Сёння адкрываецца XVІІІ Міжнародная спецыялізаваная выстава «СМІ ў Беларусі».
На працягу бліжэйшых чатырох дзён у Футбольным манежы можна будзе пазнаёміцца з навінкамі беларускай медыясферы, а таксама завітаць на стэнды сваіх традыцыйна любімых выданняў. Адметную экспазіцыю прадставіць і Выдавецкі дом «Звязда».
Сёння, а 13‑й гадзіне, будуць прэзентаваны даўно любімыя вамі газеты «Звязда», «Літаратура і Мастацтва», часопісы «Полымя», «Нёман», «Вожык», «Маладосць», а таксама часопіс «Родная прырода», які наш Выдавецкі дом узяў пад сваё крыло нядаўна, але які ўжо займеў сваіх прыхільнікаў. Можна будзе зазірнуць у гісторыю выданняў, а таксама пазнаёміцца з рэаліямі, даведаўшыся пра цікавыя праекты, актуальныя творчыя знаходкі, паўдзельнічаць у віктарынах.
Асобную прэзентацыю будзе мець добра вядомы вам праект «Дарогамі вызвалення», прысвечаны 70‑годдзю вызвалення Беларусі ад нямецка-фашысцкіх захопнікаў. Яго вы пастаянна маглі бачыць на старонках «Звязды».
Наведвальнікі змогуць прыняць
удзел у вызначэнні 10‑ці самых папулярных твораў беларускай літаратуры XX стагоддзя. Такая магчымасць у іх з'явіцца падчас пачатку рэспубліканскай акцыі «Топ‑10 любімых твораў беларускай класікі», аб'яўленай часопісам «Полымя». Прыхільнікі штотыднёвіка «Літаратура і мастацтва» атрымаюць рэдкую магчымасць апынуцца на першай паласе любімага выдання. Для гэтага трэба проста прыйсці на выставу і… стаць героем самага лепшага фотаздымка гэтага дня.
Мастак-карыкатурыст часопіса «Вожык» Аляксандр Каршакевіч будзе рабіць экспрэс-партрэты сваіх падпісчыкаў. Шчасліўчыкі, якім пашанцуе быць намаляванымі спрактыкаваным майстрам, свае партрэты змогуць забраць з сабой на памяць.
23 красавіка, аб 13‑й гадзіне, пачнецца кансультацыя псіхолага Настассі Гарэлік, якая завітае на звяздоўскі праект «Краіна здароўя». На наступны дзень, аб 11‑й гадзіне, пастаянныя аўтары Аксана Катовіч і Янка Крук асабіста прадставяць свае «Залатыя правілы народнай культуры» і штодзённы праект «Народжаныя».
У апошні дзень мерапрыемства, а 11‑й гадзіне, адбудзецца аўтограф-сесія аўтара кнігі «Чамадан з кракадзілавай скуры» Алены Беланожка, таксама аўтарамі і складальнікамі кнігі «Скрозь «Маладосць».
У дні выставы на стэндзе «Белпошты» можна будзе падпісацца на любую газету ці часопіс Выдавецкага дома «Звязда», атрымаўшы зніжку. Акрамя таго, ільготы прадастаўляюцца ветэранам Вялікай Айчыннай вайны і пенсіянерам. Газета «Літаратура і мастацтва», часопісы «Полымя», «Нёман», «Маладосць» прапануюць больш нізкі падпісны кошт настаўнікам, часопіс «Вожык» — жыхарам сельскай мясцовасці.
Прыходзьце! Абяцаем: будзе цікава!
Ніна ШЧАРБАЧЭВІЧ.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.