Мова — ці не самая першая прыкмета таго, што ёсць народ, што ён асаблівы. І што ён усведамляе сваю асаблівасць, непаўторнасць, узбагачаючы свет сэнсам, які адкрыты менавіта яму. Таму сэнс гэтага дня — засведчыць: мы ёсць, мы тут, мы хочам развіваць сваю культуру.
Таму ў Беларусі гэты дзень — 21 лютага — мае сваё асаблівае напаўненне. Кожны год, вядома, бывае па-рознаму. Але сёлета моўныя акцэнты выстаўлены ў двух кірунках. Першы. Беларуская мова для нас саміх, жыхароў краіны пад назвай Беларусь. Спробы яшчэ раз звярнуць людзей да роднай мовы, даць магчымасць паслухаць і адчуць, як непаўторна яна можа гучаць. Нават можна праверыць сябе, наколькі добра мы ёй валодаем. Дзеля гэтага, напрыклад, Таварыства беларускай мовы імя Францішка Скарыны ўвяло практыку правядзення агульнанацыянальных дыктовак. Сёлета ў Міжнародны дзень роднай мовы гэтая акцыя пройдзе сёмы раз. Прычым не толькі ў Беларусі, але і ў розных кутках свету. Другі. Менавіта ў тым, як беларуская мова гучыць у свеце (бо ў нейкім сэнсе гэта паказчык таго, як за межамі нашай краіны прымаюць беларускую культуру). І тое, што дыктоўка праходзіць не толькі ў Беларусі, — факт радасны. Але не толькі ён. Беларуская мова «У дыялогу культур» — гэта тэма літаратурна-музычнага вечара, які сёння адбудзецца ў Дзяржаўным літаратурным музеі імя Янкі Купалы. Цікава, што гасцямі гэтай імпрэзы стануць дыпламаты розных краін, якія працуюць у Беларусі. У доме народнага паэта Беларусі Янкі Купалы яны паслухаюць вершы і песні на беларускай мове. Але яшчэ і самі пачытаюць вершы Купалы ў перакладзе — на сваіх родных мовах. Насамрэч ва ўмовах тэндэнцыі да большай адкрытасці культур і іх збліжэння для кожнага народа становіцца ці не першаснай культурная задачай — захаванне нацыянальнай адметнасці праз мову. Таму і дзень гэты абвешчаны такой міжнароднай арганізацыяй, як ЮНЕСКА. І ўсе дзяржавы, якія з'яўляюцца членамі гэтай арганізацыі, далучаюцца да свята і імкнуцца засведчыць пра свае народы праз словы і данесці галоўны сэнс: мы ёсць!
Ларыса ЦІМОШЫК.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».