Вы тут

Біржа як аснова рынку


Мы шмат разважалі ўжо з вамі аб акцыях, аблігацыях, валютах. Вызначалі, што з імі можна і трэба рабіць і як карыстацца. Аднак ёсць арганізацыя, без якой усё вышэйназванае не будзе мець ніякага сэнсу і карысці. Таму сёння разгледзім, што такое фондавая біржа.

Агульнае паняцце

Фондавая біржа — гэта аснова рынку каштоўных папер, установа, дзе ажыццяўляецца іх купля і продаж біржавымі пасярэднікамі (брокерамі, маклерамі). Можна сказаць, што гэта спецыяльна арганізаваны аўкцыён (іншымі словамі, продаж з публічных таргоў), пры якім каштоўныя паперы набываюцца асобай, што прапанавала найбольшую цану. Дзейнасць біржы накіравана на забеспячэнне неабходных умоў нармальнага абарачэння каштоўных папер, вызначэнне іх рынкавых коштаў і распаўсюджанне інфармацыі пра іх, падтрыманне высокага ўзроўню прафесіяналізму ўдзельнікаў рынку каштоўных папер.

Задачы фондавай біржы звычайна заключаюцца ў наступным: прадастаўленне цэнтралізаванага месца, дзе можа адбывацца як продаж каштоўных папер іх першым уладальнікам, так і другасны іх перапродаж; выяўленне раўнаважнай біржавой цаны; акумуляванне часова свабодных грашовых сродкаў і спрыянне перадачы права ўласнасці; забеспячэнне галоснасці, адкрытасці біржавых таргоў; забеспячэнне арбітражу (некалькі лагічна звязаных здзелак, накіраваных на атрыманне прыбытку з розніцы ў цэнах на аднолькавыя або звязаныя актывы ў адзін і той жа час на розных рынках (прасторавы арбітраж) альбо на адным і тым жа рынку ў розныя моманты часу (часавы арбітраж, звычайная біржавая спекуляцыя)); забеспячэнне гарантый выканання здзелак, заключаных у біржавой зале; распрацоўка этычных стандартаў, кодэкса паводзін удзельнікаў біржавога гандлю.

«Гандлёвая пляцоўка» Беларусі

У нашай краіне функцыі фондавай выконвае Беларуская валютна-фондавая біржа. Яна з'яўляецца гандлёвай пляцоўкай, якая абслугоўвае тры асноўныя сегменты арганізаванага фінансавага рынку Беларусі (валютны, фондавы і тэрміновы рынак), ажыццяўляючы наступныя віды дзейнасці: арганізацыя таргоў; клірынгавая (клірынг — безнаяўныя разлікі паміж краінамі, кампаніямі, прадпрыемствамі за пастаўленыя, прададзеныя адзін аднаму тавары, каштоўныя паперы і аказаныя паслугі, якія ажыццяўляюцца шляхам узаемнага заліку, зыходзячы з умоў балансу плацяжоў) і дэпазітарная дзейнасць; дзейнасць па арганізацыі сістэмы электроннага дакументазвароту, а таксама аказанне інфармацыйных паслуг. Акрамя гэтага, біржа ажыццяўляе функцыі па падтрыманні індыкатыўных каціровак па актывах, якія абарачаюцца па-за гандлёвай пляцоўкай, і выступае цэнтральным рэгістратарам інфармацыі аб здзелках з каштоўнымі паперамі, здзейсненых на пазабіржавым рынку.

Асноўная мэта дзейнасці біржы — садзейнічанне фарміраванню ў рэспубліцы паўнавартаснага арганізаванага фінансавага рынку, які адпавядае патрэбам яго ўдзельнікаў, прадастаўляе дзяржаве эфектыўныя рынкавыя механізмы рэалізацыі грашова-крэдытнай і бюджэтнай палітыкі, выканання ім кантрольных і рэгулятарскіх функцый. А для таго, каб фінансавы рынак краіны стаў паўнавартасным, патрэбна «ўключэнне» ў яго як мага большай колькасці ўдзельнікаў. Нагадаю, што кожны чалавек можа стаць такім удзельнікам. Для гэтага, напрыклад, трэба мець пэўную колькасць каштоўных папер і жаданне на іх зарабіць.

* * *

Чакаем вашых пытанняў пра карыстанне грашыма і ўсё, што з гэтым звязана. Вы можаце звяртацца на электронны адрас газеты: іnfо@zvуаzdа.mіnsk.bу з пазнакай «для аддзела эканомікі» ці па тэлефоне 8 017 292 38 02.

Уладзіслаў КУЛЕЦКІ.

Дадаць каментар

Выбар рэдакцыі

Грамадства

Першае працоўнае месца: чым вабіць і чым палохае?

Першае працоўнае месца: чым вабіць і чым палохае?

Вясной у ВНУ традыцыйна пачынаецца размеркаванне.

Культура

Як жылі беларусы-сакуны на Старадарожчыне

Як жылі беларусы-сакуны на Старадарожчыне

Дом без падмурка, печ — на драўляным фундаменце.

Грамадства

Як «Звязда» пісала гісторыю (1946 — 1953)

Як «Звязда» пісала гісторыю (1946 — 1953)

Аднаўленне разбуранай у гады Вялікай Айчыннай вайны народнай гаспадаркі стала беспрэцэдэнтным подзвігам мірнага часу.

Грамадства

Як будзе развівацца беларуская фармацэўтыка

Як будзе развівацца беларуская фармацэўтыка

Залежнасць краіны ад імпарту павінна быць зніжана пры захаванні якасці і эфектыўнасці лекавых прэпаратаў.