Лютаўскі нумар «Маладосці» — цалкам лагічны пасля «міжнароднага выхаду» працяг гісторыі пра тое, як моладзевае літаратурнае выданне можа, развіваючыся, пераўвасабляцца і, пераўвасабляючыся, заваёўваць новыя прасторы. Задача прысвяціць цэлы нумар студэнцкаму конкурсу «БрамаМар» — своесаблівы challenge самім сабе — здаецца, мае ўжо сваё рашэнне-вынік.
На першых старонках лютаўскага нумара можна будзе прачытаць, навошта яны патрэбны ўвогуле — літаратурныя конкурсы рознага кшталту, маштабаў і вартасцяў. «Той, хто прыкладае руку да пяра, няхай паразважае, на які шлях ён хоча ступіць і ў якім небяспечным катле яму калісьці прыйдзецца замешваць!» — папярэджваюць удзельнікі «Апытанкі». Перагарнуўшы яе, не прамініце пацікавіцца, як, у прыватнасці, стварыць літаратурны конкурс хаця б студэнцкага ўзроўню. «Калі ваша канцэпцыя адметная і арыгінальная, вы не маеце канкурэнтаў», — адзначаюць арганізатары «БрамаМар», спасылаючыся на... тры скарыначкі хлеба. «Усеагульнае здзіўленне выклікае сцвярджэнне пра тое, што паэт — гэта мышка і нуль», — напісана ў «Брамамарэзіі». Такія вось, між іншым, назвы ў артыкулаў. І каб жа гэта было адзінае, што здзівіць чытача. У нумары — не толькі конкурсныя творы ў шасці намінацыях (проза, паэзія, крытыка, пераклад, драматургія, дзіцячая літаратура і дзве намінацыі «БрамМар-юні» ў «Бярозцы»), але і процьма парад і рэкамендацый, напісаных удзельнікамі і арганізатарамі, студэнтамі і выкладчыкамі. Чытаць іх часам весела, месцамі карысна, у цэлым — неверагодна цікава. Пераможцам у намінацыі «Паэзія» журы прызнала ўдзельніка з імем Андрусь Bezdar. Паводле меркавання рэдакцыі, лепшы твор у намінацыі «Проза» даслала нам Кася Глухоўская. Яе «Спеў адной перліны» друкуецца ў лютаўскай «Маладосці» без скарачэнняў і чакае чытача маладога і ўдумлівага. Шчаслівы ён ці не вельмі — пасля прачытання твора гэта будзе ўжо не так важна, бо яго гераіня, па словах аўтаркі, «ніколі і ні ў чым не бачыць непапраўнай трагедыі».
У часопісе, які падпарадкуецца патрабаванням сучаснасці, змешчаны, як і планавалася, не толькі творы пераможцаў, але і лепшае з «маркетынгавага» пункту гледжання. А гэта значыць, прапановы задаволяць любы густ.
Сярэдні ўзрост большасці аўтараў твораў — да дваццаці. «Дваццаткі не хопіць на рандэву — так, кавы папіць і пагрэцца». Гэта ў Алісы Мінінай, «Паэзія», трэцяе месца. «У дваццаць — хадзіць толькі па краях сваіх і чужых памылак», — працягвае яна ж тэму дваццаткі. Дазволім? «У дваццаць — згубіць і зноў адшукаць свой асабісты востраў». Пагодзімся? Калі так, то просім гартаць «Маладосць» — лепшыя старонкі з жыцця літаратуры.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».