У Беларускім доме друку прадэманстравалі магчымы варыянт беларускага біяметрычнага пашпарта.
Ад звыклага нам такое пасведчанне асобы адрозніваецца наяўнасцю спецыяльнай мікрасхемы, на якой захавана інфармацыя пра ўладальніка пашпарта. Гэта імя, імя па бацьку, прозвішча, дата нараджэння, адсканаваныя адбіткі пальцаў — у асноўным тое, што змяшчае і «звычайны» дакумент. Біяметрычныя пашпарты сёння выдаюць у многіх краінах свету, Беларусь пакуль на шляху да гэтага. З удзелам расійскіх партнёраў, адкрытага акцыянернага таварыства «НДІМЭ і Мікрон» і групы кампаній «Першы друкарскі двор», у Беларускім доме друку было сабрана 20 беларускіх пашпартоў з чыпам — эксперыментальных узораў.
— Кожны чып для пашпарта, нягледзячы на свой невялікі памер, па магутнасці супастаўны з настольным камп'ютарам 90-х гадоў. Сёння чыпу дастаткова мець 72 кілабайты вольнай памяці, а сам ён каштуе каля двух еўра, — распавёў начальнік аддзела прасоўвання сродкаў ідэнтыфікацыі ААТ «НДІМЭ і Мікрон» Анатоль Рэзнік. — У канцы года мы плануем выпусціць мікрасхему з аб'ёмам памяці, большым за цяперашні ўдвая. Магчыма, акрамя адбіткаў пальцаў, у будучыні спатрэбіцца запісваць такія індывідуальныя ідэнтыфікатары, як радужная абалонка вока ці профіль вуха.
Вытворцы мікрасхем запэўніваюць, што ўся інфармацыя на чыпе надзейна зашыфравана і абаронена ад несанкцыянаванага доступу.
Узор беларускага біяметрычнага пашпарта на выгляд не адрозніваецца ад дакумента, які зараз ёсць у беларускіх грамадзян, — згаданая мікрасхема незаўважная. Спецыялісты тлумачаць, што «электронная начынка» будзе «зашытая» ў вокладку. У Расіі, напрыклад, для гэтага маецца спецыяльная пластыкавая старонка.
— Для таго, каб унесці даныя ў біяметрычны пашпарт, з абсталявання нам патрабуецца камп'ютар, спецыяльны прынтар, ламінатар, лічбавая фотакамера і сканер адбіткаў пальцаў, — растлумачыў намеснік дырэктара па тэхналогіях ідэнтыфікацыі групы кампаній «Першы друкарскі двор» Ілья Увараў.
Тут жа ён з памочнікамі прадэманстраваў увесь працэс запісу асабістых даных у дакумент і працэс счытвання інфармацыі з дапамогай спецыяльнага абсталявання і праграмнага забеспячэння. Для пачатку дзяўчыну, што згадзілася «атрымаць пашпарт», папрасілі назваць прозвішча, імя, імя па бацьку і іншыя звесткі, якія пазначаюць у пасведчанні асобы, затым зрабілі фота і адсканавалі адбіткі пальцаў. Праз нейкі час гэтая інфармацыя ўжо была запісана на чып, а прынтар надрукаваў узор нашага пашпарта, які накіравалі ў ламінатар.
Каб паказаць, як «працуе» біяметрычны пашпарт, яго заставалася толькі паднесці да спецыяльнай прылады, што счытвае асабістыя звесткі, а палец зноў прыкласці да сканера, каб сістэма супаставіла адбіткі. Дарэчы, праграма запрошвае спецыяльны код, які ўводзіцца з пашпарта ўручную, толькі пасля гэтага прылада зможа прачытаць чып.
Ці чакаць у хуткім часе ўвядзення ў Беларусі біяметрычных пашпартоў? Прадстаўнікі Міністэрства ўнутраных спраў, якія таксама прысутнічалі на прэзентацыі, пра тэрміны і саму верагоднасць гэтага нічога сказаць не змаглі. Гаварыць пра пераход Беларусі на новы тып пасведчання асобы можна будзе толькі тады, калі на гэты конт будзе прынята палітычнае рашэнне.
— Тэма біяметрычнага пашпарта не першы год абмяркоўваецца ў нашай краіне, у тым ліку і на самым высокім узроўні, за гэты час мы зрабілі нямала ў плане працы з узорамі біяметрычнага пашпарта, які ў будучыні, магчыма, увядуць і ў Беларусі, — адзначыў намеснік генеральнага дырэктара па спецвытворчасці выдавецтва «Беларускі дом друку» Андрэй Лук'янчыкаў.
Ён паведаміў, што за апошнія некалькі гадоў даводзілася вырабляць самыя розныя варыянты ўзораў біяметрычнага пашпарта: з «убудаваным» у вокладку чыпам, з полікарбанатнай старонкай і г.д. Каб у будучыні працэс вытворчасці пасведчання асобы новага тыпу не выклікаў цяжкасцяў, на прадпрыемстве імкнуцца напрацоўваць вопыт у гэтай справе.
Ганна ГАРУСТОВІЧ.
Амаль тысяча дзвесце чалавек збяруцца, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.