Міністэрства лясной гаспадаркі ўзмацніла захады па ахове лясоў ад пажараў. Бесклапотнае стаўленне людзей да выпальвання сухой травы і парушэнне правілаў пажарнай бяспекі сталі асноўнымі прычынамі ўзгаранняў у лясах.
Паводле інфармацыі прэс-сакратара міністэрства Ружэны Навіцкай, за паўмесяца цяперашняга пажаранебяспечнага перыяду ў лясным фондзе ўжо зафіксавана 45 пажараў на агульнай плошчы амаль 26 гектараў. Летась на той жа час узгаранняў яшчэ не было, ды і ў цэлым за пажаранебяспечны перыяд агонь прайшоўся толькі прыкладна па 50 гектарах лесу.
Больш за ўсё ўспышак адбылося ў Мінскай і Гомельскай абласцях — 18 і 15 выпадкаў адпаведна. Тры пажары зафіксаваны ў зоне радыеактыўнага забруджвання. У Чэрыкаўскім лясгасе агонь пашкодзіў лясныя культуры на плошчы 10,5 гектара, у Веткаўскім спецлясгасе лес гарэў двойчы — на 2,5 і 1,9 гектара. Ва ўсіх выпадках прычынай узгаранняў быў так званы чалавечы фактар.
У сувязі з вышэйсказаным арганізацыі Міністэрства лясной гаспадаркі перайшлі на больш частае патруляванне ляснога фонду і дзяжурства на назіральных вышках цягам усяго светлага часу сутак. Задзейнічаны таксама ўсе сістэмы відэаназірання за лясамі.
Сяргей РАСОЛЬКА.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».