У гэтыя дні Ваенная акадэмія і вайсковыя факультэты грамадзянскіх ВНУ прымаюць гасцей — праходзяць дні адчыненых дзвярэй. Юнакоў, што зрабілі свой выбар на карысць прафесіі афіцэра, знаёмяць з вайсковымі спецыяльнасцямі, парадкам паступлення і арганізацыяй навучання ў сценах аlma мater. Акрамя таго, абітурыентам прадстаўляецца магчымасць зазірнуць у курсанцкія пакоі, каб, так бы мовіць, паглядзець на жыццё будучых абаронцаў Айчыны знутры
.
Акрамя галоўнай ваеннай ВНУ краіны, атрымаць афіцэрскія пагоны можна на 7 ваенных факультэтах і 4 ваенных кафедрах грамадзянскіх устаноў адукацыі. Аднак усё ж такі ў Ваеннай акадэміі сканцэнтраваны вядучыя ў вайсковай справе спецыялісты, ключавыя ваенна-навуковыя школы і касцяк навуковых супрацоўнікаў вышэйшай кваліфікацыі. У галоўнай ваеннай ВНУ вядзецца падрыхтоўка афіцэраў больш чым па 70 спецыяльнасцях, кірунках спецыяльнасцяў і спецыялізацыях. На базе Ваеннай акадэміі створана 7 факультэтаў, на якіх ажыццяўляецца падрыхтоўка афіцэраў тактычнага звяна. Акрамя таго, ва ўстанове адукацыі рыхтуюцца афіцэрскія кадры для ўнутраных войскаў МУС. На ваенных факультэтах іншых ВНУ падрыхтоўка будучых афіцэраў вядзецца больш чым па 20 спецыяльнасцях, кірунках спецыяльнасцяў і спецыялізацыях.
Адных з самых запатрабаваных сёння спецыялістаў для беларускай арміі рыхтуюць на кафедры беспілотных авіяцыйных комплексаў і баявога кіравання на ваенным факультэце Мінскага дзяржаўнага вышэйшага авіяцыйнага каледжа.
— Падобных спецыялістаў у Беларусі рыхтуем толькі мы, — падкрэсліў намеснік начальніка ваеннага факультэта па ідэалагічнай рабоце Мінскага дзяржаўнага вышэйшага авіяцыйнага каледжа палкоўнік Анатоль ЕРМАЛОВІЧ. — Першыя курсанты, якія асвойваюць новую спецыяльнасць, вучацца ўжо на другім курсе. Гэтыя спецыялісты будуць пілатаваць, абслугоўваць, рамантаваць, рыхтаваць да палётаў і, у тым ліку, праектаваць беспілотныя комплексы. Дарэчы, на гэтай кафедры курсавую падрыхтоўку праходзяць спецыялісты не толькі сілавых структур, а і грамадзянскай авіяцыі. Тое, што гэтая спецыяльнасць з'яўляецца перспектыўнай і для народнай гаспадаркі, не выклікае сумнення. Нашы спецыялісты, напрыклад, прымалі ўдзел у забеспячэнні Алімпіяды ў Сочы. Не дзіва, што з кожным годам папулярнасць спецыяльнасці расце. Адсюль і вялікі конкурс.
Не меншы ён і на спецыяльнасць «Сродкі наземнага забеспячэння палётаў». Між іншым, на постсавецкай прасторы такіх спецыяльнасцяў увогуле не існуе.
Дарэчы, дзяўчаты могуць паступаць у каледж на факультэт грамадзянскай авіяцыі. Яны маюць права атрымаць любую спецыяльнасць, звязаную з самалётамі. У тым ліку прафесію авіяцыйнага дыспетчара.
Што тычыцца тых, каго не прывабліваюць бясконцыя лекцыі і шматлікія канспекты, то і ў вайсковай адукацыі — шырокая прастора для выбару. Напрыклад, спецыфіка агульнавайсковага факультэта Ваеннай акадэміі ў тым, што практычныя заняткі складаюць каля 70% навучання. Таму хлопцам, якія мараць асвоіць магутную вайсковую тэхніку, якраз сюды.
— Сёлета з 1 верасня ў нас адкрываецца новая спецыяльнасць — «Псіхалагічнае забеспячэнне вайсковай дзейнасці», дзе, між іншым, зможа навучацца і грамадзянскае насельніцтва па спецыялізацыі «Практычная псіхалогія», — зазначыў намеснік начальніка агульнавайсковага факультэта па вучэбнай і навуковай працы палкоўнік Сяргей МАЗОЎКА. — Стварэнне падобнай спецыяльнасці стала неабходнасцю ва Узброеных Сілах, актуальным павевам сучаснага жыцця. Чалавек — заўсёды загадка. Афіцэры — звычайныя людзі, са сваімі праблемамі і перажываннямі. Таму патрэбны спецыялісты, якія будуць здольныя прыйсці на дапамогу.
Адным словам, тым, хто збіраецца звязаць сваё жыцця з прафесіяй абаронцы Айчыны, ёсць з чаго выбіраць. А каб лепш разабрацца, да чаго ўсё ж такі ляжыць душа, было б добра наведаць навучальныя ўстановы ў дні адчыненых дзвярэй
Вераніка КАНЮТА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».