Беларусь перажыла цяжкі (з эканамічнага пункту гледжання) 2013 год. Але наперадзе новы — і не нашмат прасцейшы — 2014-ты. Чым будзе жыць наша эканоміка сёлета? Ці палепшыцца праца айчынных прадпрыемстваў? Чаго чакаюць ад прыватызацыі? Ці будзе адкрыта новая праграма супрацоўніцтва з МВФ? Колькі людзей патрапіць пад скарачэнні? Аб гэтым і не толькі карэспандэнт «Звязды» размаўляў з міністрам эканомікі Беларусі Мікалаем Снапковым.
— З чым звязаны перагляд асноўных прагнозных паказчыкаў на 2014 год?
— Я сказаў бы, не перагляд, а ўдакладненне. Прычын для гэтага некалькі, унутраных і знешніх. З канца жніўня 2013 года (калі быў прадстаўлены першы варыянт прагнозу) змянілася сітуацыя на знешніх рынках, у тым ліку сыравінных. Па прагнозах сусветных аналітыкаў, цэны на нафту знізяцца да 100 долараў за барэль, гэта пацягне за сабой і падзенне кошту на нафтапрадукты. Сітуацыя на сусветным калійным рынку яшчэ не стабілізавалася, хаця папярэднія вынікі паказваюць, што ў 2013 годзе Беларусь у цэлым справілася з наступствамі «калійнага разводу».
Наогул, карэкціроўка прагнозаў у залежнасці ад сітуацыі ў эканоміках гандлёвых партнёраў, кан'юнктуры асноўных рынкаў — гэта звычайная сусветная практыка. Мінэканамразвіцця РФ у 2013 годзе чатыры разы пераглядала прагноз Расіі на 2014-2016 гады, паніжаючы асноўныя паказчыкі. А паколькі Расія зараз з'яўляецца асноўным гандлёвым партнёрам Беларусі, былі скарэктаваны і нашы планы.
Аналіз вынікаў мінулага года паказаў нарастанне праблем у нацыянальнай эканоміцы. Сцісканне знешніх рынкаў прывяло да росту адмоўнага сальда знешняга гандлю. Дысбалансы ў эканоміку ўносіць і нарастаючы разрыў паміж тэмпамі росту вытворчасці прадукцыі і спажывання. Акрамя таго, заработная плата расла хутчэй за прадукцыйнасць працы. А гэта пагражае крытычным зніжэннем канкурэнтаздольнасці нашых прадпрыемстваў. І з гэтымі тэндэнцыямі звязана ўдакладненне параметраў.
— Што пакладзена ў аснову прагнозу на 2014 год?
— Суразмернасць патрэбаў эканомікі з магчымасцямі. Пры гэтым нам трэба вырашаць адначасова дзве супярэчлівыя задачы: з аднаго боку, забяспечыць эканамічны рост, з другога — збалансаваць эканоміку. Дасягненне такога кампрамісу — асноўная ўмова развіцця сёлета. Усе ўдакладненыя паказчыкі закліканы забяспечыць найбольш бяспечны для нас рост ВУП, на 2/3 сфарміраваны праз экспарт. Нам важна пазбегнуць насычэння залішняй прадукцыяй нашага маленькага ўнутранага рынку і збалансаваць фінансавую сітуацыю ў краіне, нівеліраваць дысбаланс паміж ростам прадукцыйнасці працы і заработнай платы.
Пры гэтым прагноз 2014 года не робіць акцэнт на аб'ёмных паказчыках. Практыка мінулых гадоў паказала, што залішняя ўвага да іх можа правакаваць нарастанне макраэканамічных дысбалансаў. А з пункту гледжання лічбаў прагноз кансерватыўны. Будуць станоўчыя тэндэнцыі, змены знешніх умоў — і прагноз стане больш аптымістычным. Сваім указам ад 31 снежня 2013 года Прэзідэнт падтрымаў прагноз па стрыманым эканамічным росце.
— Якія перадумовы існуюць для прагназавання такіх (прапісаных ва ўказе) лічбаў? Ці справіцца з гэтым эканоміка?
— Асноўнай бяспечнай крыніцай эканамічнага росту з'яўляецца экспарт. У прагнозе закладзены тэмп яго росту ў памеры 108,6%. Каб яго дасягнуць, на знешніх рынках неабходна прадаць тавараў на 41 млрд долараў. Гэта прыкладна ўзровень 2011 года і на 5 млрд менш, чым у 2012-м. А калі аналізаваць апошнія 5 гадоў, то экспарт 2008 года нам трэба перавысіць на 25%, пры тым, што прамысловая вытворчасць, у параўнанні з тагачасным узроўнем, павінна вырасці на 30%. Гэта значыць, эканамічныя магчымасці для стварэння тавараў на патрэбную суму ёсць. І па звестках аб ёмістасці і патрэбе знешніх рынкаў, яны гатовы паглынуць такі аб'ём нашых тавараў.
Іншая важная перадумова — рост рэнтабельнасці. Урад паставіў перад прамысловымі міністэрствамі і канцэрнамі напружаныя, але выканальныя прагнозныя заданні. Каб іх выканаць, неабходны новыя магутнасці, трэба пераглядаць асартымент эфектыўна кіраваць выдаткамі. І гэта ўжо задача менеджменту арганізацый. А задача ўрада — стварэнне ўмоў.
У развіццё ўказа аб прагнозе Мінэканомікі распрацавала (і ўрад прыняў) пастанову Саўміна ад 13 студзеня 2014 года № 17, у якой, у прыватнасці, прадугледжана стварэнне новых арганізацый і вытворчасцяў, у тым ліку за кошт прамых замежных інвестыцый, якія, у сваю чаргу, забяспечаць рост вытворчасці інавацыйнай прадукцыі, прадукцыі з высокім дабаўленым коштам, здольнай канкурыраваць на сусветным рынку. Таму важна разумець значэнне прамых замежных інвестыцый. Па-першае, гэта адна з крыніц пакрыцця дэфіцыту плацежнага балансу. Па-другое, эфектыўнасць ПЗІ з'яўляецца найважнейшым фактарам мадэрнізацыі беларускай эканомікі.
Акрамя таго, важнай перадумовай дасягнення прагназуемых параметраў, асабліва для рэгіёнаў, з'яўляецца далейшае развіццё малога і сярэдняга бізнесу і павелічэнне яго ўнёску ў ВУП.
— Вось толькі як гэтага дасягнуць?
— У дадатак да ўжо наяўных механізмаў падтрымкі (такіх, як Дэкрэт № 6) згаданай пастановай урад прадугледзеў стварэнне гарантыйных фондаў за кошт сродкаў мясцовых бюджэтаў. Гэта сродак забеспячэння доступу да крэдытных рэсурсаў для малога і сярэдняга бізнесу. З гэтых фондаў можа быць прадстаўлена паручальніцтва — да 70% патрэбнага прадпрымальніку закладнога забеспячэння пад крэдыт. Запланаваны захады па ўключэнні ў абарот па прымальных цэнах дзяржмаёмасці, якая не выкарыстоўваецца або выкарыстоўваецца неэфектыўна.
— На бізнес-форуме Усходняга партнёрства ў Вільні вы заяўлялі аб рэформе дзяржаўных прадпрыемстваў. На вашу думку, якім чынам гэтага можна дамагчыся?
— Мэтавая задача — пераход да паказчыкаў планавання і прагназавання якаснага, а не аб'ёмнага развіцця. Таму прадпрыемствам будуць зацверджаны толькі якасныя паказчыкі прагнозу сацыяльна-эканамічнага развіцця: рэнтабельнасць продажаў у прамысловасці, экспарт тавараў і паслуг, суадносіны экспарту тавараў і аб'ёму прамысловай вытворчасці.
Найважнейшае пытанне — павышэнне эфектыўнасці кіравання дзяржпрадпрыемствамі. Зрабіць гэта трэба праз павышэнне матывацыі менеджараў, праз прызначэнне ў гаспадарчыя таварыствы прафесійных кіраўнікоў-прадстаўнікоў дзяржавы.
Структурнае рэфармаванне прадпрыемстваў, падпарадкаваных міністэрствам і канцэрнам будзе ўключаць у сябе таксама перадачу іх невытворчых аб'ектаў адпаведным профільным міністэрствам, вывад на аўтсорсінг дапаможных і абслуговых функцый, укараненне сістэм кіравання рэсурсамі і забеспячэнне за кошт гэтага зніжэння выдаткаў і аптымізацыі колькасці персаналу.
— Якім чынам можна змяніць матывацыю менеджараў дзяржкампаній?
— У сучасных умовах самы дзейсны рычаг для гэтага — фінансавая зацікаўленасць менеджара ў павышэнні эфектыўнасці работы арганізацыі. Памер акладу, бонусы, гадавыя бонусы — усё гэта цяпер у распараджэнні органа, які наймае кіраўніка дзяржкампаніі. Адпаведныя пастановы ўрада былі прыняты ў 2013 годзе. Кіраўніку могуць выплачваць працэнт ад выручкі, напрыклад, за зніжэнне запасаў. Або працэнт ад сумы заключанай знешнеэканамічнай здзелкі, калі ён сам прымаў у арганізацыі гэтай здзелкі актыўны ўдзел. Са снежня мінулага года з'явілася магчымасць стымуляваць менеджара дзяржаўнай кампаніі за стварэнне дадатковых высокапрадукцыйных працоўных месцаў. Іншымі словамі, створаны гнуткі і прадуманы механізм фінансавай матывацыі кіраўнікоў дзяржаўных прадпрыемстваў. Гэты механізм закліканы арыентаваць іх на прырост прыбытку. Таму што менавіта прыбытак, а не крэдыты — крыніца для інвестыцый і, адпаведна, — развіцця.
— Наколькі верагодна выкананне запланаванай прыватызацыі на 2,5 млрд долараў? Як дзяржава будзе вызначаць, якому інвестару аддаць перавагу падчас прыватызацыі?
— Прыватызацыя — не самамэта. Дзяржаўная палітыка будуецца не на атрыманні кароткатэрміновай выгады ад продажу дзяржмаёмасці, а на перспектывах развіцця прадпрыемства, стварэння экспартаарыентаванай канкурэнтаздольнай вытворчасці, асваення новых рынкаў, выканання пэўных сацыяльных гарантый. З улікам гэтых падыходаў любое беларускае прадпрыемства можа быць прыватызавана. Прымаюцца пэўныя захады па спрашчэнні гэтага працэсу.
Сёння на сайце Дзяржкаммаёмасці выкладзены пералік з 600 аб'ектаў, прапанаваных для продажу інвестарам. Для 92 прадпрыемстваў (агульны кошт якіх перавышае 5 млрд долараў) вызначаны спосабы адчужэння. У гэтым спісе дзярждолі ў кампаніях «МТС», «БАТЭ — кіруючая кампанія холдынга «Аўтакампаненты», «Мазырскі НПЗ», «Кіруючая кампанія холдынга «Гарызонт» і іншыя.
Парадак выбару інвестараў максімальна празрысты і залежыць ад спосабу продажу. Калі гэта аўкцыён — перавага аддаецца інвестару, які прапанаваў найбольш высокую цану, пры продажы па конкурсе — інвестару, які прапанаваў умовы, якія адпавядаюць умовам конкурсу або лепшыя. У асобных выпадках, калі ёсць неабходнасць прыцягнення стратэгічнага інвестара, яго выбар ажыццяўляецца на аснове комплексу крытэрыяў у залежнасці ад профілю і віду дзейнасці прадпрыемства, яго патрэб у інвестыцыях, ад памеру гэтых інвестыцый, неабходнасці выканання асобных сацыяльных абавязацельстваў.
Неабходна асабліва адзначыць, што тым інвестарам, хто працуе адкрыта, выконвае патрабаванні беларускага заканадаўства і ўзятыя на сябе абавязацельствы, дзяржава гарантуе незваротнасць прыватызацыі і стварэнне спрыяльных умоў для работы арганізацый незалежна ад формы ўласнасці.
— Якую перспектыву вы бачыце ў размяшчэнні еўрабондаў?
— Сёлета (гэта будзе прыкладна канец вясны — пачатак восені) урад сапраўды мае намер выйсці на рынак з трэцім выпускам еўрааблігацый на суму каля
800 млн долараў ЗША. Гэтыя сродкі запланаваны ў бюджэце для рэфінансавання часткі плацяжоў па пагашэнні знешняга дзярждоўгу, якія ў 2014 годзе складуць 2,4 млрд долараў. Ужо вызначаны арганізатары планаванага выпуску еўрабондаў — гэта расійскія інвестыцыйныя кампаніі «Ашчадбанк КІБ» і «ВТБ Капітал». На якіх біржах еўрааблігацыі будуць размешчаны, вырашыцца пазней.
У апошнія месяцы назіраецца паляпшэнне каціровак беларускіх еўрааблігацый, размешчаных у 2010 і 2011 гадах. Па інфармацыі фінансавага агенцтва Bloomberg, даходнасць па еўрабондах першага выпуску складае цяпер 7,098%, другога выпуску — 8,062%, гэта значыць, ніжэй за іх купонны даход (8,5% і 8,9% адпаведна). Пры размяшчэнні новых еўрааблігацый мы будзем імкнуцца да таго, каб захаваць сённяшнія ўмовы.
— Наколькі верагодна адкрыццё новай праграмы з МВФ? На якім этапе знаходзяцца перамовы?
— У нашай краіны ёсць жаданне падпісання новай праграмы супрацоўніцтва з МВФ. Для гэтага існуюць як непасрэдна фінансавыя прычыны, так і прычыны больш глыбокага, структурнага характару. З пункту гледжання грошай, прыцягненне танных рэсурсаў у краіну для рэфінансавання часткі дзяржаўнага доўгу з'яўляецца правільнай стратэгіяй, і гэта станоўча адаб'ецца на эканоміцы, паколькі не прыйдзецца адцягваць частку сродкаў на абслугоўванне доўгу. Калі казаць пра структурную карысць праграмы з Фондам, то тут важнасць заключаецца ў правільна выбудаванай праграме структурных рэформаў на аснове вопыту вядучых сусветных экспертаў. Рэалізацыя праграмы дасць магчымасць вызваліць старыя і сфарміраваць новыя фактары вытворчасці.
Што тычыцца перспектыў гэтай праграмы, то на апошнім пасяджэнні пазіцыя беларускага боку аб магчымасці заключэння новай праграмы з Фондам была агучана. Дырэктары МВФ прывіталі прыняцце плана сумесных дзеянняў урада і Нацбанка і выказалі наступную пазіцыю: падтрымка новай дамоўленасці з Фондам будзе залежаць ад прыхільнасці Рэспублікі Беларусь да правядзення рэформаў у спалучэнні з рашучай макраэканамічнай палітыкай.
— Некаторыя аналітыкі выказваюць меркаванне пра тое, што ў нас вельмі шмат дзяржаўных праграм. Яны перакрыжоўваюцца і ў выніку не даюць належнага эфекту. Зменіцца што-небудзь у бліжэйшы час?
— Так, мы актыўна працуем у кірунку аптымізацыі дзяржаўных праграм і ўдасканалення механізму іх фінансавання. У гэтай працы ўдзельнічае Мінэканомікі сумесна з Міністэрствам фінансаў, Нацыянальным банкам і галіновымі міністэрствамі. Будуць сістэматызаваны крытэрыі аднясення праектаў да дзяржпраграм, сфарміравана сістэма ацэнкі іх эфектыўнасці і на стадыі прыняцця, і на стадыі рэалізацыі. Сёлета запланавана прыняцце плана фінансавання дзяржпраграм, увязанага па аб'ёмах і крыніцах, а таксама сістэмы кантролю за яго выкананнем.
— Ці варта чакаць скарачэнняў у сувязі з мадэрнізацыяй і аптымізацыяй вытворчасці? Ці з'явяцца новыя вытворчасці, куды людзі змогуць пайсці працаваць у выпадку страты працы?
— У адпаведнасці з прагнозам сацыяльна-эканамічнага развіцця Рэспублікі Беларусь на 2014 год колькасць занятых у эканоміцы скароціцца на 153 тыс. чалавек, або на 3,4%. Прыкладна напалову гэта абумоўлена ўплывам дэмаграфічнага фактару — скарачэннем колькасці насельніцтва ў працаздольным узросце. У выніку мадэрнізацыі чакаецца вызваленне каля 70 тыс. чалавек.
Ва ўмовах структурных пераўтварэнняў эканомікі вызваленне працоўнай сілы непазбежна. Гэта патрабуе яе ператоку ў іншыя віды эканамічнай дзейнасці, дзе ёсць вакансіі. А яны ў нас ёсць. На 1 студзеня 2014 года па краіне налічвалася каля 50 тысяч свабодных месцаў і толькі 20 тысяч зарэгістраваных суіскальнікаў.
Але, акрамя гэтага, у адпаведнасці з пастановай урада ад 13 студзеня 2014 г. № 17, у рэгіёнах будуць прыняты вычарпальныя захады: старшыні аблвыканкамаў павінны забяспечыць у 2014 годзе стварэнне ў кожным раёне вытворчых арганізацый з колькасцю работнікаў не менш за 15 чалавек (з разліку адна такая арганізацыя на 10 тыс. жыхароў раёна). Усё гэта дасць магчымасць захаваць сёлетні ўзровень беспрацоўя, — 1,5%, не больш.
— Што ўяўляе сабой рэйтынг Doіng Busіness? Ці неабходна нашай краіне імкнуцца патрапіць у яго?
— Справаздача Сусветнага банка «Вядзенне бізнесу» ўяўляе сабой серыю штогадовых дакладаў, у якіх даследуюцца заканадаўчыя нормы рэгулявання прадпрымальніцкай дзейнасці: як тыя, што спрыяюць, так і тыя, што перашкаджаюць развіццю бізнесу. І практыка іх прымянення. Падчас даследаванняў ацэньваецца не столькі колькасць нормаў і правілаў, колькі іх разумнасць і справядлівасць, а таксама прастата адміністравання гэтых працэсаў самімі бізнесменамі. У дакладзе Сусветнага банка «Вядзенне бізнесу 2014» наша краіна заняла 63-е месца сярод 189 дзяржаў. Пры гэтым Беларусь чацвёрты год запар уваходзіць у тройку лідараў сярод 50 краін свету — пастаянных удзельнікаў даследавання, якія дабіліся найбуйнейшых поспехаў у стварэнні больш спрыяльнага рэгулятыўнага асяроддзя для айчынных прадпрымальнікаў, пачынаючы з 2005 года. З 2010 года экспертамі Сусветнага банка для Рэспублікі Беларусь зафіксавана 13 станоўчых рэформаў, адпаведных метадалогіі даследавання «Вядзенне бізнесу».
Навошта нам трэба ўдзельнічаць у гэтых даследаваннях? Па-першае, для дзяржаўных органаў вынікі даследавання з'яўляюцца важным індыкатарам таго, як бізнес успрымае рэгулятыўнае асяроддзе і якія праводзяцца пераўтварэнні. Па-другое, гэты рэйтынг служыць аўтарытэтнай крыніцай інфармацыі для замежных урадаў і бізнесу, для інвестараў. Акрамя таго, вышэйназваныя справаздачы дазваляюць прааналізаваць вопыт развіцця іншых дзяржаў, ацаніць магчымасць яго ўжывання ў нашых умовах. Цікавыя і рэкамендацыі міжнародных арганізацый. Урад мае намер і далей праводзіць рэформы ва ўсіх сферах прадпрымальніцкай дзейнасці з улікам рэкамендацый Сусветнага банка і станоўчага вопыту замежных краін. У нас зацверджаны план дзеянняў па паляпшэнні ўмоў вядзення бізнесу. Яго рэалізацыя дазволіць забяспечыць рэйтынг Рэспублікі Беларусь у справаздачы Сусветнага банка не ніжэй за трыццатую пазіцыю.
Гутарыў Уладзіслаў КУЛЕЦКІ.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.