У палітычнай сумятні не павінны забываць пра народ

Няпростая сітуацыя ў суседняй Украіне прымушае задумацца над яе будучыняй. Аналітыкі называюць самыя розныя варыянты: ад будаўніцтва інтэграцыі з Расіяй да наступлення перыяду безуладдзя. Сваю думку наконт украінскай сітуацыі выказала «Звяздзе» Вольга ПАЛІТЫКА, член Пастаяннай камісіі Палаты прадстаўнікоў Нацыянальнага сходу Рэспублікі Беларусь па прамысловасці, паліўна-энергетычным комплексе, транспарце і сувязі.

— Выбар шляху развіцця, перад якім зараз стаіць Украіна, — гэта яе права як суверэннай дзяржавы, і ніхто не мае права тут ёй указваць. Падчас радыёмоста з Кіевам, тэма якога была звязана з дзяржаўным рэгуляваннем эканомікі, мы закраналі з украінскімі калегамі і сённяшнюю палітычную сітуацыю ў гэтай краіне.

Хацелася б верыць, што ўкраінская Рада, прэзідэнт і прадстаўнікі апазіцыі знойдуць агульныя падыходы, прыйдуць да аптымальнага рашэння. Будзе вельмі дрэнна, калі Украіна стане нейкай разменнай карткай у геапалітычнай барацьбе. Галоўнае, каб у гэтай сумятні не забылі пра народ. Зараз нават і гаворкі няма пра тое, як будзе жыць далей звычайны жыхар украінскага горада або вёскі, як будзе працаваць тая ці іншая галіна прамысловасці.

Тыя, хто прыйшоў на Майдан, — пераважна студэнты. Нехта ім заплаціў, каб яны прыехалі, арганізаваў палатачныя гарадкі — нават са звычайнага бытавога пункту гледжання гэта ўсё каштуе грошай. Мне не падабаецца, што Украіну ўцягваюць у нейкую буйную гульню, таму дэпутатам Вярхоўнай Рады гэтай краіны трэба памятаць пра тых, хто за іх галасаваў, пра тое, як будзе лепш яго выбаршчыкам.

Я не дам прагноз, якім будзе будучыня Украіны. Тым не менш, лічу, што для Украіны толькі ў рамках Мытнага саюза дзякуючы кааперацыі, якая склалася ў савецкія часы, ёсць магчымасць развіваць высокатэхналагічныя галіны прамысловасці: гэта і металургічная прамысловасць, і машынабудаванне, і прыборабудаванне. Я не магу назваць прыкладаў па тых краінах, якія адносна нядаўна ўступілі ў Еўрапейскі саюз, калі былі створаны найсучасныя прадпрыемствы на іх тэрыторыі. У лепшым выпадку гэта простая зборка. Таму не думаю, што, адарваўшыся ад Мытнага саюза, Украіна зможа развіваць такія галіны прамысловасці. Але, зноў жа, гэта належыць вызначаць толькі самім украінцам.

Надзея ЮШКЕВІЧ