У адказ на абурэнне часткі гледачоў і прэтэнзіі ўдзельнікаў нацыянальнага адбору на «Еўрабачанне», якія лічаць, што праігнаравана меркаванне грамадскасці, Белтэлерадыёкампанія дала афіцыйны каментарый сітуацыі.
«У выніку адначасовага глядацкага і судзейскага галасавання роўную колькасць балаў у фінале атрымалі два выканаўцы — Тэа і дуэт Макс Лорэнс&ДзіДзюЛя. У поўнай адпаведнасці з п. 27 арт. 6 палажэння аб правядзенні Нацыянальнага адборачнага тура Міжнароднага тэлевізійнага конкурсу песні «Еўрабачанне‑2014»: «У выпадку калі два і больш удзельнікі фіналу праекта набіраюць роўную колькасць балаў, пераможца праекта вызначаецца дадатковым адкрытым галасаваннем прафесійнага журы». Так гаворыцца ў паведамленні прэс-службы. Акрамя таго, падкрэсліваюць прадстаўнікі Белтэлерадыёкампаніі, першае галасаванне журы рэгламентавана тымі ж 10 хвілінамі, якія адведзены на галасаванне тэлегледачоў, а пасля падпісаныя кожным з суддзяў пратаколы перадаюцца на апрацоўку ў спецыяльную падліковую камісію. «У гэтых умовах сцвярджаць, што члены журы грэбавалі чыімсьці меркаваннем ці мелі магчымасць «падкарэктаваць» сваю пазіцыю, — значыць грашыць супраць ісціны. Акрамя таго, журы ўпаўнаважана здзяйсняць галасаванне і пры адсутнасці аднаго з яго членаў», — адзначана ў прэс-рэлізе.
Вынікі адбору вядомыя ўжо ўсім, хто сочыць за конкурсам: прадстаўніком Беларусі на «Еўрабачанні-2014» у Капенгагене стаў спявак Тэа (Юрый Вашчук) з песняй «Cheesecake». «Можна пагаджацца ці спрачацца з дзеючым палажэннем аб конкурсе, аднак пажадана проста ўважліва яго вывучыць і толькі пасля гэтага прымаць рашэнне наконт удзелу ў адборы», — рэзюмуе прэс-служба.
Што ж да пытання з боку ўдзельнікаў, якія набралі аднолькавую колькасць балаў у галасаванні журы (а менавіта: па якім прынцыпе камп'ютарная праграма паставіла адных выканаўцаў вышэй за другіх?), — у гэтым пункце дзейнічаюць традыцыйныя правілы «Еўрабачання». «У гэтым конкурсе не бывае двух другіх ці двух трэціх месцаў, — патлумачыла «Звяздзе» кіраўнік прэс-службы Белтэлерадыёкампаніі Святлана Смалонская-Краскоўская, — і пры роўнай колькасці балаў у некалькіх выканаўцаў для вызначэння таго, хто якое месца заняў, спачатку адкідваюцца самыя высокія і самыя нізкія ацэнкі, а потым параўноўваюць, у каго засталося больш высокіх балаў». У выпадку гурта «Swіtter boys» і дуэта Макс Лорэнс&ДзіДзюЛя, у першых адкінуць трэба ацэнкі 3 і 10, у другіх — 5 і 7 адпаведна. У гурта застаюцца ў актыве яшчэ 10 і 8, у дуэта — некалькі 7, таму «Swіtter boys» і ўзняліся на прыступку вышэй. Што, зрэшты, не адмяняе таго, што няблага было б данесці гэтыя правілы да ўсіх удзельнікаў адбору, суддзяў і гледачоў загадзя, але ніяк не постфактум.
Між іншым
У 1969 годзе на «Еўрабачанні» здарыўся выпадак, калі адразу 4 краіны — Францыя, Іспанія, Нідэрланды і Вялікабрытанія — набралі аднолькавую колькасць балаў. Паколькі на той час ніякай працэдуры вырашэння гэтага спрэчнага моманту не існавала, усе чатыры былі названы пераможцамі. Пазней былі прыняты некалькі правілаў для вызначэння пераможцаў сярод уладальнікаў аднолькавых балаў: так, найперш улічваецца, за каго прагаласавала найбольш краін-удзельніц (незалежна ад ацэнкі), потым параўноўваецца, у каго больш ацэнак 12, 10 і г. д. па шкале зверху ўніз. Толькі ў выпадку, калі ўсе гэтыя паказчыкі абсалютна роўныя, пераможцамі могуць стаць дзве ці некалькі краін. Прынцып параўнання колькасці высокіх ацэнак быў прыменены ў 1991 годзе, калі роўную колькасць балаў атрымалі прадстаўнікі Швецыі і Францыі. У Швецыі аказалася больш «дзясятак», таму ёй і аддалі пальму першынства.
Вікторыя ЦЕЛЯШУК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.