ПРЭСА З ВОДАРАМ КАВЫ

Напярэдадні свята Новага года «Белсаюздрук» зрабіў мінчанам свой чарговы падарунак: на сталічным праспекце Любімава адкрыўся новы гандлёвы павільён. Тут можна не толькі набыць свежую газету, але і пачаставацца смачнай выпечкай за кубкам кавы.

Кіёск такога тыпу ўжо пяты па ліку ў Мінску. Міністр інфармацыі Рэспублікі Беларусь Алег Праляскоўскі, які прысутнічаў на ўрачыстым адкрыцці павільёна, прызнаўся, што ідэю запазычылі на Захадзе, але адаптавалі для Беларусі.

— У такім павільёне можна набыць не толькі друкаваную прадукцыю, але і цацку для дзіцяці, канцылярскія тавары, выпіць кубак кавы, — расказаў Алег Праляскоўскі.

Па словах міністра, адкрыццё кіёскаў «Белсаюздрук» з пашыраным асартыментам продажу тавараў і паслуг — гэта як клопат пра будучыню прадпрыемства, так і спроба даць пакупніку магчымасць набыць неабходныя спадарожныя тавары, не выязджаючы ў спецыялізаваную краму. Алег Праляскоўскі нагадаў, што адным з галоўных напрамкаў дзейнасці РУП «Белсаюздрук» у надыходзячым годзе будзе яго шчыльнае супрацоўніцтва з ААТ «Белкніга».

— На інтэрнэт-сайце «Белкнігі» сёння можна заказаць любы друкаваны тавар, і яго прывязуць у бліжэйшую да пакупніка кніжную краму. Хочацца, каб магчымасць дастаўкі кніг была таксама і ў павільёны «Белсаюздрука», — лічыць міністр інфармацыі краіны. — Заказаў кнігу, яе прывезлі ў кіёск побач з домам, адтуль ты яе і забраў.

Алег Праляскоўскі таксама закрануў тэму зніжэн- ня цікавасці да друкаваных выданняў, што з'яўляецца вынікам павелічэння ролі інтэрнэту ў жыцці грамадства. Міністр падкрэсліў, што, нягледзячы на штодзённы тыраж рэспубліканскіх газет у мільён экзэмпляраў, 60% чытачоў аддаюць перавагу прагляду навін у інтэрнэце. Таму ў павільёнах «Белсаюздрука» ў хуткім часе з'явіцца Wi-Fi, пачнецца продаж прадукцыі на электронных насьбітах:

— Зробім Wi-Fi — моладзь не пакіне без увагі гэты факт. Заадно і кнігі паглядзіць, газеты,  часопісы.

Намеснік міністра інфармацыі Лілія Ананіч адзначыла, што ў мінулым годзе, які быў абвешчаны Прэзідэнтам краіны Годам кнігі, была значна пашырана чытацкая аўдыторыя кніжнага слова. А гандлёвыя павільёны «з пахам кавы» даюць магчымасць правільна прапанаваць пакупніку кнігу: яго вочы не будуць разбягацца перад кніжнай разнастайнасцю, якая сёння ёсць у вялікіх кніжных крамах. На паліцах новага кіёска на праспекце Любімава — навінкі беларускага кнігавыдання: каляровы альбом фотаздымкаў «Беларусь», «Жывая вера. Ветка», альбом малюнкаў Дзмітрыя Струкава:

— У кожнага тавару ёсць свой пакупнік. Калі сёння кніга «Галоўныя вуліцы Мінска» прыйшла сюды, на праспект Любімава, дзе жыве шмат прадстаўнікоў інтэлігенцыі, значыць, доўга ляжаць яна тут не будзе. Кніжнай групе ў такіх гандлёвых аб'ектах гарантаваны поспех, — упэўнена Лілія Ананіч.

Налета «Белсаюздрук» плануе падараваць мінчанам яшчэ пяць новых павільёнаў. Так, на вуліцах Касманаўтаў, Бурдзейнага, Адзінцова з'явяцца кіёскі, дзе можна будзе не толькі набыць газету і выпіць кубак кавы, але і набыць квіткі на розныя сталічныя мерапрыемствы, аформіць падпіску на любое друкаванае выданне, бясплатна падключыцца да інтэрнэту.

Любоў БЯЛЯЕВА. Фота аўтара.