Учора на пасяджэнні Прэзідыума Савета Міністраў Беларусі агучылі вынікі Года беражлівасці.
«Летась была зніжана энергаёмістасць ВУП на 10,7% пры заданні 7%. Эканомія энергарэсурсаў — 1,57 млн тон умоўнага паліва пры заданні 1,43-1,8 млн тон», — паведаміў прэм'ер-міністр Беларусі Міхаіл Мясніковіч. Аднак потым ён нагадаў, што яшчэ застаецца шмат праблем. Сярод іх: «...выпадкі неабгрунтаваных выдаткаў на закупку абсталявання, адсутнасць сістэмнай працы па павышэнні эфектыўнасці выкарыстання дзяржаўнай маёмасці». Кіраўнік урада асабліва вылучыў апошнюю праблему: «Найбольшая колькасць плошчаў, якія не выкарыстоўваюцца, маюць канцэрн «Беллегпрам» (37 тыс. кв. м), «Белнафтахім» (50 тыс. кв. м), Міністэрства сувязі (28 тыс. кв. м), Мінпрам (93,3 тыс. кв. м). І гэта нягледзячы на тое, што ёсць адпаведны ўказ Прэзідэнта».
Неэканомнасць праявілася і ў недастатковым зборы другаснай сыравіны. «Нягледзячы на тое, што ёсць праграма па перапрацоўцы другаснай сыравіны, гэтая дзейнасць застаецца ў краіне на вельмі нізкім узроўні, — заявіў Міхаіл Мясніковіч. — Усяго толькі 12,3% ад аб'ёму ўтвораных цвёрдых камунальных адходаў накіроўваецца на перапрацоўку. У разрэзе рэгіёнаў гэта выглядае так: заданні па зборы адходаў паперы і кардону не выканалі ўсе аблвыканкамы. Па зборы шкла — Брэсцкі, Віцебскі, Мінскі, Магілёўскі аблвыканкамы і Мінскі гарадскі выканкам. Горш за ўсё сітуацыя ў Мінскім гарвыканкаме: не выкананы заданні па зборы ўсіх другасных рэсурсаў». Можа падацца, што нічога страшнага ў гэтым няма, але невыкананне, асабліва па макулатуры і шкле, стварае шмат праблем: «У нас жа прамысловасць наладжана на тое, каб паступалі ў абарот другасныя рэсурсы. У выніку мы імпартавалі амаль 65 тыс. тон макулатуры, 17 тыс. тон шкла. А калі ўзяць ды ў такіх памерах рублём пакараць? Я буду прапаноўваць такія меры адказнасці».
Уладзіслаў КУЛЕЦКІ.
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.