Цягам года цэны на газ могуць індэксавацца пры ўмове росту заработнай платы. Пры гэтым памер павышэння цэн не павінен перавышаць тэмпаў росту заробку за мінулы квартал. Пра гэта паведаміў генеральны дырэктар ДВА «Белпалівагаз» Леанід РУДЗІНСКІ падчас анлайн-канферэнцыі на сайце БелТА.
Колькі давядзецца плаціць?
У адпаведнасці з пастановай урада павышэнне кошту на газ ужо адбылося сёлета з 1 студзеня. Для абанентаў, у якіх усталяваныя толькі газавая пліта або газавая пліта і газавы воданагравальнік, цана павялічылася на 30%. Калі ў спажыўца ўсталяваны газавыя лічыльнікі, плаціць за паліва давядзецца ў сярэднім на 2 500 рублёў болей. Калі прыборы ўліку расходу газу адсутнічаюць, то пераплата будзе дасягаць каля 10 500 рублёў за месяц. А для абанентаў, у якіх усталяваны газавыя ацяпляльныя катлы, тарыф на газ у ацяпляльны перыяд падняўся на 18,4%. Для гэтай катэгорыі насельніцтва сума аплаты павялічыцца на 50 тысяч рублёў за месяц.
А ў нас у доме газ.А ў вас?
Зараз такая выгода, як прыродны газ, прыходзіць у сельскую мясцовасць. Як займець яе ў сваім доме?
Для таго, каб правесці газ да свайго прыватнага дома, трэба высветліць наяўнасць побач з ім вулічнага размеркавальнага газаправода. Калі ён ёсць, то трэба звярнуцца ў мясцовы выканкам з заявай на газіфікацыю жылога дома, а таксама з дакументамі, якія пацвярджаюць права ўласнасці на дом. Выканкам прымае рашэнне і самастойна цягам 10 дзён запытвае тэхнічныя ўмовы ў газазабяспечвальнай арганізацыі. Паводле іх праектуецца і будуецца ўнутрыдамовая сістэма газазабеспячэння.
У выпадку, калі газаправода на вуліцы няма, то яго неабходна правесці, але гэта вельмі дорага для адной-дзвюх сем'яў. Таму для скарачэння затрат грамадзяне могуць аб'ядноўвацца ў кааператывы. Кошт газіфікацыі жылога дома залежыць ад таго, якія аб'екты газаразмеркавальнай сістэмы неабходна будзе пабудаваць. Калі газаправод-увод да дома падведзены, то з улікам кошту матэрыялаў на бягучы момант і неабходнасці мантажу газапровада даўжынёй 20 м праектаванне і будаўніцтва складзе каля 7–8 млн рублёў.
Незаконная ўрэзка не пройдзе
Для таго, каб у вёсцы падключыць дом да газаправода, які пабудаваў кааператыў, у якім вы дагэтуль не значыліся, таксама неабходна звярнуцца з заявай у гарадскі ці раённы выканкам. Ён запытае тэхнічныя ўмовы на газіфікацыю ў газазабяспечвальнай арганізацыі, якая і вызначыць магчымасць падключэння новага спажыўца да дзейнай сістэмы. Урэзка ў вулічныя размеркавальныя газаправоды праводзіцца толькі самой арганізацыяй. Несанкцыянаванае далучэнне да газаправода выкрываецца цягам месяца падчас абходу пры яго тэхнічным абслугоўванні.
Пры аказанні комплекснай паслугі газіфікацыі аднакватэрнага жылога дома і наяўнасці газаправода-ўводу ўсе работы выконваюцца цягам месяца з моманту падачы заявы ў выканкам. Пры гэтым уласнік павінен падрыхтаваць дом: завяршыць рамонтныя работы, а таксама работы па абсталяванні дымавых і вентыляцыйных каналаў і г. д. Але канкрэтныя тэрміны вызначаюцца паводле праектна-каштарыснай дакументацыі. Трэба ўлічваць, што рэгламентаваць усе прыватныя выпадкі і сітуацыі падчас правядзення газавых работ немагчыма.
Бяспека — перадусім
Прыродны газ даступны не ўсім вяскоўцам, таму праблема бяспечнага абыходжання з газавымі балонамі застаецца актуальнай.
Магчыма і самастойна атрымліваць газавыя балоны, і падключаць іх да пліты, а таксама мець некалькі балонаў з газам пра запас. Але для таго, каб атрымліваць іх у філіялах газазабяспечвальнай арганізацыі, на газанапаўняльных ці аўтазаправачных станцыях, а таксама для самастойнай дастаўкі і замены балонаў ёмістасцю 50 і 27 літраў, неабходна мець допуск. Для балонаў 12 і 5 літраў ён не патрабуецца. Для атрымання допуску трэба звярнуцца ў філіял газазабяспечвальнай арганізацыі па месцы жыхарства з пашпартам і дагаворам — тэхпашпартам індывідуальнай балоннай устаноўкі ІБУ. Паколькі звадкаваны газ — выбухова- і пажаранебяспечнае рэчыва, захоўваць яго можна толькі ў спецыялізаваных складах. Звычайнаму карыстальніку рэкамендавана зманціраваць газабалонную ўстаноўку з двума балонамі.
Выбар на карысць экалагічнасці
У Беларусі звадкаваны вуглявадародны газ шырока выкарыстоўваецца ў якасці аўтамабільнага паліва. Гэта больш экалагічна і эканамічна ў параўнанні з бензінам і дызпалівам. Каб прыстасаваць свой аўтамабіль пад газавае паліва, можна звярнуцца на спецыялізаваную станцыю, а таксама на Навагрудскі завод газавай апаратуры, які выпускае айчыннае абсталяванне для пераводу машын на звадкаваны газ.
З трубы — на разетку
Хтосьці імкнецца правесці газ у сваё жыллё, а нехта адмаўляецца ад яго на карысць электраэнергіі. І замяніць газавую пліту электрычнай магчыма. Для гэтага неабходна мець тэхнічную магчымасць падачы электрычнасці на пліту неабходных памераў. Гэтыя пытанні трэба вырашаць з электразабяспечвальнымі арганізацыямі, а ў выпадку шматкватэрнага жыллёвага фонду неабходна звярнуцца ў камунальныя службы. Калі дазвол на ўсталяванне электрапліты будзе атрыманы, варта звярнуцца ў газазабяспечвальную арганізацыю для дэмантажу газаправода і скасавання дагавора на газавае абслугоўванне.
Падрыхтавала Дзіяна СЕРАДЗЮК.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!