Вы тут

«...Нехта пакурыў і паехаў у школу, а нехта — у рэанімацыю»


З'явіўшыся ў сярэдзіне 2000-х у многіх еўрапейскіх краінах пад выглядам духмянасцяў, спайс вельмі хутка займеў вялізную аўдыторыю прыхільнікаў. А ў 2008 годзе было ўстаноўлена, што асноўны дзеючы складнік толькі на першы погляд бяскрыўдных сумесяў для курэння — сінтэтычны канабіс. Фактычна, гэта штучна створаны аналаг аднаго з асноўных актыўных складнікаў прыроднага наркотыку — марыхуаны. Але негатыўнае ўздзеянне канабісу і яго вытворных на арганізм чалавека, па меркаванні многіх спецыялістаў, у некалькі разоў перавышае аналагічнае ўздзеянне марыхуаны. Псіхіятар-нарколаг Магілёўскага абласнога наркалагічнага дыспансера Наталля ДАМАРЭНКА кажа:

1386819819757_12-7

— Уплыў так званых «міксаў» на арганізм чалавека, безумоўна, негатыўны, але дакладна ўздзеянне вызначыць цяжка. Праблема ў тым, што кожны раз мы маем справу з нейкім новым рэчывам, а таму і клінічная карціна бывае самая розная. Трэба ўлічваць і індывідуальныя асаблівасці арганізма: нехта пакурыў і пайшоў у школу, а нехта — адразу трапіў у рэанімацыю, прычым апошніх выпадкаў хапае. Сумесі для курэння вельмі хутка выклікаюць моцную залежнасць, і без дапамогі спецыялістаў спыніць ужыванне бывае вельмі цяжка. Псіхічная залежнасць ад спайсу пры працяглым ужыванні часцей за ўсё выяўляецца ў дэпрэсіі, апатыі, страце інтарэсу да жыцця. Сярод самых горшых наступстваў — лятальны зыход, прычым для гэтага не абавязковая перадазіроўка.

Але спайс працягвае сваё шэсце па Еўропе. Галоўная яго перавага над іншымі сінтэтычнымі наркотыкамі — больш даступны кошт і галоўная «аўдыторыя» — падлеткі і маладыя людзі да 22 гадоў.

— Курыць так званыя «легальныя сумесі» я пачаў, калі прыехаў вучыцца ў Мінск, — расказвае Станіслаў, студэнт адной з мінскіх ВНУ. — Прычым гэта не было «першым досведам», як у многіх. Раней я ўжо спрабаваў наркотыкі, але спайс прываблівае сваім коштам і лёгкасцю ў набыцці. Спачатку толькі спрабаваў, але з мінулай восені пачаў ужываць яго стабільна хаця б раз на тыдзень.

— Але спайс забаронены і гандляваць ім нельга...

— Гэта ўсё ўмоўна. Як толькі забараняюць адзін з канабіноідаў, на яго месцы з'яўляюцца адна-дзве новыя мадыфікацыі. Пакуль адпаведныя органы займаюцца іх вывучэннем і забаронай, гандляры пастаўляюць нешта новае. І так пастаянна. Што датычыцца набыцця, то ўсё яшчэ прасцей — праз інтэрнэт.

Разглядваю названы Станіславам сайт. Пры першым візіце электронны рэсурс просіць пацвердзіць, што карыстальніку ўжо ёсць 18 гадоў і адразу ж перакладае ўсю адказнасць за магчымыя наступствы на кліента. Націскаем «пацвярджаю» і аказваемся ў свеце «дабрыні і вяселля» — на галоўнай старонцы змяняюць адзін аднаго фотаздымкі радасных «кліентаў». «Гарантыя якасці — 100%», «І галоўнае — усё легальна». Калі верыць сайту, уладальнікі шукаюць аптовых кліентаў па ўсёй Беларусі... Кошт для «аптавікоў» вельмі дэмакратычны — за кілаграм сумесі просяць усяго 1,5 тысячы долараў.

Гандляры спайсам пішуць: «Не верце чуткам, што сумесь для курэння — аналаг наркатычных рэчываў. Усе кампаненты нашых міксаў не з'яўляюцца наркотыкамі або таксінамі, не выклікаюць прывыкання і дазволены для выкарыстання на тэрыторыі Рэспублікі Беларусь».

— Нічога натуральнага там няма, — працягвае Станіслаў, — любы «мікс» — гэта аснова і рэагент. Аснову насычаюць рэагентам у рознай канцэнтрацыі. Эфект самы розны. «Дае ў галаву» — гэта галоўнае. Пры перадазіроўцы ў асноўным адключаешся, у некаторых выпадках могуць пачацца «візуалы» — галюцынацыі. Весела, дэзарыентацыя ў прасторы... Аднойчы сябар аднарога «ўбачыў», напужаў мяне.

— А ў чым тады задавальненне? Убачыць галюцынацыі?

— А навошта гарэлку піць? Каб знаходзіцца ў стане ап'янення? Так і тут. Пад «спайсам» весела. «Прыход» — гэта калі адчуваеш, што ты ўжо не ў гэтым свеце, думкі сабраць не можаш у адно цэлае, табе лёгка... Калі слухаць у гэты момант музыку, то ў яе з'яўляецца адразу шмат сэнсаў, хоць насамрэч і не так.

— Ты казаў, бываюць дрэнныя выпадкі...

— Ну, аднойчы перакурыў, адключыўся, пачаў дрыгацца, пена з роту пайшла. Напужаў усіх, але потым супакоіўся ды заснуў. Сам нічога не памятаю. Але сябры казалі, што гэта жудасна выглядала... Некаторых пачынае ванітаваць хвілін праз дзесяць. Знаёмы ўвогуле на мяне з напільнікам кідаўся. Пра гэта зараз лёгка казаць, а тады было сапраўды страшна.

— Як ты сам лічыш, спайсы шкодзяць арганізму?

— Шкодзяць. Пасля таго, як кінуў, месяц заснуць нармальна не мог — адчуваў страх, усё здавалася, што нешта зараз выскачыць на мяне з-за рога. І зусім не смешна было. Безумоўна, шкодзяць яны псіхічнаму здароўю, лёгкім і страўніку. Бо, калі «праб'е на хаўчык», дык ясі што папала, а потым праблемы. Але ў мяне толькі вось гэткія страхі перад сном былі. Зараз ужо больш-менш адпусціла... Дарэчы, калі кінуў, праз тыдзень пачаўся ўздым настрою. Доўжыўся ён тыдні два: мабыць, арганізм адыходзіў і радаваўся. І дрэвы былі прыгожыя, і людзі добрыя. Потым стала як заўсёды.

— Ці ўзнікае залежнасць?

— Безумоўна! Спачатку курыў раз на тыдзень і ўсім казаў, што залежнасці ў мяне няма, а гэта проста забава. Потым пачаў курыць часцей. І ў выніку паўгода прайшло пад «міксамі». Устаеш з раніцы і толькі адна думка: «Дзе ўзяць?». Потым разумееш... Курыць ці часам выпіваць піва можна і не адрываючыся ад жыцця, а спайс зацягвае канкрэтна. Мы з сябрам вырашылі кінуць. І ў нас атрымалася.

Часцей за ўсё да ўжывання спайса схільныя юнакі ад 15 да 22 гадоў. Па словах прэс-афіцэра Першамайскага РУУС г. Мінска Святланы Білінскай, у месяц у дачыненні да спажыўцоў і збытчыкаў у раёне заводзіцца каля 10 крымінальных спраў. За курэнне забароненага «тавару» ў дачыненні да падлеткаў складаюцца пратаколы, далей — ставяць на ўлік у інспектара па справах непаўналетніх. За збыт асабліва небяспечных псіхатропных рэчываў прадугледжана пакаранне ад 8 гадоў пазбаўлення волі з канфіскацыяй маёмасці.

Яраслаў ЛЫСКАВЕЦ.

Выбар рэдакцыі

Грамадства

Галiна Левіна: Помнiк — не канструктар i не чарцёж, яго трэба перажыць, выпакутаваць

Галiна Левіна: Помнiк — не канструктар i не чарцёж, яго трэба перажыць, выпакутаваць

У архiтэктара Галiны Левiнай — Хатынь, творчая спадчына яе бацькi.

Грамадства

Прэмiя прыгажосцi. Дзеля чаго людзi кладуцца пад нож пластычнага хiрурга?

Прэмiя прыгажосцi. Дзеля чаго людзi кладуцца пад нож пластычнага хiрурга?

Як сведчаць шматлiкiя даследаваннi, прывабным людзям прасцей прабiцца ў жыццi i яны дасягаюць у кар'еры большага поспеху. 

У свеце

Як Еўропа аднаўляецца ад кавiднага ўдару?

Як Еўропа аднаўляецца ад кавiднага ўдару?

Сёлета еўрапейская эканомiка будзе перажываць глыбокую рэцэсiю з-за ўспышкi каранавiруса, нягледзячы на хуткiя i ўсёабдымныя антыкрызiсныя меры як на саюзным, так i на нацыянальным узроўнi.

Эканоміка

Тонкае мастацтва дабрабыту. Складаем сямейны бюджэт разам са спецыялістам Нацбанка

Тонкае мастацтва дабрабыту. Складаем сямейны бюджэт разам са спецыялістам Нацбанка

2020 год паставіў усіх нас перад неабходнасцю дакладна планаваць свае выдаткі.