнікум...

Дзіўнымі шляхамі вядзе лёс чалавека, каб у рэшце рэшт вывесці да сапраўдных вышынь у прафесіі! Прафесія лётчыка-назіральніка — адна з самых рэдкіх у нашай краіне, складаных і адказных. Але менавіта ў ёй хлопец з Мёршчыны знайшоў сваё сапраўднае прызванне.

Дзясяты паветраны сезон сёлета на службовым рахунку Уладзіміра Пірага — аднаго з назіральнікаў авіяцыйнай аховы лясоў, якую ў Беларусі выконвае ўнітарнае прадпрыемства «Беллесавія». Больш за 1200 гадзін, праведзеных у паветры, зрабілі яго высакакласным спецыялістам у справе захавання нашай прыроды, яе дзівоснай прыгажосці і незлічоных багаццяў.

1379108354179_2

З надыходам кожнага пажаранебяспечнага сезона, які звычайна пачынаецца з сярэдзіны красавіка і доўжыцца да пачатку кастрычніцкіх прымаразкаў, Уладзімір Пірог вядзе пільны кантроль за адной з самых запаведных тэрыторый нашай краіны — беларускім Паазер'ем. Вось і сёлета адна з галоўных задач пілота — пошук і выяўленне лясных узгаранняў, вызначэнне каардынат вогненнай небяспекі і своечасовае паведамленне пра гэтыя «знаходкі» наземным службам лясной аховы. Здзяйсняючы чарговы палёт па загадзя вызначаным маршруце, з ілюмінатара верталёта «МІ-2», альбо нястомнага паветранага працаўніка «АН-2» пілот узіраецца ў бяскрайні далягляд, каб заўважыць нават маленькі струменьчык дыму і імкліва даімчацца да гэтай крыніцы небяспекі. Калі доўга пануе сухое і гарачае надвор'е, працаваць даводзіцца з падвойнай, а то і з патройнай энергіяй, здзяйсняць за дзень нават па два аблёты ахоўнай тэрыторыі. У спёку ўзрастаюць нагрузкі не толькі на працу рухавікоў паветраных бартоў, але таксама і на фізічны стан пілотаў. Нездарма працу паветранага назіральніка ставяць у адзін шэраг з прафесіяй лётчыкаў-штурманаў грамадзянскай авіяцыі. І дарога ў гэтыя прафесіі адкрываецца толькі моцным, дужым, вынослівым.

1379108357740_3

«Паветраная дзесяцігодка» не толькі выпрабавала Уладзіміра Пірага на фізічныя здольнасці як пілота, але вывела яго ў лік лепшых спецыялістаў «Беллесавіі», якім даверана кіраваць цэлым падраздзяленнем. З 2007 года Уладзімір адначасова з'яўляецца і начальнікам Полацкага авіяаддзялення. На яго адказнасці як кіраўніка стан узлётнай паласы і верталётнай пляцоўкі, будынка базы для працы і адпачынку пілотнага складу, навучання пажарных-дэсантнікаў. У гэтым аддзяленні ў якасці дэсантніка-пажарнага. Пірог і сам пачынаў працу ў «Беллесавіі».

— Калі вучыўся ў Полацкім лясным тэхнікуме, у час летніх канікул працаваў у пажарна-дэсантнай групе. Дапамагала армейская падрыхтоўка ў паветрана-дэсантных войсках. Цікава было паспрабаваць сябе на ўтаймаванні вогненнай стыхіі, — кажа Уладзімір Пірог. — Два гады лятаў на лясныя ўзгаранні. Пры размеркаванні з тэхнікума атрымаў прапанову ў гэтае авіяаддзяленне на пасаду інструктара-дэсантніка.

1379108359921_4

Летам 2003-га Уладзіміру прапанавалі лётныя курсы ў Маскоўскай вобласці. Тагачасны кіраўнік «Беллесавіі» Аляксей Пшонка разгледзеў у маладым дэсантніку будучага добрага спецыяліста паветранай аховы, адказнага і прынцыповага работніка. Паспяхова скончыўшы курсы, Уладзімір працаваў у розных аддзяленнях — у Гомелі, Пінску, Мазыры. Тры вяснова-асеннія сезоны правёў у камандзіроўках, лятаў амаль над усёй Беларуссю. Мог спыніцца на сталае жыццё ў любым з гэтых гарадоў, але нечакана з'явілася пасада ў Полацку, і тэрыторыяй яго прафесійнай увагі стала беларускае Паазер'е.

Калі ўглядзецца ў карту маршрутаў полацкага авіяпатруля, няцяжка заўважыць на ёй тэрыторыі, якія асабліва ахоўваюцца: заказнікі «Ельня», «Асвейскі», «Чырвоны Бор», «Казьянскі», «Вялікае астравіта», «Лонна», «Фаміно», «Сіньша», нацыянальны парк «Браслаўскія азёры», балоты «Мох», і «Лебядзіны мох». Ахоўная тэрыторыя полацкага авіяаддзялення складае без малога 808 тысяч гектараў. За дзесяцігоддзе палётаў над гэтай тэрыторыяй на ёй не ўзнікала сур'ёзных узгаранняў, якія нанеслі б непапраўную шкоду прыродзе.

— Галоўнае ў нашай працы — — своечасова апынуцца ў месцы небяспекі. Без дапамогі авіяцыі гэта было б немагчыма, — кажа Уладзімір Пірог, пакідаючы гарачы салон напрацаванага за доўгі палёт верталёта.

Анатоль КЛЯШЧУК. Фота аўтара. Полацкі раён.

Выбар рэдакцыі

Грамадства

Не трапіць у рабства анлайн. Як у краіне змагаюцца з гандлем людзьмі

Не трапіць у рабства анлайн. Як у краіне змагаюцца з гандлем людзьмі

З 2000 года ў Беларусі выяўлена 4421 злачынства, звязанае з гандлем людзьмі.

Эканоміка

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Дзесяць пытанняў пра крэдыты, або Што трэба ведаць аб крэдыце, каб ён стаў сродкам рэалізацыі мэт, а не цяжарам на плячах

Пра што абавязкова трэба падумаць перад тым, як браць на сябе фінансавыя абавязацельствы перад банкам?

Спорт

Замена Алімпіядзе. Беларуская лёгкаатлетычная

Замена Алімпіядзе. Беларуская лёгкаатлетычная

Беларуская федэрацыя лёгкай атлетыкі зладзіла свае гульні.