Магілёўскі трэнер Алег Пракоф'еў пазнаёміўся з Уладзімірам Высоцкім падчас здымак фільма «Я родам з дзяцінства»
Існуе думка, што вядомы бард ніколі не быў у Бабруйску. Маўляў, калі тут ішлі здымкі сцэн для фільма «Я родам з дзяцінства», дзе Высоцкі сыграў свайго апаленага вайной цёзку, артыст сюды нават і не прыязджаў. Нібыта ў той час ён здымаўся ў карціне Эдманда Кеасаяна «Кухарка» ў Краснадарскім краі і таму з бабруйскай экспедыцыі выпаў. Але ёсць як мінімум два чалавекі, якія аўтарытэтна могуць абвергнуць гэты спрэчны факт.
Заслужаны трэнер па веславанні БССР Алег Пракоф'еў расказвае, што яго сустрэча з бардам адбылася дзякуючы рэжысёру фільма Віктару Тураву, з якім Пракоф'еў быў знаёмы з дзяцінства. Калісьці яны разам хадзілі ў марскі клуб пры магілёўскім ДТСААФ. Пасля школы іх сцежкі-дарожкі разышліся. Але тады, у жніўні 1965 года, лёс нечакана звёў іх у Бабруйску.
— Я разам са зборнай камандай вобласці прыехаў у Бабруйск і пасяліўся ў гасцініцы з аднайменнай назвай, — узгадвае Алег Мікалаевіч. — Аднойчы выходжу з нумара, а насустрач па калідоры Віця Тураў, з якім я не бачыўся каля 8 гадоў. Вядома, мы вельмі ўзрадаваліся, сталі распытваць адзін аднаго: дзе ды як. Я сказаў, што з хлопцамі тут на трэніроўках. А Тураў падзяліўся, што здымае фільм. І раптам прапанаваў: слухай, а можаш арганізаваць масоўку на вадзе, кшталту людзі адпачываюць, на лодках катаюцца? Я пагадзіўся. Назаўтра паведаміў сваім падапечным, што будзем удзельнічаць у фільме. Пакуль ішлі здымкі, мы з Туравым размаўлялі пра жыццё. А потым ён запрасіў мяне ў свой нумар.
Апартаменты рэжысёра размяшчаліся на другім паверсе гасцініцы. І вось, калі сябры сядзелі і ўспаміналі за келіхам шампанскага дзяцінства і юнацтва, адчыніліся дзверы і на парозе з'явіўся невысокі сціплы мужчына. Гэта быў тады яшчэ мала каму вядомы Высоцкі. Ён зайшоў паказаць рэжысёру некалькі сваіх песень, якія прапанаваў уключыць у фільм. Віктар Тураў гасцінна запрасіў яго далучыцца да кампаніі і пазнаёміцца з сябрам.
Высоцкі, пачуўшы, што Пракоф'еў трэнер, заўважыў, што іх прафесіі нечым аднолькавыя: увесь час на эмоцыях, у руху… Выпілі шампанскага за знаёмства, але артыст кудысьці спяшаўся і затрымаўся за сталом усяго на некалькі хвілін. Сустрэча была такой кароткай, што Пракоф'еў нават і не ўзгадаў бы пра яе, каб не далейшая шалёная папулярнасць артыста.
Яшчэ адзін сведка візіту Высоцкага ў Бабруйск — Фёдар Скараход, які сёння працуе намеснікам галоўнага ўрача санаторыя «Шыннік». Ён быў адным з тых падлеткаў, якіх трэніраваў у далёкім 1965 годзе Алег Пракоф'еў.
— Высоцкага я бачыў, калі ён разам з іншымі артыстамі адпачываў каля вагончыка на вуліцы Берагавой, дзе ішлі здымкі фільма, — кажа ён. — Нам з таварышамі было цікава за імі назіраць. Нават памятаю, што артыст быў адзеты ў клятчастую шэра-чырвоную кашулю.
Фёдар Скараход узгадвае, як ён разам з таварышамі па веславанні старанна адпрацоўваў некалькі дубляў на Бярэзіне для будучай карціны. Але ў фільм ніводны з іх так і не ўвайшоў. Затое застаўся эпізод, дзе ён сярод іншых удзельнікаў масоўкі складвае дровы. А яшчэ ў фільме можна ўбачыць той паўразбураны мост цераз Бярэзіну, які знаходзіўся ў раёне завулка Затонны. Дарэчы, здымкі праходзілі ў раёне пляжа санаторыя імя Леніна. Гэта па-ранейшаму вельмі папулярнае месца адпачынку сярод бабруйчан.
Між тым Бабруйск не пакінуў Высоцкага абыякавым. Невыпадкова ж герой яго «Песні для тых, хто ад'язджае за мяжу» менавіта з гэтага горада. Імя барда тут таксама часта згадваюць падчас прысвечаных яму вечарын, але вось дакументальных сведчанняў таго часу, якія б захоўваліся, напрыклад, у музеі, мне так і не пашчасціла знайсці. Нават здымкаў не засталося.
Няма іх і ў Алега Пракоф'ева, хоць ён вельмі любіў здымаць у тыя часы і меў фотаапарат. Кажа, не да таго было. А шкада. Цяпер, калі прыходзіцца бываць у Бабруйску і сустракацца са сведкамі тых кіназдымак, зноў наплываюць успаміны, у якіх на розныя галасы шуміць лета 1965‑га, дзе ўсе яшчэ жывыя і Віктар Тураў, і Уладзімір Высоцкі…
Нэлі ЗІГУЛЯ
Даведка «Звязды»
Нядаўна ў Бабруйску з'явілася скульптура Шуры Балаганава — аднаго з дзяцей лейтэнанта Шміта, які з павагай адазваўся аб гэтым горадзе ў рамане Ільфа і Пятрова «Залатое цяля». А вось Уладзіміру Высоцкаму помніка тут пакуль няма. Як і наогул ва ўсёй Беларусі. Чаго не скажаш пра іншыя краіны. Сёння нават цяжка падлічыць, колькі адкрыта манументаў, памятных дошак, помнікаў у гонар народнага куміра. І гэта толькі найбольш вядомыя з іх.
Масква: помнік на Ваганькаўскіх могілках; ва ўнутраным дворыку Тэатра на Таганцы; скульптурная кампазіцыя Высоцкаму, Акуджаве, Бродскаму ля музея гарадской скульптуры на Пятроўцы.
Марыупаль: стэла каля Дома сувязі; помнік Высоцкаму ў вобразе Жаглова.
Самара: стэла ў скверы імя Высоцкага; скульптурная кампазіцыя ў выкананні Міхаіла Шамякіна, сябра Высоцкага.
Барнаул: бюст Высоцкага.
Набярэжныя Чаўны: помнік на плошчы імя Высоцкага.
Падгорыца (сталіца Чарнагорыі): помнік Высоцкаму.
Новасібірск: помнік каля тэатра «Глобус».
Екацярынбург: помнік Уладзіміру Высоцкаму і Марыне Уладзі.
Выршэц (Балгарыя): стэла Высоцкаму.
Калінінград: помнік у цэнтральным парку.
Кіеў: помнік Жаглову і Шарапаву.
Варонеж: помнік каля інстытута фізкультуры.
Паўднёвы Урал: Памятны знак на вяршыні гары Шабля.
Валгадонск Растоўскай вобласці: скульптурная кампазіцыя «Каханне», прысвечаная Уладзіміру Высоцкаму і Марыне Уладзі.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.