Бюст Менахему Бегiну адкрылi ў абласным цэнтры
Сто гадоў таму ў Брэсце нарадзiўся Менахем Бегiн, якi потым стаў прэм'ер-мiнiстрам Iзраiля. Яго выдатныя заслугi як палiтыка i грамадскага дзеяча адзначаны Нобелеўскай прэмiяй мiру. Iдэя паставiць помнiк на радзiме Бегiна была агучана падчас вiзiту iзраiльскай дэлегацыi ў Брэст на самым пачатку гэтага года. Тады i была дасягнута дамоўленасць. У склад творчай групы, якая працавала над помнiкам, увайшлi лаўрэат Ленiнскай прэмii СССР архiтэктар Леанiд Левiн, брэсцкi скульптар Алеся Гуршчанкова, архiтэктар Канстанцiн Селiханаў, галоўны архiтэктар Брэста Алег Ляшук.
Некалькi дзён таму бюст устанавiлi ў скверы па вулiцы Куйбышава, недалёка ад будынка, у якiм была школа, дзе i вучыўся юны Менахем Бегiн. I ў апошнi дзень кастрычнiка гараджане i госцi сабралiся на ўрачыстае адкрыццё помнiка. Мэр Брэста Аляксандр Палышанкоў расказаў прысутным, што месца, на якiм стаяць усе ўдзельнiкi iмпрэзы, у пачатку вайны было адведзена пад гета. Тут знаходзiлася большая частка брастаўчан. Бо з 47 тысяч чалавек насельнiцтва даваеннага Брэста 34 тысячы складалi яўрэi. Абсалютная большасць насельнiкаў гета загiнула ў 1942 годзе. «Гэтую трагiчную старонку з жыцця горада мы заўсёды памятаем», — падкрэслiў старшыня гарвыканкама i адзначыў, што ў горадзе шануюць памяць усiх знакамiтых выхадцаў, у шэрагу якiх — i вядомы дзяржаўны дзеяч Iзраiля Менахем Бегiн.
Надзвычайны i Паўнамоцны Пасол Дзяржавы Iзраiль у Беларусi Iосiф Шагал зачытаў вiтальны зварот прэм'ер-мiнiстра Iзраiля Бiньямiна Нетаньяху да ўдзельнiкаў мiтынгу, а таксама нагадаў заслугi Менахема Бегiна ў справе ўсталявання мiру. У 1979 годзе Бегiн дабiўся мiрнага пагаднення памiж Iзраiлем i Егiптам, за што i быў удастоены Нобелеўскай прэмii мiру.
Напярэдаднi адкрыцця помнiка ў Брэсце адбылася прэзентацыя i ўрачыстае гашэнне блоку паштовых марак, прысвечаных нацыянальным лiдарам Iзраiля, выхадцам з Беларусi. А ўжо на наступны дзень маркi з партрэтамi Менахема Бегiна, Iцхака Шамiра, Хаiма Вейцмана, Шымона Пераса, Залмана Шазара прадавалiся ў паштовай краме.
Святлана ЯСКЕВIЧ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».