У Беларусі шукаюць новую «міс». А таксама «місіс» і «містара»
Кастынгі ажно трох конкурсаў прыгажосці адбудуцца ў Мінску на гэтым тыдні. 14, 15 і 16 лютага з 10 да 18 гадзін у Нацыянальнай школе прыгажосці арганізатары чакаюць усіх ахвотных паказаць сябе і прадэманстраваць разнастайныя таленты ў барацьбе за тытулы «Міс Беларусь», «Містар Беларусь» і «Місіс Беларусь». Усе тры маштабныя праекты ладзіць тэлеканал АНТ.
11-18
Нацыянальны конкурс прыгажосці «Міс Беларусь» праходзіць у нашай краіне з 1998 года і праводзіцца адзін раз на 2 гады. Пераможцамі яго ў розны час былі прадстаўніцы Гродзеншчыны (Святлана Крук, 1998, і Людміла Якімовіч, 2010), Магілёўшчыны (Ганна Стычынская, 2000, і Кацярына Літвінава, 2006), Брэстчыны (Вольга Неўдах, 2002, і Юлія Скалковіч, 2012), Віцебшчыны (Вольга Антропава, Полацк, 2004, і Вольга Хіжынкова, 2008). З 2008 года арганізацыю і правядзенне конкурсу ўзяў на сябе тэлеканал АНТ, для якога гэты праект стаў ужо адметнай візітоўкай і адным з самых яркіх тэлешоу.
Сёлетні адбор самых прыгожых дзяўчат краіны мае свае асаблівасці — так, не будзе папярэдніх кастынгаў у абласных і раённых цэнтрах, толькі ў сталіцы. Затое доўжыцца гэты этап будзе 3 дні. Патрабаванні да прэтэндэнтак практычна не змяніліся: узрост ад 18 да 24 год, рост не ніжэй за 175 см, грамадзянства Рэспублікі Беларусь і пастаяннае пражыванне на тэрыторыі краіны, адсутнасць дзяцей і шлюбных зносін. Праўда, на сайце тэлеканала ў анкеце для ўдзельніц усё ж стаяць пытанні «Сямейнае становішча, колькі год у шлюбе» і «Інфармацыя аб наяўнасці дзяцей» — але гэта, хутчэй, недагляд, чым фактычная памылка. На кастынг дзяўчатам трэба будзе прыхапіць пашпарт, туфлі на высокіх абцасах, купальнік і гумку для валасоў. А вось дэкаратыўную касметыку давядзецца змыць, нагадваюць арганізатары.
Дарэчы, пасля леташняга скандалу з конкурсам «Міс Мінск» публіка з асаблівай увагай ставіцца да ўдзельніц турніраў прыгажосці, а дакладней — да іх маральнага аблічча і паводзін. Таму ўсе вядучыя абласныя мадэльныя агенцтвы і студыі, якія папярэдне распаўсюджваюць інфармацыю пра адбор, падкрэсліваюць: асобы, якія маюць дачыненне да фота і відэаматэрыялаў эратычнага ці парнаграфічнага характару, могуць нават не разлічваць на ўдзел у нацыянальным конкурсе прыгажосці. «Насамрэч гэтыя ўмовы выконваюцца з самага першага года існавання конкурсу, проста раней яны не афішаваліся так шырока, — адзначае дырэктар дырэкцыі спецпраектаў АНТ Анжэліна Мікульская. — Мы вельмі ўважліва і ўсебакова падыходзім да адбору, шукаючы не толькі прыгожую вонкавую абалонку, але і ўнутраную прыгажосць, сілу і чысціню. І дзяўчаты, якія ўдзельнічалі ў «Міс Беларусь», ніколі не аскандальваліся падобным чынам».
Па традыцыі, новая «Міс Беларусь» атрымае права прадстаўляць нашу краіну на бліжэйшым конкурсе «Міс свету», а таксама будзе ўдзельнічаць у шэрагу культурных і дабрачынных акцый як у Беларусі, так і за межамі краіны. Да таго ж удзел у конкурсе для многіх дзяўчат становіцца важнай прыступкай у жыцці і кар'еры. Напрыклад, «Міс Беларусь-2008» Вольга Хіжынкова пасля перамогі пераехала ў Мінск, стала тварам некаторых вядомых айчынных вытворцаў, абрала прафесію журналіста і пэўны час працавала прэс-сакратаром АНТ, а «Міс Беларусь-2010» Людміла Якімовіч, нягледзячы на статус замужняй жанчыны, надзвычай паспяхова працягвае кар'еру мадэлі ў Маямі і займаецца творчасцю ва ўласным музычным гурце.
Конкурс «Місіс Беларусь»,
размовы аб якім ішлі даволі даўно, афіцыйна адбудзецца ўпершыню. Да ўдзелу ў ім запрашаюцца не толькі прыгожыя, але і актыўныя, адукаваныя і мэтанакіраваныя жанчыны ва ўзросце ад 18 гадоў, грамадзянкі Рэспублікі Беларусь, якія маюць сям'ю і дзяцей. Верхняй узроставай планкі ў гэтым конкурсе няма.
— Але мы добра разумеем, што, напрыклад, 30- і 65-гадовыя жанчыны — гэта зусім розны кантынгент, таму структуру шоу пабудуем у залежнасці ад колькасці заявак, — тлумачыць Анжэліна Мікульская. — Цяпер цікавасць да конкурсу вельмі вялікая, шмат званкоў і пытанняў. І калі мы будзем бачыць, што набіраецца нямала ўдзельніц у розных узроставых катэгорыях, то падзелім іх на групы, каб спаборніцтва было роўным.
Насуперак распаўсюджанаму стэрэатыпу, быццам беларускія мужчыны — сціплыя, стрыманыя і часам нясмелыя, цікавасць да першага рэспубліканскага конкурсу «Містар Беларусь» таксама вялікая. Прэтэндэнтам на гэта званне можа стаць кожны прывабны, харызматычны і ўпэўнены ў сабе мужчына ў самым росквіце сіл (паводле ўмоў адбору, гэты росквіт абмяжоўваецца 18—30 гадамі), ростам не ніжэй за 180 см, грамадзянін Рэспублікі Беларусь. Гэты конкурс арганізатары хочуць зрабіць адрозным ад аналагічных шоу ў іншых краінах свету, з улікам беларускага менталітэту. А значыць, не столькі абіраць найпершага прыгажуна сярод мужчын мадэльнай знешнасці (а то і прафесійных мадэляў), колькі даць магчымасць удзельнікам прадэманстраваць найлепшыя мужчынскія якасці — розум і дасціпнасць, сілу і стрыманасць, і г.д. — тут кожны можа самастойна дапісаць патрабаванні да эталону мужчыны.
У мужчынскай анкеце ёсць пытанні пра сям'ю і дзяцей, але ніякіх забарон наконт наяўнасці штампу ў пашпарце не прапісана.
Таксама ў прэтэндэнтаў, як, зрэшты, і ва ўдзельніц «Міс Беларусь» і «Місіс Беларусь», абавязкова пацікавяцца здольнасцямі і талентамі, наяўнасцю або адсутнасцю хранічных хвароб, стаўленнем да спорту, веданнем замежнай мовы і наяўнасцю кантрактаў або дагавораў, якія абмяжоўвалі б іх удзел у конкурсах прыгажосці. Далей жа ўсё залежыць ад саміх удзельнікаў — наколькі яны здолеюць здзівіць і запомніцца, раскрыць сілу свайго характару і розуму.
...Пасля правядзення кастынгу ўсе адабраныя шчасліўцы і шчасліўкі прыступяць да падрыхтоўкі, а спецыяльныя дзённікі конкурсаў у эфіры АНТ больш падрабязна распавядуць гледачам пра ўсе этапы падрыхтоўкі і пра саміх удзельнікаў. Фінішуюць усе тры маштабныя шоу, як мяркуецца, на пачатку мая, да пачатку чэмпіянату свету па хакеі-2014, каб не змешваць гэтыя падзеі і не адцягваць глядацкай увагі.
Вікторыя ЦЕЛЯШУК
11-17
Да слова
На конкурс «Містар свету» Беларусь упершыню выставіла ўдзельніка ў 2010 го-
дзе — ім стаў Міхаіл Баранаў (на фота), мадэль Нацыянальнай школы прыгажосці. Праўда, у фінал турніру прыгажосці сярод мужчын беларус не трапіў.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».