«Усё на свеце выпадкова», — напісаў некалі Васіль Сахарчук у адным са сваіх вершаў, які стаў папулярнай песняй. Што ж, сапраўды, калі не ўсё, то вельмі многае. Але менавіта яго Вялікасць выпадак нярэдка крута мяняе наш лёс і нябачнымі ніткамі звязвае тых, хто не тое што не знаёмы паміж сабой, але і раздзелены сотнямі, тысячамі кіламетраў. У знакамітага рускага паэта Юрыя Кузняцова, у тым ліку, і пра гэта ёсць верш «Муха», якая «на спящей царевне спала» ды «из раны отцовской пила», які мне прыгадаўся, калі я чытаў апавяданне Генадзя Аўласенкі «Аса». Здавалася б, як маглі ўзнікнуць такія паралелі: паэзія і проза, Кузняцоў і Аўласенка? Але ж — «усё на свеце выпадкова».
Алесь Бадак.
Члавек сядзеў за пісьмовым сталом і ляніва пазіраў, як адчайна б'ецца аб шкло вялікая жоўтая аса, марна спрабуючы знайсці выйсце. Расчыненая фрамужка, праз якую, дарэчы, аса і змагла патрапіць у цесны гэты пакойчык, знаходзілася зусім побач, але аса аб гэтым нават не здагадвалася. І з упартасцю, вартай лепшага прымянення, зноўку і зноўку працягвала стукацца ў празрыстае шкло, адчайна імкнучыся вырвацца на волю...
Чалавек, які сядзеў за сталом, таксама марыў аб волі, марыў аб ясным жнівеньскім поўдні, што так весела і заманліва панаваў за акном. Там было сёння даволі шматлюдна, і асабліва шмат было ў вірлівым гэтым людскім натоўпе маладых загарэлых дзяўчат у кароткіх лёгкіх спаднічках. І як добра было б ісці зараз побач з адной з іх і весці прыемную няспешную гутарку...
Ці хаця б проста пяшчотна трымаць за руку...
А замест гэтага чалавеку прыходзілася сядзець за брудным абшарпаным сталом і рабіць нікому не патрэбныя разлікі. І так з дня ў дзень: прыходзіць сюды кожную раніцу, уключаць камп'ютар, выцягваць з шуфлядкі ручку і чарговы стос паперы... і лічыць, лічыць, лічыць...
І добра ведаць, што ўсе сённяшнія падлікі не пазбавяць цябе ад гэткага ж няўдзячнага і занудлівага заўтрашняга тлуму...
А аса ўсё білася і білася аб шкло, ніяк не жадаючы змірыцца з тым, з чым сам чалавек даўно ўжо змірыўся...
«Забіць яе, ці што?» — міжволі падумалася яму.
У пакойчыку было так млосна і задушліва, што нават уставаць не хацелася. Але чалавек усё ж узняўся, падышоў да акна і нейкі час моўчкі назіраў за асой.
«Ці ўсё ж выпусціць?»
Апошняя думка перамагла, і чалавек, выцягнуўшы з кішэні насоўку, павольна паднёс яе да асы, якая ў адказ гучна і пагрозліва загудзела і стала біцца аб шыбу яшчэ мацней.
— Цішэй ты, дурніца! — прамармытаў чалавек, асцярожна заціскаючы асу ў насоўку. — Я ж табе дапамагчы хачу!
Стройная загарэлая дзяўчына спынілася раптам якраз насупраць акна, ажыўлена размаўляючы с кімсьці па мабільніку. У яе была даволі незвычайная прычоска: валасы стракатай, чорна-зялёна-фіялетавай афарбоўкі, забраныя да таго ж зверху ў нейкі недарэчны вузел... а патыліца, наогул, састрыжаная пад нуль. Але, як ні дзіўна, усё гэта дзяўчыне нават пасавала... і чалавек, трымаючы ў руцэ насоўку з асой і забыўшыся пра ўсё на свеце, моўчкі назіраў за прыгажуняй. Потым яна, схаваўшы тэлефон у сумачку, летуценна ўсміхнулася, гледзячы кудысьці паверх ягонай галавы, і рушыла далей, а чалавек, нарэшце, успомніў, з якой мэтай ён падышоў да акна.
— Давай, ляці! — сказаў чалавек асе, падносячы насоўку да адчыненай фрамужкі, і, уздыхнуўшы, дадаў: — Табе добра!
Потым ён вярнуўся да стала і зноўку заняўся сваімі лічбамі, якія раз-пораз выдаваў яму стары, вечна «завісаючы» камп'ютар. Усё было, як раней... і, тым не менш, усё было неяк інакш. І маленькі пакойчык гэты ўжо не здаваўся чалавеку такім цьмяным і задушлівым, ды і сама занудная нецікавая ягоная праца нібыта набыла раптам нейкі патаемны, загадкавы сэнс...
І ўсё гэта таму толькі, што ён аказаў дапамогу маленькай жывой істоце, а магчыма, і выратаваў яе ад смерці? Ці, хутчэй, таму, што прыгожая дзяўчына менавіта ў гэты час спынілася насупраць акна і нават летуценна ўсміхнулася, гледзячы кудысьці паверх ягонай галавы?
Адказу на гэтыя пытанні чалавек не ведаў. Як не ведаў і тое, што зусім хутка, ужо заўтрашняй раніцай, шляхі выратаванай ім асы і прыгожай дзяўчыны з рознакаляровай прычоскай нечакана і страшна перасякуцца. І дзяўчына, ласуючыся вялікай сакавітай грушай, занадта позна адчуе, як штосьці нечакана заварушыцца ў роце. А потым будзе боль, рэзкі пранізлівы боль у горле... а яшчэ потым...
Яшчэ потым дзяўчына памрэ ад задушша, бо, хоць і спыніцца побач шмат людзей, сярод іх не знойдзецца анікога, хто змог бы хоць нейкім чынам аказаць ёй дапамогу.
Геннадзь Аўласенка
Фіналістка праекта «Акадэмія талентаў» на АНТ — пра творчасць і жыццё.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.