Месцам для правядзення прэс-канферэнцыі губернатара Брэстчыны Канстанціна Сумара па выніках года нездарма быў выбраны аграгарадок «Жураўлінае». Перад пачаткам мерапрыемства прадстаўнікі СМІ азнаёміліся з аб'ектамі адкрытага акцыянернага таварыства «Жураўлінае» і мелі магчымасць убачыць буйное шматпрофільнае сельгаспрадпрыемства, якое мае вялікія перспектывы. Экскурсаводам па гаспадарцы выступіў яе дырэктар Міхаіл ГРЫШКЕВІЧ.
Штрыхі да партрэта таварыства
Міхаіл Міхайлавіч назваў асноўныя лічбы, з якіх можна ўявіць маштабы гаспадаркі. 660 працаўнікоў ААТ ствараюць пятую частку валавой сельгаспрадукцыі раёна. У «Жураўліным» 12,5 тысячы гектараў зямлі, крыху больш за 13 тысяч галоў буйной рагатай жывёлы, з іх пяць тысяч кароў. Асноўны кірунак гаспадаркі — вытворчасць малака. Мясная галіна прадстаўлена свінакомплексам на 55 тысяч галоў. Ёсць свой камбікормавы завод з акрэдытаванай лабараторыяй.
За апошнія гады адбудавана і рэканструявана фактычна ўся база жывёлагадоўчай галіны. Пабудаваны новы комплекс «Казлы», рэканструяваны комплекс у вёсцы Мокрае, узведзены яшчэ адзін комплекс — па вырошчванні нецеляў на 2 тысячы галоў у Ляжайцы. Там жа ўведзены ў строй яшчэ адзін комплекс на 1100 галоў дойнага статка. У Сухопалі пабудаваны новы комплекс на 960 галоў дойнага статка, у Хвалаве — на 1100 нецеляў. Закончана рэканструкцыя малочнатаварнага комплексу ў Клепачах. Гэта некалькі штрыхоў да агульнай карціны маштабаў будаўніцтва, якое вядзецца ў акцыянерным таварыстве. Сюды ж можна дадаць работу па прывядзенні ў парадак машыннага двара. Сёння рамонтныя майстэрні — з ацяпленнем, добрымі ўмовамі працы, мадэрнізаваным станочным паркам. Летась па выніках конкурсу-агляду мехдвор гаспадаркі заняў першае месца ў краіне.
Сад з кропельным арашэннем займае 172 гектары зямель. Садаводства — таксама перспектыўны кірунак сельгасвытворчасці.
Рэалізацыяй прадукцыі «Жураўлінага» займаюцца пяць уласных магазінаў. У гандлёвую сетку гаспадаркі ўваходзяць таксама два рэстараны і кавярня.
Камбікормавы завод гаспадаркі выдае 80 тон кармоў для буйной рагатай жывёлы і свіней у змену. Паводле слоў яго начальніка Вячаслава Барана, з вялікімі і складанымі агрэгатамі спраўляюцца майстар і чатыры апаратчыкі. Яшчэ ў склад завода ўваходзіць лабараторыя кантролю якасці. Яе загадчыца Людміла Яфімава сказала, што асноўным кірункам дзейнасці лабараторыі з'яўляецца ацэнка якасці сыравіны і гатовых кармоў. Лабараторыя мае сучаснае абсталяванне, на якім хутка і скрупулёзна правядуць усе аналізы, каб адказаць на пытанні кліента — ці адпавядае корм заяўленай вытворцам якасці, ці бяспечны гэты прадукт для жывёлы, ці захавана тэхналогія вытворчасці кармоў. Лабараторыя атрымала акрэдытацыю на праверку раслінных кармоў — такіх, як сілас і сянаж, камбікорм, збожжавую сыравіну. Таму аказвае платныя паслугі іншым сельгасвытворцам і спажыўцам.
Самыя смачныя яблыкі — з «Жураўлінага»
Сёння працаўнікі «Жураўлінага» могуць лічыць сябе вопытнымі садаводамі. Як ужо гаварылася, ладны кавалак зямлі адведзены пад яблыневую плантацыю. Сад — гэта вельмі складаная вытворчасць. Тут неабходна захоўваць тэхналагічную дысцыпліну да дробязяў, іначай намаганні акажуцца марнымі. За сезон у садзе праводзіцца ад 15 да 20 апрацовак. Часта даводзіцца працаваць ноччу, калі спадзе гарачыня і сціхне вецер.
Каб ісці ў нагу з часам, ёсць патрэба пастаянна звяртацца па параду да навукоўцаў. Садаводы з Мокрага не раз бывалі на стажыроўках у польскіх калег. Дапамагае і свая доследная станцыя ў Пружанах.
Сёння можна гаварыць аб пэўных поспехах у галіне садаводства. У гэтым годзе атрымана больш за 3300 тон яблыкаў. Кожны дзень ідзе іх адгрузка ў Маскву, Мінск, іншыя гарады. Частка закладваецца ў сваё фруктасховішча, якое нядаўна ўзведзена. Як вядома, праблема многіх садаводаў у тым, што няма дзе захоўваць ураджай. І, несумненна, выйграе той, хто можа прытрымаць яблыкі да сярэдзіны зімы або да вясны, калі на іх павысіцца цана. Таму ў гаспадарцы і пайшлі на будаўніцтва такога нятаннага аб'екта.
Зараз у фруктасховішчы кіпіць работа. Жанчыны шчыруюць на пераборцы яблыкаў: трэба адабраць іх па гатунках, а таксама аддзяліць пашкоджаныя, нетаварныя плады. Кіруе працэсам загадчык сховішча Васіль Пянко. 16 халадзільных камер ужо запоўнена. Тут яблыкі захаваюць водар і вітамінныя якасці доўгі час.
Аграгарадок новага фармату
Намеснік дырэктара па ідэалогіі Зінаіда Усік расказвае аб сацыяльна-культурным развіцці аграгарадка «Жураўлінае». За апошнія гады ўзведзена шмат жылых дамоў. Жыллё — вырашальны фактар для замацавання кадраў. Ствараюць сем'і маладыя спецыялісты, рабочыя, атрымліваюць домік з усімі зручнасцямі і застаюцца працаваць. Сярэднія школы ў Клепачах і Мокрым выглядаюць прыгожа і сучасна. Далёка не кожная гарадская ўстанова адукацыі можа пахваліцца такім інтэр'ерам і абсталяваннем. Школа ў Мокрым, напрыклад, мае больш чым векавую гісторыю. Тут працуе шмат гурткоў па інтарэсах, дзеці выпускаюць сваю газету, рыхтуюць радыёперадачы ва ўласнай студыі, маюць цэлую галерэю медалёў і кубкаў за спартыўныя дасягненні. Дырэктар школы Алег Бзот паказаў напрацоўкі юных даследчыкаў па «вогненных» вёсках. Тутэйшыя мясціны вельмі моцна пацярпелі ў час вайны. За адзін толькі дзень 17 ліпеня 1942 года фашысты спалілі сем вёсак. Пра тыя трагічныя старонкі гісторыі беражліва захоўваюць памяць у школе.
Добрымі традыцыямі можа пахваліцца і Кляпацкая сярэдняя школа. Два гады таму тут дабудавалі спартыўна-аздараўленчы комплекс за кошт гаспадаркі. Вечарам яго наведваюць мясцовыя жыхары. Асабліва шмат ахвотных бывае ў выхадныя дні. Дзіцячы садок у Клепачах — адзін з лепшых у вобласці. Праўда, месцаў у ім ужо не хапае, даводзіцца трохі ўшчыльняць групы.
Галоўнай славутасцю Мокрага ўжо некалькі гадоў з'яўляецца грамадска-турыстычны комплекс «Мікалаеўскі». Здалёк гэтая пабудова нагадвае невялікія старадаўнія палацы з вежай, а зблізку — утульныя гандлёвыя комплексы невялікіх еўрапейскіх гарадоў з акуратнымі будынкамі і брукаванкай пад нагамі. У склад комплексу ўваходзіць гасцініца на 49 месцаў з канферэнц-залай, залай для перагавораў, саўнай, більярдам. Адным словам, усе ўмовы для адпачынку гасцей створаны. Загадчыцай гэтай прыгожай установы, паводле вызначэння, можа быць толькі прыгожая жанчына. Такую мы і сустрэлі на парозе. Любоў Паўлаўна Рытвінская паказала сваю гаспадарку. Кожны з гасцінічных нумароў аформлены адмыслова: мэбля, шторы, пакрывалы, пасцельная бялізна вырашаны ў сваёй колеравай гаме для кожнага пакоя. Прасторны хол са скуранымі канапамі — усё як у добрых атэлях.
Асартымент крамы нічым не саступае гандлёвым прадпрыемствам абласнога цэнтра. Каўбасы, мясныя, малочныя прадукты — усё некалькіх відаў розных вытворцаў. Побач кулінарыя, дзе можна набыць свежыя паўфабрыкаты і гатовыя вырабы.
Рэстаран аформлены пад сярэднявечча. Масіўныя драўляныя сталы і крэслы, зверху звісаюць жырандолі ў выглядзе колаў, на сценах прымацаваны гербы знакамітых родаў зямлі беларускай. Сцены, столь, мэбля зроблены пад дрэва: сучасна, стыльна і нагадвае даўніну. Па сутнасці, гэты турыстычны комплекс стаў адным з першых аб'ектаў інфраструктуры новай аб'язной дарогі вакол пушчы. Ён ужо прываблівае турыстаў. Ва ўсялякім выпадку пад Новы год попыт бывае вялікі.
У вёсках выраслі новыя вуліцы прыгожых дамоў, ад будаўніцтва не адстае добраўпарадкаванне. І паступова «Жураўлінае» становіцца адной з прыгажэйшых мясцін на Пружаншчыне. Аграгарадок новага фармату.
Святлана ЯСКЕВІЧ, Алена ДАЎЖАНОК, Яўген ПЯСЕЦКІ (фота).
УНП 200026087
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.