У традыцыйным спартыўным аглядзе «Звязда» распавядае пра ўнікальнае дасягненне Надзеі Скардзіна, выступленні беларускіх тэнісістаў ў Аўстраліі і крыўднае паражэнне беларускіх гандбалістаў ад палякаў на чэмпіянаце Еўропы.
1. Апошні перад Алімпіядай этап Кубка свету па біятлоне ў італьянскай Антэрсельве прынёс беларускім спартсменам два прызавыя месцы. У спрынтарскай гонцы Дар'я Домрачава святкавала «бронзавы» поспех. Але застацца на п'едэстале і па выніках пасьюта ў Дар'і не атрымалася. Чатыры промахі на «стойцы» цалкам перакрэслілі «медальныя» шанцы лідара нашай жаночай зборнай. А вось Надзея Скардзіна выдатна адпрацавала на агнявых рубяжах, што і дазволіла беларускай спартсменцы размяняць восьмае месца ў спрынце на другое ў гонцы праследавання. Дарэчы, да апошніх метраў дыстанцыі Надзея змагалася за «золата», саступіўшы Андрэі Хенкель менш за дзве секунды.
Для ўраджэнкі Санкт-Пецярбурга гэта першае «серабро» ў асабістых гонках. Акрамя таго, у Антэрсельве Скардзіна ўстанавіла сусветны рэкорд па працягласці ідэальнай стралковай серыі. Беларуская біятланістка закрыла 85 мішэняў на 17 агнявых рубяжах. І толькі ў нядзельнай эстафеце другі нумар нашай зборнай дапусціла некалькі асечак. Праўда, з-за густога туману арганізатары адмянілі гонку, што мае на ўвазе скасаванне бягучых вынікаў. Так што афіцыйна «сухая» серыя Надзеі Скардзіна працягваецца!
Мужчынская ж эстафета прайшла без праблем з надвор'ем. Беларускія біятланісты паказалі лепшы вынік сезона, фінішаваўшы на сёмым месцы.
Між іншым, Дар'я Домрачава ўзнялася на другі радок у заліку Кубка свету, шэсць ачкоў саступаючы нарвежцы Туры Бергер. Дзякуючы прызавому месцу ў пасьюце Надзея Скардзіна ўварвалася ў трыццатку лепшых, дзе займае 24-ы радок.
2.
Беларускі фрыстайліст Антон Кушнір заняў трэцяе месца ў сусветнай класіфікацыі па выніках сезона. Да апошняга ў сезоне этапу Кубка свету ў амерыканскім Лэйк-Плэсідзе беларус узначальваў рэйтынг. Але на старце ў ЗША Кушнір выступіў не вельмі ўдала, заняўшы толькі дзясятае месца, і ў выніковым заліку прапусціў наперад двух кітайцаў. А вось Аляксей Грышын у Лэйк-Плэсідзе ўзняўся на трэцюю ступень п'едэстала, што дазволіла алімпійскаму чэмпіёну Ванкувера фінішаваць у сусветнай класіфікацыі на высокай чацвёртай пазіцыі. Наступны раз беларускія фрыстайлісты ўзнімуцца на спаборніцкі схіл у алімпійскім Сочы.
3. Дзякуючы перамозе над чарнагорцамі беларуская зборная па гандболе выйшла ў асноўны раўнд чэмпіянату Еўропы. Але адсвяткаваць другую «вікторыю» запар у падапечных Юрыя Шаўцова не атрымалася. Менш чым за тры хвіліны да фінальнай сірэны ў матчы супраць палякаў беларусы вялі 30-27. Але нашы заходнія суседзі не толькі здолелі зрабіць лік роўным, але і вырвалі перамогу на апошніх секундах сустрэчы. Такім чынам, у другой групе зборная Беларусі займае апошняе месца, захоўваючы толькі тэарэтычныя шанцы на выхад у паўфінал.
4. Вікторыя Азаранка выйшла ў чвэрцьфінал на Адкрытым першынстве Аўстраліі па тэнісе. У матчы чацвёртага круга беларуская спартсменка ўпэўнена абыграла амерыканку Слоан Стывенс — 6-3, 6-2. Дарэчы, некаторыя сустрэчы чацвёртага раўнда скончыліся сенсацыямі. Сербская тэнісістка Ана Іванавіч выбіла з барацьбы за тытул першую ракетку свету Сірэну Уільямс, а славачка Дамініка Цыбулкава перайграла Марыю Шарапаву.
Акрамя гэтага, на Australіan Open Максім Мірны працягвае выступленні ў парным і змешаным разрадах. У пары з расійскім тэнісістам Міхаілам Южным беларус ужо выйшаў у чвэрцьфінал. Наступнымі сапернікамі беларуска-расійскага тандэму будуць чатырнаццатыя «сеяныя» Роберт Ліндстэт і Лукаш Кубат. За выхад у чвэрцьфінал змешанага разраду Максім Мірны і чэшка Андрэа Главачкава паспаборнічаюць з пакістанска-нямецкім дуэтам — Айсам- уль-Хак Курэшы/Юлія Гёргес.
Дарына ЗАПОЛЬСКАЯ
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».