...спрабуе маладая ўрач-афтальмолаг з глыбінкі
Мікашэвічы вядомыя ў першую чаргу дзякуючы дзяржаўнаму прадпрыемству «Граніт» і, напэўна, аднайменнаму футбольнаму клубу. У горадзе жыве 18 тысяч чалавек, ды і горадам Мікашэвічы сталі зусім нядаўна — у 2005 годзе. Кацярына ЛУКАШЭВІЧ апынулася тут пяць месяцаў таму — 24-гадовы хірург прыехала ў глыбінку па размеркаванні.
Мікашэвіцкая бальніца знаходзіцца на самым ускрайку горада, у сасновым бары. Гэта даволі вялікі для населенага пункта, які не з'яўляецца райцэнтрам, будынак. На другім паверсе — кабінет афтальмолага. Кацярына Лукашэвіч працуе тут разам з медсястрой Анжэлай НАГОРНАЙ.
— Я родам са Століна, — кажа Кацярына. — Калі перада мной паўстала пытанне, кім быць, доўга не думала. Старэйшая сястра — медык, вось я і вырашыла пайсці па яе слядах.
У 2012 годзе Кацярына скончыла Гомельскі дзяржаўны медыцынскі ўніверсітэт па спецыяльнасці «ўрач-хірург». Дзяўчыну размеркавалі ў Лунінец, але пакуль яна праходзіла інтэрнатуру ў Брэсце, патрэба ў маладым спецыялісце ў Лунінецкай бальніцы адпала.
Другім сюрпрызам для Кацярыны стала яе спецыялізацыя — афтальмолаг.
— Да мяне тут гадоў 15 акулістам працавала жанчына. Яна разам з мужам-доктарам пераехала жыць і працаваць у Мінск, вось і знайшлося месца для мяне. Вялікіх праблем з адаптацыяй да новага віду дзейнасці не было, бо інтэрнатуру я таксама праходзіла ў аддзеле мікрахірургіі вока Брэсцкай абласной бальніцы. Спачатку жартавала з пацыентамі, якія занадта моцна хваляваліся на прыёме: «Чаго вы перажываеце? Вочы — парны орган, нават калі адно сапсуецца, другое ж застанецца!»
Умовы маладому спецыялісту былі прапанаваны не самыя дрэнныя — службовая кватэра («у трох кіламетрах ад бальніцы, каб фігуру падтрымліваць», — жартуе Кацярына) і заробак у 3,5 мільёна рублёў. З улікам начных дзяжурстваў, якія выпадаюць прыкладна раз на тыдзень, зарплата трохі павялічваецца. Па словах Кацярыны, гэта даволі высокі паказчык у параўнанні з аднакурснікамі, якія таксама працуюць у рэгіянальных бальніцах. Грошы грашыма, але як пачуваецца дзяўчына на новым месцы?
— Шчыра скажу: першае, што набыла ў Мікашэвічах — каляндар і маркер, — прыгадвае яна. — У жніўні і верасні закрэслівала кожны дзень і лічыла, колькі засталося да канца гэтых двух гадоў. Але потым... звыклася. Калі кожны дзень з задавальненнем працуеш, перастаеш заўважаць, як час ляціць. Вось ужо і маркер стаў не патрэбен. Акрамя таго, знаёмішся з добрымі людзьмі. Многія калегі, і ў прыватнасці Анжэла Міхайлаўна, дапамаглі адчуць сябе як дома.
Што датычыцца менавіта працы, то на думку Кацярыны, яе тут шмат. І гэта нягледзячы на тое, што ў райцэнтры — Лунінцы — працуе яшчэ большая бальніца. Атрымліваецца, што прыкладна палова раёна ездзіць у Лунінец, астатнія — у Мікашэвічы.
— Працаваць, шчыра кажучы, бывае цяжкавата, — распавядае Кацярына. — У мяне змешаны прыём: ходзяць і дзеці, і дарослыя. Усяго мы абслугоўваем прыкладна 20 тысяч жыхароў. За дзень да мяне прыходзіць мінімум 70-80 чалавек. Вельмі шмат запушчаных выпадкаў, асабліва ў людзей з вёсак, якія не прывыклі турбаваць кагосьці з-за такой, як ім здаецца, драбязы, як зрок. Задавальненне ад працы, безумоўна, ёсць, але хочацца больш працаваць рукамі. Тут жа ўмовы не дазваляюць праводзіць складаныя аперацыі. Самае сур'ёзнае з таго, чым я займаюся — выцягваю іншародныя целы з вачэй і выдаляю новаўтварэнні накшталт папілом. Дарэчы, нядаўна нам далі новую апаратуру, таму працаваць прыемна. Калі патрэбна парада ў нейкіх складаных выпадках — тэлефаную ў Лунінец, там мне дапамагаюць. Мае асноўныя пацыенты, зразумела, пенсіянеры. Многія даўно ўжо ведаюць, якія ў іх хваробы і як гэта лечыцца, а ў бальніцы, здараецца, спрабуюць кампенсаваць недахоп у зносінах. Прасцей кажучы, прыходзяць пагаварыць. Усе адразу ж заўважылі, што з'явіўся новы доктар, пачалі прыходзіць, цікавіцца...
— Некаторыя нават спрабавалі замуж выдаць, — смяецца Анжэла Міхайлаўна.
Ці складана маладому супрацоўніку ўліцца ў калектыў? Кацярына лічыць, што не.
— У нас працуе 300 чалавек, — кажа калега дзяўчыны. — Але большасць ужо пенсійнага ўзросту. Таму пра сяброўства размова не ідзе. Звычайныя працоўныя адносіны.
— Канфліктаў з калегамі не бывае, — працягвае Кацярына, — здараюцца непаразуменні з кіраўніцтвам. Напрыклад, калі хутка працую і пад кабінетам няма чаргі, кажуць, што трэба выдаваць больш талонаў. Быццам бы чэргі — гэта сведчанне правільна арганізаванага рэжыму працы.
Размаўляем з Кацярынай пра адпачынак. Дзяўчына кажа, што звычайна на яго проста не застаецца часу, асабліва калі даводзіцца дзяжурыць. У Мікашэвічах ёсць трэнажорны зал, більярдны і ігральны клубы, а таксама басейн, які цяпер на рэканструкцыі. Але галоўнае, што займае вольны час, — аўташкола.
— Я даўно хачу атрымаць вадзіцельскае пасведчанне, цяпер ёсць трохі часу, каб з гэтым разабрацца. Машыны, праўда, пакуль няма... А адпачываць з сябрамі я звычайна езджу ў Мінск, Брэст ці Гомель. Але здараецца такое нячаста. Бывае, сябры прыязджаюць у Мікашэвічы мяне праведаць. Калі-нікалі можам з іншымі маладымі калегамі схадзіць у мясцовую кавярню. Але з разнастайнасцю адпачынку тут, шчыра кажучы, цяжкавата, — гаворыць Каця.
Заставацца ў Мікашэвічах пасля адпрацоўкі яна пакуль не збіраецца — марыць аб працы хірурга, аб складаных аперацыях...
— Але я не шкадую, што апынулася тут. Насамрэч усё не так дрэнна, як можа здацца. Ад працы атрымліваю задавальненне, нават калі здараюцца праблемы, бо мне падабаецца дапамагаць людзям.
Яраслаў ЛЫСКАВЕЦ. Фота аўтара.
Мінск — Мікашэвічы — Мінск.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.