Пачынаючы з гэтага нумара, мы прапануем зацікаўленым чытачам адзін з варыянтаў апісання беларускіх абрадавых практык — у форме адпрацаваных жыццём правіл, якія суправаджалі чалавека з першага да апошняга дня жыцця. Яны невялікія па форме, але надзвычай ёмістыя па змесце і патрабуюць не столькі абмеркавання, колькі дакладнага выканання. Хаця, зразумела, кожнае «залатое» правіла традыцыйнай беларускай культуры можа быць асобна, больш дэталёва, абмеркавана па жаданні нашых прыхільнікаў.
Каб прыглушыць боль, пачуццё трывогі і хвалявання, звязаныя са з'яўленнем на свет дзіцяці, каб па магчымасці захаваць яго ад уздзеяння злых сіл, людзі здзяйснялі разнастайныя рытуальна-магічныя дзеянні, маліліся, чыталі замовы — выказваючыся сучаснай мовай, стваралі камфортнае асяроддзе і аптымістычную атмасферу ўплыву на нованароджанага.
1. Каб паспрыяць працяканню родаў (у міфалагічным плане — пераходу дзіцяці са свету ўлоння маці ў свет новага, тутэйшага існавання), трэба было максімальна «адкрыць» прастору атачэння. Падчас родаў, асабліва цяжкіх, імкнуліся развязаць усе вузельчыкі на адзенні парадзіхі, распусціць ёй валасы, нават зняць нацельны крыж, таму што той ланцужок, на якім ён трымаўся, таксама ўтвараў замкнёнае кола; у хаце неабходна было адамкнуць усе замкі, адчыніць усе дзверы. Часам у выпадку цяжкіх родаў сваякі парадзіхі ішлі ў царкву і прасілі адчыніць нават царскую браму і тым самым палегчыць нараджэнне дзіцяці.
2. Калі пачыналіся роды, стараліся пра гэта нікому не гаварыць. Лічылася, што ўсе тыя, хто пра гэта ведае, будуць перажываць за жанчыну і тым самым толькі падоўжаць яе пакуты.
3. Каб не прычыніць шкоды парадзісе, да яе не дапускалі іншых цяжарных жанчын, а таксама хворых людзей.
4. Для палягчэння родаў каля парадзіхі (сёння, калі роды адбываюцца ў радзільні, гэта неабходна зрабіць у доме сваякам парадзіхі) ставілі запаленую грамнічную свечку і прыгаворвалі: «Пакуль свечка дагарыць, тут яна і нарадзіць. Амін».
5. Пры родах парадзіха здымала з сябе ўсе залатыя ўпрыгажэнні, але абавязкова пакідала нацельны крыжык і той абярэг, які яна насіла на працягу ўсёй цяжарнасці (хоць яго можна было зняць і заціснуць у кулак). Амаль паўсюдна самымі надзейнымі абярэгамі лічыліся чырвоныя шарсцяныя ніткі, паясы, шнуркі, якія маглі завязваць вакол пальца, запясця, шыі, паясніцы.
6. Паміж схваткамі парадзіха ціха шаптала: «Божая маці, прыйдзі мяне ратаваці, маё цела распрастаці, мае жылкі выпраўляці».
7. Існавала нямала рытуальных дзеянняў і слоў-абярэгаў, якія неабходна было здзейсніць і прачытаць адразу ж пасля родаў, каб у парадзіхі не было пасляродавых ускладненняў. Напрыклад, такія: «Як печ па хаце не ходзіць, не баліць, так бы ў мяне ў жываце не балела, не хадзіла, хваробай не губіла. Як Святая Багародзіца пасля родаў не хварэла, не пакутавала, так бы і я, раба (імя), не вохкала, не ўздыхала. У імя Айца і Сына і Святога Духа. Амін».
Аксана Катовіч, Янка Крук.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.