Па дапамогу да інспектараў ДАІ на Магілёўшчыне за суткі звяртаюцца дзясяткі кіроўцаў.
Для аўтамабілістаў сёння насталі напружаныя дні. З-за маразоў тэхніка адмаўляецца слухацца, і каб яе «ажывіць», прыходзіцца марнаваць шмат часу. Але яшчэ горш тым, хто ўсё ж такі выехаў з дому, потым аўто заглухла недзе ў дарозе. І добра яшчэ, калі гэта здарылася ў горадзе, дзе знайсці дапамогу не так цяжка. А калі гэта загарадная траса?
— Зараз такіх званкоў мы атрымліваем каля 20 за суткі, і гэта толькі па Магілёве і Магілёўскім раёне, — паведаміў старшы інспектар абласнога ўпраўлення ДАІ Андрэй Калеснік. — Адным трэба, каб нехта памог скрануць машыну з месца, другіх прыходзілася адбуксіроўваць да месца жыхарства. Нядаўна на «прамую лінію» патэлефанавала дзяўчына, каб яшчэ раз падзякаваць нашым супрацоўнікам, якія дапамаглі ёй на бабруйскай трасе.
Каб паспрабаваць сябе ў ролі выратавальніка, разам з супрацоўнікамі асобнага батальёна дарожна-патрульнай службы абласной ДАІ — камандзірам узвода Аляксеем Жыгаравым і інспектарам Станіславам Рубанавым, заступаю на некалькі гадзін у нарад.
Шэры «Фальксваген» мы ўбачылі за некалькі кіламетраў ад Магілёва, недалёка ад аўтазапраўкі. Як патлумачыў малады чалавек, не хапіла паліва, каб дацягнуць да яе, і ён у роспачы звярнуўся да супрацоўнікаў ДАІ. Выратавальнікі на дарогах з паразуменнем ставяцца да сваіх кліентаў. Хаця не трэба быць бестурботным, калі ў такія маразы адпраўляешся ў дарогу. Што перашкаджала праверыць наяўнасць паліва перад паездкай? Але ж не кідаць чалавека на волю лёсу. Станіслаў Рубанаў дастае з багажніка трос і бярэ «Фальксваген» на буксір.
З аўтазапраўкі мы вяртаемся ў горад і бачым, як на абочыне мужчына беспаспяхова спрабуе рэанімаваць сваё аўто. «Дапамога патрэбна?» — цікавіцца Аляксей Жыгараў. «Ды вось матор заглух», — уздыхае кіроўца. З багажніка машыны ДАІ, адкуль не так даўно быў выняты трос, з'яўляецца прыстасаванне для прыкурвання ад акумулятара.
Мароз за горадам, здаецца, яшчэ мацнейшы. Звяртаю ўвагу на тое, што гэты кіроўца, як і папярэдні, таксама апрануты вельмі лёгка. На яго рукі, якія ад марозу сталі зусім сінія, жахліва глядзець. Мужчына ледзь размаўляе ад холаду. Няўжо нельга было апрануцца з улікам надвор'я? «Хто ж ведаў, што рухавік падвядзе?» — паціскае плячыма ахвяра студзеньскіх маразоў.
— Кіроўцы самі вінаватыя, што не ўлічылі ўмоў надвор'я, — лічыць камандзір узвода. — Мы штодня папярэджваем: у такія маразы лепш карыстацца грамадскім транспартам. На асабістым аўтамабілі адпраўляцца ў дарогу можна толькі пры ўпэўненасці, што ён тэхнічна спраўны. Для гэтага неабходна «абуць» зімовыя шыны, праверыць работу акумулятара, печкі, паглядзець, каб працавала прыстасаванне для абдзімання шкла, была ў наяўнасці незамярзаючая вадкасць.
У асноўным кіроўцаў падводзіць дызпаліва, якое пачынае замярзаць пры нізкай тэмпературы, або слабы акумулятар. Дарэчы, за змену мае часовыя калегі выратавалі яшчэ 6 чалавек. Кагосьці таксама прыходзілася браць на буксір, камусьці даць «прыкурыць». Застаецца дадаць, што сіноптыкі пакуль не абяцаюць пацяплення, таму трэба не адзін раз падумаць перад тым, як выехаць з гаража. Знаўцы раяць дадаваць на 10 літраў звычайнага дызпаліва 1 літр бензіну, а лепш — газы. Але апошні від паліва не заўсёды яшчэ можна знайсці на аўтазапраўках. Да таго ж ён даражэйшы. Для паездак на далёкія адлегласці не забудзьцеся прыхапіць трос, электраправады для «прыкурвання» ад акумулятара іншага аўто, лапату, не перашкодзіць запасны паліўны фільтр. Адзенне ў дарогу таксама павінна быць па сезоне — цёплыя штаны, куртка, рукавіцы. Пажадана прыхапіць тэрмас з гарачай гарбатай ці кавай. Бо ў дарозе ўсякае можа здарыцца.
Нэлі ЗІГУЛЯ.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».