У традыцыйным спартыўным аглядзе «Звязда» пакінула за дужкамі медальныя разборкі ў Сочы і прыгадала, як на мінулым тыдні выступалі прадстаўнікі гульнявых відаў спорту.
1. Беларускія хакеісты бясслаўна вяртаюцца дадому з міжнароднага турніру ў Гданьску. У падапечных Глена Хэнлана атрымалася зарабіць толькі тры ачкі дзякуючы перамозе над венграмі. А затым беларуская дружына ўпершыню ў сваёй гісторыі саступіла італьянцам і палякам, якія, дарэчы, выступаюць у трэцім дывізіёне сусветнага хакея. Прычым паражэнне ад заходніх суседзяў бянтэжыць: да трэцяга перыяду наша зборная вяла 2:0, але за апошнія 20 хвілін прапусціла ажно чатыры шайбы. У выніку беларусы, якія да старту матчаў Еўрачэленджа лічыліся безумоўнымі фаварытамі, занялі толькі трэцяе месца. Тым не менш галоўны трэнер нацыянальнай зборнай Глен Хэнлан не спяшаецца падымаць трывогу: «На турніры мы паляпшалі сваю гульню ад матча да матча, і першыя два перыяды з палякамі былі найлепшымі ў Гданьску. А потым сапернікі сталі дзейнічаць больш актыўна... гэтая перамога для іх была больш цэннай. Безумоўна, я незадаволены не самай якаснай гульнёй сваіх хлопцаў, але гэты вынік не прымушае мяне панікаваць адносна перспектыў зборнай на хатнім чэмпіянаце свету. Зразумела, што ў Мінску стаўка будзе рабіцца на іншых хакеістаў. А многія з тых, хто выступаў у Польшчы, былі запрошаны для перспектывы: іх час прыйдзе праз два-тры гады. І вось адносна гэтай перспектывы сапраўды ёсць над чым задумацца і за што турбавацца».
2. У восьмым туры гандбольнай Лігі чэмпіёнаў мінскае «Дынама»
на выездзе сустракалася з македонскім «Варадарам». На жаль, падапечныя Барыса Дзеніча саступілі балканцам з лікам 22:30 і страцілі ўсе шанцы на выхад у плэй-оф. Між іншым, настаўнік «бела-сініх» адзначыў, што ў яго гандбалістаў былі відавочныя праблемы з рэалізацыяй, а таксама паскардзіўся на судзейства. «На нашых атаках рэферы надта хутка падымалі рукі, сігналізуючы аб пасіўнай гульні. Разам з тым, гандбалісты «Вардара» маглі атакаваць ледзьве не па цэлай хвіліне. У такой сітуацыі, калі каманда вымушана атакаваць вельмі хутка і шмат часу праводзіць у абароне, рытм гульні істотна запавольваецца і гэта выклікае праблемы», — рэзюмаваў Барыс Дзеніч. У нядзелю «Дынама» згуляе з македонскім «Металургам». Ужо на нашай тэрыторыі...
3. Рубеж плэй-оф не скарыўся і беларускім тэнісісткам. У матчах першай Еўра-Афрыканскай зоны Кубка федэрацыі нашы спартсменкі атрымалі тры ўпэўненыя перамогі — над турчанкамі, партугалкамі і балгаркамі, з дзевяці сустрэч саступіўшы толькі адну парную! Але ў матчы за выхад у плэй-оф другой Сусветнай групы прайгралі прадстаўніцам Галандыі. Спачатку Аляксандра Сасновіч саступіла Рышэль Хагенкамп, а затым Вольга Гаварцова не здолела перамагчы Кікі Бертэнс. У наступным сезоне беларускія тэнісісткі зноў пачнуць матчы Кубка федэрацыі з першай Еўра-Афрыканскай зоны.
4. Не склаўся вырашальны матч і для Вікторыі Паўловіч. У фінале Кубка Еўропы па настольным тэнісе беларуска ў шасці напружаных партыях саступіла аўстрыйскай спартсменцы кітайскага паходжання Лю Цзя.
Няма спорту без паражэнняў. Будзем спадзявацца, што сваю чорную паласу беларускія спартсмены ўжо прайшлі і наперадзе нас чакаюць толькі прыемныя навіны.
Дарына ЗАПОЛЬСКАЯ
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.