Mіnsknews.by — гэта ўсё пра Мінск

У сталіцы з'явіўся свой інтэрнэт-партал журналісцкіх расследаванняў, разважанняў, каментарыяў — поўнай інфармацыі пра жыццё ў галоўным беларускім мегаполісе. Сёння стартаваў новы праект агенцтва «Мінск-Навіны» — www.mіnsknews.by.

— Дагэтуль у нас быў сайт з навінамі ўласна агенцтва, газет «Минский курьер» і «Вечерний Минск», — тлумачыць генеральны дырэктар агенцтва Кацярына ДУБІНСКАЯ. — Уласна кажучы, сайты газет таксама застаюцца, аднак цяпер у нас ёсць шырокі партал з больш шырокімі магчымасцямі. Адсюль можна праглядаць і сайты газет, і слухаць радыё «Мінск». Аднак усе нашы журналісты будуць напаўняць не толькі друкаваную перыёдыку, але і агульную інтэрнэт-версію. Зразумела, апошняя будзе больш насычанай — за кошт фота- і тэлерэпартажаў, блогаў, магчымасці размяшчэння бясплатных аб'яў для жыхароў сталіцы і г.д.

Сама пабудова сайта можа нагадваць вядомы партал www.tut.by, аднак толькі ў тым сэнсе, што ў нас інфармацыя таксама дзеліцца па вялікіх блоках — «Палітыка», «Грамадства» і г.д. І усё ж такі гэта інфармацыя толькі пра Мінск. Уся наша сталіца ў дробязях і падрабязнасцях. Актыўна будзем весці блогі — з удзелам не толькі журналістаў, але і вядомых пісьменнікаў, артыстаў і г.д. Карыстальнік сайта атрымлівае магчымасць задаць хвалюючае пытанне, журналісты агенцтва — выйсці на сувязь з чыноўнікамі, якія могуць даць кампетэнтны адказ. Важныя, цікавыя пытанні і адказы будзем прапаноўваць для шырокай аўдыторыі. Плануюцца і анлайн-канферэнцыі з удзелам прадстаўнікоў гарадской улады.

Як правіла, падобныя парталы змяшчаюць спасылкі і на іншыя інтэрнэт-рэсурсы, аднак мы плануем карыстацца толькі ўласнай інфармацыяй. Іншая справа, калі, скажам, газета «Звязда» надрукуе цікавы артыкул пра жыццё нашага горада, то гэта знойдзе адлюстраванне на сайце агенцтва. Адкрыты і доступ да каментарыяў. Адзінае, у чым я тут настойваю, — не даваць доступ для каментарыяў у выпадках размяшчэння трагічных навін. Дапоўніць сайт і так званая «палітра дня» — самыя адметныя падзеі ў свеце. Спадзяюся, удасца нам і годна прадстаўляць дастойную прадукцыю сталічных прадпрыемстваў на правах рэкламы.

Адкрыццё падобнага інтэрнэт-рэсурсу — новы крок у развіцці агенцтва. Творчы калектыў не можа застойвацца. Акрамя таго, нельга пакідаць магчымасць засумаваць і патэнцыяльнаму чытачу. Зыходзячы з гэтага, мы ўжо змясцілі каля нашых стоек на станцыях метро і яшчэ плануем укараніць на іншым грамадскім транспарце QR-код, з дапамогай якога можна хутка спампаваць на мабільны тэлефон свежы выпуск газеты «Вечерний Минск». Практыка паказвае, што ста тысяч бясплатных экзэмпляраў газеты не хапае. Гэта і не дзіўна: газета апошнім часам распаўсюджвалася не толькі на станцыях метро, але і ў некаторых гандлёвых цэнтрах, установах культуры, аптэках, на буйных прамысловых прадпрыемствах. Замест павелічэння друкаванага тыражу было вырашана скарыстацца новымі магчымасцямі, здольнымі прывабіць новую, маладзейшую, аўдыторыю.

Святлана БАРЫСЕНКА