Ала Цупер і Дар'я Домрачава, выступаючы ў розных відах алімпійскай праграмы пад адным нумарам 13, дабіліся аднолькавага — «залатога» — выніку. Вось і вер пасля гэтага ў прыкметы...
У пятніцу беларускія журналісты стаялі перад выбарам: прыкладна ў адзін і той жа час (з невялікім зусім інтэрвалам) — два старты. «Індывідуалка» ў жаночым біятлоне, дзе зноў былі надзеі на Дашу і кампанію, і фрыстайл, жаночая акрабатыка. Тут спадзяванняў практычна не было. Таму большасць рэпарцёраў накіраваліся да больш блізкага і ўтульнага біятлоннага стадыёна «Лаура». Карэспандэнт «Звязды» пайшоў іншай дарогай. У экстрым-парк «Ружа Хутар», размешчаны значна вышэй — на вышыні 1530 метраў. І правёў там 9 гадзін, ні хвіліны не пашкадаваўшы, што выбраў фрыстайл...
Падрабязнасці вы ўжо ведаеце. Скажу толькі, што гэта былі драматычныя спаборніцтвы. Наша Ганна Гуськова ў фінал не трапіла. А Ала Цупер толькі пасля другога фіналу, заняўшы апошняе, шостае, месца, якое давала права працягваць барацьбу за медаль, уздыхнула больш-менш спакойна. Хоць у той момант яна давала мне каментарый у мікст-зоне, усё яшчэ трывожна паглядваючы на табло: працягваліся выступленні, і саперніцы ў любы момант маглі адсунуць яе далей. І тады ўсё — бывай, Алімпіяда. Не адсунулі. Паспела ўскочыць у апошні вагон, замкнуўшы чацвёрку наймацнейшых, усяго на 0,03 бала апярэдзіўшы кітаянку Сінь Чжан.
А ў фінале, стартаваўшы першай, яна адразу ж усім паказала, хто тут прыехаў турыстам.
Думаю, вышэйшыя сілы вярнулі ёй усё, што павінны былі. Гэта была пятая па ліку Алімпіяда Алы. Пасля 5-га месца ў Нагана ў 1998-м (яшчэ пад украінскім сцягам) вышэй яна не ўздымалася. Ні ў Солт-Лэйк-Сіці (10-я), ні ў Турыне (9-я), ні ў Ванкуверы (8-я) не шанцавала. Былі, вядома, і перамогі — на этапах Кубка свету, на розных спаборніцтвах ніжэйшага рангу. Але ўсё гэта не тое. Кожны спартсмен жыве дзеля Алімпіяды.
А на Цупер ужо было «паставілі крыж». У 2012-м яна пакінула вялікі спорт — пасля цяжкіх траўмаў, пасля вялікай стомленасці вырашыла прысвяціць сябе сям'і. Нарадзіла дачку, гадавала яе, ездзіла на рыбалку, хадзіла ў кіно...
Яе папрасілі вярнуцца за год да сочынскіх падзей. Не было каму ехаць на фрыстайл — дысцыпліну, якая заўсёды была ў нас у пашане. І яна паслухалася Мікалая Іванавіча Казеку — галоўнага трэнера зборнай. І мужа Жэню, які верыў у яе больш чым хто.
У Сочы яна стала самай узроставай сярод спартсменак-фрыстайлістак, уключаючы ўсе яго дысцыпліны (могул, слоўпстайл, хафпайп і скі-крос), якія калі-небудзь выступалі на «белых» Алімпіядах.
Вось першыя яе словы ў рангу алімпійскай чэмпіёнкі:
— Ці чакала я такога выніку? Я адказала б так: імкнулася з усіх сіл. Перад апошнім скачком старалася ні пра што не думаць. Проста абстрагавалася ад усяго, што было вакол, думала толькі пра скачок. Медаль хачу прысвяціць усім, хто верыў у мяне, — усёй Беларусі, усім родным і блізкім.
З перамогай мы павіншавалі таксама Мікалая Іванавіча Казеку, чалавека, які, па-сутнасці, зрабіў з Цупер чэмпіёнку.
— Чакаў гэтага поспеху ад Алы тры доўгія Алімпіяды. У чым сёння яе сакрэт? Пра яе проста забыліся, ніхто не лічыў яе за фаварыта. Яна ж толькі-толькі вярнулася ў вялікі спорт, і ў яе ўсё было разлічана на адзін старт — на Алімпіяду. Таму яна не была напружанай ці скаванай, магла рыхтавацца спакойна, думаць толькі пра сваё выступленне, а не азірацца на кагосьці. Таму і атрымалася так цудоўна. Мы спадзяваліся, што да Алімпіяды яна наблізіцца да сваіх лепшых кандыцый. На справе ж выйшла так, што Ала паспрабавала выканаць новы скачок, дзякуючы якому і выйграла. Скачок, які прынёс алімпійскае золата Але, яна выконвала толькі другі раз у жыцці, а першы — за дзень да таго, на трэніроўцы. Трэба прызнаць, што кітаянка Сю выканала тэхнічна больш складаны скачок, але, прызямляючыся, дакранулася рукой да схіла, а за гэта здымаюцца балы.
— Што вы можаце сказаць пра якасць скачкоў Алы ў цэлым?
— У такой напружанай барацьбе спадзявацца толькі на якасць выканання скачкоў было немагчыма. Вось уявім сабе, што такія спартсменкі, як сённяшнія прызёры, — кітаянка Ментао Сю ці, аўстралійка Лідзія Ласіла — заўсёды выконваюць гэты элемент проста на выдатна, але сёння, у вырашальны момант, не справіліся са сваімі праграмамі. «Перагарэлі» ці былі іншыя прычыны — не ведаю. З іншага боку, мы тактычна абыгралі ўсіх, хто выходзіў на старт. Мы рызыкавалі ў кожнай спробе, бо разумелі, што інакш нічога не будзе.
Добра, што ў суперфінале Ала выконвала скачок першай. Той сваёй спробай з элементамі ультра-сі яна паставіла саперніц у складанае становішча (вельмі высока ўзняла бальную планку), яны разгубіліся, сталі нервавацца.
— Як вы наогул ацэньваеце гэтыя спаборніцтвы?
— Барацьба была вельмі напружаная. Але стан трамплінаў і схілу — цалкам прымальны і, галоўнае, аднолькавы для ўсіх, таму ніхто не можа на гэта наракаць, як і на ўмовы надвор'я.
Першы віцэ-прэзідэнт НАК Беларусі Ігар Рачкоўскі:
— Цяжка нават сабе ўявіць тую атмасферу, якая пануе зараз у Беларусі пасля заваявання ў адзін дзень трох медалёў. Гэта свята, дзеля якога варта жыць. Ала малайчына. Без лішніх слоў. Асабліва хачу адзначыць і Мікалая Іванавіча Казеку, нашага «дзеда», які ўсё жыццё прысвяціў любімай справе і дабіўся такога бліскучага выніку.
— Я магу ўявіць пачуцці, якія перажываюць спартсмены, узлятаючы на вышыню чатырохпавярховага дома, — пракаментавала Дар'я Домрачава перамогу Алы Цупер. — Сёння я ўпершыню задумалася, што гэта — дзівосны від спорту, ён патрабуе жалезных нерваў. Рыхтуючыся да Алімпіяды, ты павінен прыехаць і за адзін дзень выкласціся напоўніцу. Гэта вельмі складана. Цяжка ўявіць, але ўсяго за некалькі секундаў вырашаецца лёс тваёй шматгадовай падрыхтоўкі. Таму я з вялікай павагай адношуся да фрыстайлістаў, і медалю Алы рада нават больш, чым свайму. Яна гэта заслужыла.
Трэба дадаць яшчэ, што нашы медалісткі Дар'я Домрачава, Ала Цупер і Надзея Скардзіна вызначылі спартыўныя школы, якія атрымаюць фінансавую падтрымку па праекце Прэзідэнцкага спартыўнага клуба «Алімпійскі выбар». Двухразовая алімпійская чэмпіёнка Даша Домрачава накіруе 100 млн рублёў Плешчаніцкай дзяржаўнай абласной сярэдняй школе алімпійскага рэзерву. Летась яна пабывала ў гасцях у юных біятланістаў і была ўражана, з якім стараннем яны падыходзяць да трэніровак.
Ала Цупер накіруе такую ж суму на адрас Гомельскага дзяржаўнага вучылішча алімпійскага рэзерву, дзе яна доўгі час трэніравалася пасля пераезду з Украіны.
Бронзавы прызёр Алімпіяды Надзея Скардзіна дапаможа Віцебскай спартыўнай дзіцяча-юнацкай школе алімпійскага рэзерву Беларускага фізкультурна-спартыўнага таварыства «Дынама». Яе ўклад — 50 мільёнаў рублёў.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.