або Чаму над якасцю адукацыі трэба працаваць пастаянна.
«Якасць адукацыі разам з коштам адукацыйных паслуг з'яўляюцца сёння галоўнай канкурэнтнай перавагай беларускіх ВНУ», — заявіў на адкрыцці міжнароднага адукацыйнага форуму «Еўрапейская якасць адукацыі» міністр адукацыі Сяргей МАСКЕВІЧ.
— Як нам бачыцца, асноўны прагрэс у сферы яе далейшага павышэння можа даць развіццё ўніверсітэцкіх сістэм менеджменту якасці, якія дазволяць граматна кіраваць вышэйшымі навучальнымі ўстановамі. Менавіта ў гэтым кірунку мы і развіваемся, — падкрэсліў міністр. — Для распрацоўкі ўнутрывузаўскіх сістэм менеджменту якасці ў кожнай ВНУ створаны адпаведныя арганізацыйныя структуры — Саветы па якасці, у якія ўваходзяць і студэнты як спажыўцы адукацыйных паслуг. Яны ўдзельнічаюць у абмеркаванні арганізацыі вучэбнай дзейнасці, навуковай работы, у распрацоўцы і рэалізацыі дакументаў, якія рэгламентуюць усе аспекты жыцця студэнцкай моладзі. Атрыманне зваротнай сувязі ад студэнтаў у форме адказаў на пытанні анкеты стала шырока распаўсюджанай з'явай, і гэтая зваротная сувязь улічваецца пры распрацоўцы вучэбных праграм.
Па словах міністра, у павышэнні якасці адукацыі асноўную ролю адыгрывае выкладчыцкі састаў. Інтэлектуальны патэнцыял выкладчыкаў непазбежна суадносіцца з іх актыўнай навуковай дзейнасцю, паколькі па-за ёю выкладчык асуджаны на чытанне «чужых» падручнікаў і іх больш ці менш умелую трансляцыю студэнтам. Толькі той, хто пастаянна самаўдасканальваецца ў сваёй дзейнасці, зможа перадаць навучэнцам веды.
На форуме падкрэслівалася, што тэма якасці прафесійнай адукацыі надзвычай актуальная сёння для ўсіх еўрапейскіх краін. І той факт, што менавіта Беларусь была абрана стартавай пляцоўкай для правядзення першага міжнароднага адукацыйнага форуму, прысвечанага праблемам якасці адукацыі, многія ў нашай краіне палічылі добрым знакам. Мерапрыемства праходзіць пры падтрымцы Міністэрства адукацыі, Пасольства Беларусі ў Злучаным Каралеўстве Вялікабрытаніі і Паўночнай Ірландыі, Пасольства Злучанага Каралеўства Вялікабрытаніі і Паўночнай Ірландыі ў Беларусі, а яго арганізатарамі выступілі брытанская бізнес-школа «Magna Carta Oxford» і Цэнтр міжнародных сувязяў Міністэрства адукацыі.
Як адзначыў дырэктар Цэнтра міжнародных сувязяў Аляксандр САМУЙЛІЧ,
глабалізацыя свету зрабіла адукацыю інтэрнацыянальнай: «Мы знаходзімся на рэальным рынку, дзе павінны канкурыраваць з іншымі ігракамі. А таму для нас так важна вывучаць самыя розныя тэндэнцыі і навуковыя падыходы да арганізацыі вучэбнага працэсу і павышэння якасці падрыхтоўкі».
Вялікабрытанія, ЗША і Аўстралія лічацца на рынку адукацыйных паслуг агульнапрызнанымі сусветнымі лідарамі. У ВНУ менавіта гэтых краін сёння навучаецца найбольшая колькасць студэнтаў, і менавіта там прадастаўляюць моладзі найбольшую колькасць адукацыйных праграм.
— Я сам — бацька дваіх сыноў. Старэйшы ўжо навучаецца ва ўніверсітэце, а малодшы спадзяецца паступіць ва ўніверсітэт у гэтым годзе. Якасць іх адукацыі асабліва дарагая і майму сэрцу, і майму кашальку, — падзяліўся сваім бачаннем сітуацыі пасол Вялікабрытаніі ў Беларусі Брус БАКНЭЛ. — І я хачу, каб мае сыны атрымалі дыпломы, якасць якіх будзе прызнавацца ва ўсім свеце, я хачу, каб яны мелі адукацыю, якая зможа развіць у іх крытычнае мысленне, уменне вырашаць праблемы і знаходзіць выйсце са складаных сітуацый, з якімі яны сутыкнуцца ў жыцці. У рэшце рэшт, я хачу, каб адукацыя дапамагла ім дабіцца поспеху ў кар'еры. Я разумею, што ў маіх дзяцей значна больш магчымасцяў у атрыманні адукацыі, чым, скажам, трыццаць гадоў таму ў мяне. Развіццё дыстанцыйнай адукацыі я разглядаю як сур'ёзны рывок для ўсяго свету. Але мяне хвалюе: як будзе забяспечвацца якасць дыстанцыйнай адукацыі? Ці зможам мы ёй давяраць?
Першы прарэктар брытанскай бізнес-школы Magna Carta Oxford Вадзім ЦІТОЎ (дарэчы, выпускнік БДУІР) упэўнены, што, атрымліваючы адукацыю, чалавек інвестуе ў сваю будучыню. Колькі ён інвестуе ў свае веды, такі вынік і атрымае. На думку Вадзіма Цітова, пры выбары ВНУ трэба звяртаць увагу на некалькі акалічнасцяў: у прыватнасці, на падтрымку ВНУ глабальных праграм студэнцкіх абменаў, на міжнародныя сувязі, суадносіны выкладчыцкага і студэнцкага саставу, месца ВНУ ў розных рэйтынгах. Важна таксама звяртаць увагу на наяўнасць праграм, якія забяспечвалі б пераддыпломную і паслядыпломную практыку, стажыроўку ў рэальным сектары эканомікі, што ў будучым магло б паспрыяць маладому чалавеку ў працаўладкаванні.
Надзея НІКАЛАЕВА.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.