Добры дзень! Я маю інваліднасць. Нядаўна даведалася, што ў мяне ёсць права на дадатковы водпуск. Аднак кіраўніцтва не жадае адпускаць мяне. Што я магу зрабіць?
Наталля Кухарэнка, г. Мінск
На пытанне нашай чытачкі мы папрасілі адказаць юрыста Офіса па правах людзей з інваліднасцю Вольгу Трыпуцень:
Працоўным кодэксам Рэспублікі Беларусь рэгулююцца пытанні, звязаныя з прадастаўленнем водпускаў без захавання заработнай платы. Так, згодна з арт. 189, наймальнік абавязаны па жаданні работніка прадаставіць водпуск без захавання заработнай платы працягласцю да 14 каляндарных дзён пэўным катэгорыям работнікаў, у тым ліку інвалідам, якія працуюць на вытворчасці, у цэхах і на ўчастках, спецыяльна прызначаных для працы гэтых асоб.
Калі наймальнік, нягледзячы на неаднаразовыя звароты да яго з боку работніка, не дае дадатковы адпачынак, то работнік мае права:
— звярнуцца ў органы па разглядзе індывідуальных працоўных спрэчак (у Камісію па працоўных спрэчках, а потым у суд па агульнай схеме) з іскам аб прымусе наймальніка да прадастаўлення вышэйзгаданага водпуску;
— звярнуцца ў органы па наглядзе і кантролі за выкананнем заканадаўства аб працы (напрыклад, у Дэпартамент дзяржаўнай інспекцыі працы Міністэрства працы і сацыяльнай абароны), якія маюць права вынесці наймальніку адпаведнае прадпісанне і прыцягнуць яго да адказнасці за парушэнне
арт. 189 Працоўнага кодэкса;
— фактычна сысці ў адпачынак, калі да заканчэння перыяду, на працягу якога ён павінен прадастаўляцца, засталося роўна столькі ж дзён, колькі складае працягласць водпуску, на які мае права работнік.
Падрыхтавала Святлана Бусько.
Даведка «Звязды»
Працягласць асноўнага водпуску ў нашай краіне не павінна быць менш за 24 каляндарныя дні. Для асобных катэгорый работнікаў можа быць устаноўлена працягласць асноўнага водпуску больш за 24 каляндарныя дні. Работнікам з інваліднасцю ўстаноўлены асноўны працоўны водпуск працягласцю 30 каляндарных дзён.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.
«Мы зацікаўлены, каб да нас прыязджалі».