Не трэба «шукаць Фрэйда» там, дзе яго няма
«Колькі чалавек на свет нарадзілася дзякуючы кубачку кавы!» Гэты жарт знаёмы многім. Ці сапраўды запрашэнне на каву мае такія «незваротныя наступствы»? Што ўкладаюць у паняцце «папіць кавы» з прадстаўніцай прыгожага полу мужчыны і як успрымаюць такія запрашэнні жанчыны?
Асабіста мне неаднойчы даводзілася чуць у тэлефоннай трубцы ўзрушанае: «Ён запрасіў мяне на каву!» ад сябровак і знаёмых. І амаль адразу за гэтым ішлі пытанні: «А як ты думаеш: што надзець? А раптам ён мяне запросіць да сябе?».
Забягаючы наперад скажу, што жанчыны вельмі крыўдзіліся, калі ў «кавы» не было працягу (мужчыны, майце на ўвазе!).
«І гэта зразумела, — кажа мая знаёмая Кацярына, — напрыклад, у маім дашлюбным жыцці «папіць кавы» заўсёды азначала спатканне. (Не блытаць з запрашэннем заняцца сексам!) Мужчыны прапаноўвалі сустрэцца за «кубачкам кавы», каб пазнаёміцца бліжэй, пагутарыць, нешта абмеркаваць. Кава — гэта ўсё ж такі двухсэнсоўная рэч».
З Кацярынай катэгарычна не згодна Настасся. Яна лічыць, што прадстаўніцы слабай паловы залішне сабе фантазіруюць наконт кавы, надаючы ёй зашмат значэння. «Кава — гэта проста кава. Не трэба «шукаць Фрэйда» там, дзе яго няма!»
Настасся ўпэўнена, што жанчына заўсёды ведае (інстынктыўна гэта адчувае!): дабіваецца яе мужчына ці не, таму гульня ў разважанні на тэму «а што ён меў на ўвазе пад кубачкам кавы?» — гэта толькі какецтва.
— Згаджацца ці не? Калі падабаецца мужчына — так, згаджайцеся, не падабаецца — можна папіць кавы без абавязацельстваў, — гаворыць Настасся.
Яна прызнаецца, што адносіны з процілеглым полам у яе пачыналіся па-рознаму: і з кавы, і з віна, і нават з піва. «Калі жанчыне не падабаецца прадстаўнік процілеглага полу, то ўсе кропкі над «і» лепш расставіць загадзя.
Настассю падтрымлівае Стэла. «Для мяне кава — гэта таксама толькі кава. І мяне «на яе» немагчыма запрасіць. Да мяне можна толькі далучыцца. Вельмі люблю каву і п'ю кожны дзень!» — гаворыць яна.
«Калі жанчыне прапаноўваюць «папіць кавы» і гэта адбываецца не ў офісе, то адназначна ў мужчыны ёсць патаемныя намеры і ён прэтэндуе на працяг адносін, — кажа Яраслаў. — І я ўпэўнены, што ўсе жанчыны цудоўна разумеюць, якія намеры ўкладвае ў «кубачак кавы» мужчына!»
— А калі жанчына робіць выгляд, што не разумее двухсэнсоўнасці «кавы»? Альбо вырашыла падурыць хлопцу галаву і пакакетнічаць? — правакую Яраслава.
— Ну, калі яна робіць выгляд, што не зразумела, то… і выдаткі ж невялікія. Можна і яшчэ некалькі разоў запрасіць.
«Я таксама, калі хачу бліжэй пазнаёміцца з дзяўчынай, якая спадабалася, запрашаю яе на каву, — прызнаецца Генадзь. — За кубачкам можна даведацца аб яе поглядах, напрыклад, на тое, якімі павінны быць адносіны ў сям'і (Генадзь, як і Яраслаў, нежанаты), зразумець ці сумяшчальныя мы псіхалагічна. Трэба ж уважліва ставіцца да выбару будучай «палавінкі».
Такую ж пазіцыю наконт «кубачка кавы» занялі і многія іншыя з апытаных мной нежанатых мужчын. Стала цікава: «А што ўкладаюць у паняцце «папіць кавы» з жанчынай несвабодныя мужчыны? У іх жа ўжо ёсць «другія палавінкі»?
— Вельмі правакацыйнае пытанне для жанатага чалавека, — смяецца Аляксандр. — Адкажу так: і мужчыну, і жанчыну прырода стварыла такім чынам, што яны знаходзяцца ў стане пастаяннага палявання адно на аднаго, нават тады, калі «ежа» (свая «палавінка») знойдзена. Таму і звычайны кубачак кавы можа прывесці да непрадказальных наступстваў. Ведаю шмат пар, у якіх «паляванне» пачыналася менавіта з кубачка кавы. Зразумела, жанчыне лепш не разлічваць на тое, што пасля кавы яе адразу запросяць у ЗАГС, але неабходна мець на ўвазе, што прыемны вечар пасля кавы можа мець працяг.
Як бачым, кубачак кавы ўсё ж такі рэч неадназначная, нават з пункту гледжання несвабоднага мужчыны. Але, калі прадстаўнік моцнага полу ўсё ж запрасіў вас на каву, можна дазволіць сабе крыху пакакетнічаць. Гэта мужчыну не спужае, а толькі больш распаліць інстынкт паляўнічага! А што далей?.. Вырашайце самі.
Гелена АВЕЛА.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.