«Заўсёды, калі праглядваю дзедавы фотаздымкі з сямейнага альбома, успамінаю верш Максіма Танка, — зазначае брастаўчанка Ніна Дрык. — У трыццатыя гады мінулага ўжо стагоддзя многія мужчыны адпраўляліся за мяжу на заробкі. У іх ліку быў мой дзед Васіль Паўлавіч Дрык, 1906 года нараджэння, з вёскі Гірск Кобрынскага раёна. Пакінуўшы на гаспадарцы жонку Маланню, адправіўся ён у Аргенціну. Вось якая атрымалася жыццёвая арыфметыка: майму бацьку было тады няпоўныя два гады, а вярнуўся дзед Васіль праз доўгія 26 гадоў, у 1956-м, і налета ў яго нарадзіўся ўжо ўнук — бацькаў першынец Віталь, мой брат.
...Не надта ласкава прыняла чужая зямля беларускіх эмігрантаў. Але дзякуючы працавітасці, заўзятасці і напорыстай цягавітасці яны зарэкамендавалі сябе з лепшага боку. Не меўшы вялікага выбару, спачатку працавалі на трасняговых плантацыях. Потым гаспадар даў добрую рэкамендацыю — уладкаваліся на суконную фабрыку ў Буэнас-Айрэсе. Заробленыя грошы дзед адкладваў, а начамі яму сніўся родны дом, жонка і сын Сцяпан. Пісьмы былі жывой ніткай сувязі з блізкімі. Дзед Васіль (на фота ён злева) з землякамі марылі аб Радзіме, цікавіліся ўсім, што адбываецца на роднай зямлі, захапіліся ідэямі камунізму і нават... адседзелі па тры месяцы ў турме.
А на радзіме жыццё ішло сваім ходам. Меўся невялікі надзел зямлі, але галадаць не прыходзілася. Баба Малання — і швец, і жнец, і на дудзе ігрэц — ставіла на ногі сына. Хлопец-бязбацькавіч — рана стаў гаспадаром. Тата ў старэйшых вучыўся цяслярыць, гэблік і стамеска «гарэлі» ў маладых руках. Памалу будаваліся.
Вайна ўнесла свае змены ў сялянскае жыццё. Бабуля пякла хлеб, перадавала партызанам... Потым немцы спалілі хату, але Бог уратаваў жыццё.
Скончылася вайна, будаваліся, як той казаў, з «пяці пальцаў». Заробленыя працадні аплачваліся мізэрна. Выстаялі, загартаваліся ў пекле працоўных будняў і рэдкіх святаў. Бабуля Малання цешылася з гаспадарлівасці сына, а ўночы размаўляла з падушкай. З васьмі мужчын, якія паехалі на заробкі, некаторыя прыжаніліся там, за далёкім светам. Трывожнасць і адзінота сталі бабулінымі сяброўкамі. Незайздросная доля напаткала жанчын-самотніц. Па-рознаму іх называлі ў вёсцы: «удава-амерыканка», а часам і «пакіданка».
А дзеду на чужыне сніўся бярозавы гай за аселіцай і разгалістыя дубы на сядзібе. Жыў адзіным жаданнем: ступіць на родную зямлю, прыціснуць да сябе сына, які вырас без яго. Толькі што чакала «вяртальнікаў» у 1956 годзе ў Савецкім Саюзе? Адэса сустрэла няветліва: поўны ператрус рэчаў, заробленай маёмасці... Не любіў успамінаць дзед гэты момант.
Вярнуўся ён у родную вёску «амерыканцам». Сярод жыхароў вылучаўся: жыццё за мяжой наклала вялікі адбітак. У шафе ў пажаўцелай скрыні і сёння ляжыць дзедаў капялюш з шырокімі палямі (на калектыўным фота дзед — чацвёрты справа — якраз у гэтым капелюшы). Доўга насіў ён і скураную куртку — тужурку. ...Мы, чацвёра унукаў, беглі да дзеда з бабай на хутар, каб зноў і зноў паслухаць «аргенцінскія аповеды» і паразглядваць рэчы, прывезеныя адтуль. Згаладалы па цяплу родных, дзед песціў нас і любіў. Ашчадны па жыцці, рабіў падарункі, якія помняцца дагэтуль: мне, як лепшай у вучобе, падарыў чарнільную ручку ў скураным зялёным футарале. Здавалася, што пісала яна сама.
Любілі яны — а вярнуліся многія — збірацца па святах і ўспамінаць былое. Падтрымлівалі цесныя сувязі, параўноўвалі «гэтае» жыццё з «тым», успаміналі тых, хто застаўся на чужыне. Дзедаў сябар Максім прывёз сюды жонку-іспанку і сына Эміля з надзеяй на добрае жыццё... Нядоўга радаваўся сустрэчы з роднай зямлёй: жонцы не падышоў наш клімат, стала пакутаваць на астму. Пры загадкавых абставінах хутка памёр і сам Максім. Пасля смерці жанчына з сынам «выхадзіла» дазвол вярнуцца ў Аргенціну. Тыя ж «эмігранты», хто застаўся, шмат перанеслі, каб атрымаць пенсію. Некаторыя, як сям'я суседа Пятра Іванавіча Бойкі, атрымалі пацвярджэнне з Міністэрства замежных спраў ужо пасля смерці.
Хутка бяжыць час. Моцныя і трывалыя «парасткі» засталіся ў дзеда Васіля: унук Віталь з жонкай Надзеяй, іх двое дзяцей і трое ўнукаў; унучка Надзея з мужам Сцяпанам, ад іх — двое дзяцей і чацвёра ўнукаў; я (Ніна) і мая дачка з мужам і ўнукам; Таццяна з мужам Анатолем і іх дзеці — тры дачушкі, зяці і двое ўнукаў. Цяпер разглядваем фотаздымкі сямейнага архіва са сваімі ўнукамі. Свята беражом памяць, у якой гісторыя краіны знітавалася з лёсам блізкіх людзей».
------
Шаноўныя чытачы! Давайце пагартаем сямейныя альбомы разам! Фотаздымкі з гісторыяй (не больш за тры здымкі) дасылайце на рэдакцыйную пошту альбо электронную скрыню іnfо@zvуаzdа.mіnsk.bу. Аўтар найлепшага фота з гісторыяй будзе адзначаны каштоўным прызам.
Увага! Да ўдзелу ў конкурсе НЕ ПРЫМАЮЦЦА вясельныя фотасесіі, леташнія здымкі з курорта і сучасныя фота дзяцей. Арыгіналы дасланых фотаздымкаў абавязкова вяртаюцца аўтарам.
Знакі на ўдачу
У традыцыйнай культуры славян па падабенстве розных з'яў і акалічнасцяў, якія спадарожнічалі нараджэнню чалавека, меркавалі аб тым, як складзецца яго лёс.
1. Так, калі ў адзін дзень у сям'і хтосьці паміраў (праходзіла пахаванне) і нараджалася дзіця, то гэтае супадзенне ўспрымалася як прадказанне недаўгавечнасці нованароджанага. Парадзісе трэба было абавязкова раніцай і ўвечары на працягу дзевяці дзён пасля хаўтур чытаць малітву Багародзіцы і разнастайныя словы-абярэгі. І наадварот, калі пры нараджэнні немаўляці ў хаце пражываў доўгажыхар, то жыццё ў дзіцяці, як лічылі, будзе вельмі шчаслівым і доўгім.
2. Шчаслівым лічылася і тое дзіця, у дзень нараджэння якога ў сям'і быў яшчэ які-небудзь прыбытак, напрыклад, ацялілася карова, ажарабілася кабыла, апарасілася свіння, адбылася загадзя запланаваная вялікая купля і да т.п.
3. Самым надзейным знакам шчасця, паводле народных па-
данняў, была так званая «дзіцячая кашуля» — фрагменты жывой тканкі ў выглядзе тоненькай плёнкі, якія маглі застацца на галаве або целе дзіцяці. Яе акуратна здымалі, сушылі і захоўвалі як талісман, які прыносіць поспех.
4. Лічылася, што дзіця, якое нарадзілася з дастаткова доўгімі валасамі, будзе багатым і шчаслівым.
5. Нягоды абяцалі дзіцяці, калі яно з'яўлялася на свет уніз тварам, наперад нагамі або спавітае вакол шыі пупавінай. Лічылася, што ўсё жыццё чалавек будзе раздзіраць гэтыя нябачныя путы, якія будуць ускладняць пошук свайго месца пад сонцам (у сям'і, у вучобе, на працы). Калі пупавінай была абкручаная дзяўчынка, то чытаюць малітвы і замовы-абярэгі ў жаночы дзень (серада, пятніца, субота), калі хлопчык — у мужчынскі дзень (панядзелак, аўторак, чацвер).
6. Лічылася, што дзеці, народжаныя ў буру, будуць заўсёды ствараць вакол сябе перадумовы «буры» ва ўзаемаадносінах з людзьмі і ў штодзённых паводзінах: яны будуць крыклівыя, нявытрыманыя, непаслухмяныя і, як вынік, нешчаслівыя. Таму народныя лекары раілі падмешваць святую ваду пасля Вадо-
хрышча ў ночвы пры купанні.
7. Калі дзяўчынка, падрастаючы, станавілася падобнай да бацькі, а сын — да маці, гэта лічылася добрым знакам шчаслівага і ўдалага жыцця. Калі ж сын быў падобны да бацькі, а дачка да маці, баяліся, што такія дзеці не створаць сваёй сям'і.
Аксана Катовіч, Янка Крук.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».