Падчас урачыстых мерапрыемстваў парадак будзе забяспечаны.
Святкаванні, прысвечаныя 69-й гадавіне Перамогі, пройдуць 9 мая па ўсёй Беларусі. Акрамя таго, у гэты дзень пачнецца і чэмпіянат свету па хакеі. Натуральна, што на плечы сілавікоў будзе ўскладзены двайны цяжар па забеспячэнні грамадскага парадку.
— У месцах масавых мерапрыемстваў будуць арганізаваны кантрольна-прапускныя пункты, — гаворыць начальнік упраўлення аховы правапарадку Міністэрства ўнутраных спраў Іван Кубракоў.
— Допуск грамадзян у месцы масавых гулянняў будзе ажыццяўляцца пасля правядзення агляду з выкарыстаннем тэхнічных сродкаў. Мы заклікаем усіх людзей, у тым ліку і замежных гасцей, ставіцца да гэтага з разуменнем. Усе гэтыя меры перш за ўсё накіраваны на бяспеку. Тым больш што гэта агульнасусветная практыка.
Не пусцяць на мерапрыемствы людзей нападпітку. Спіс забароненых для праносу прадметаў будзе размешчаны каля кожнага кантрольна-прапускнога пункта. Азнаёміцца з ім на сайце Міністэрства ўнутраных спраў можна ўжо цяпер. Меры бяспекі 9 мая будуць узмоцнены не толькі ў сталіцы, дзе адбудуцца найбольш масавыя гулянні, але і па ўсёй краіне. Так, стане больш нарадаў патрульна-паставой службы, а таксама ДПС ДАІ.
У інтэрнэце ж з'явіліся чуткі аб тым, што 9 мая расійскія балельшчыкі нібыта маюць намер правесці ў Мінску «рускі марш». Падобная акцыя адбылася ўлетку 2012 года ў Варшаве падчас чэмпіянату Еўропы па футболе. Скончылася ж яна тады масавымі беспарадкамі.
— Ніякага «рускага маршу» ў Мінску не будзе, — падкрэсліў Іван Кубракоў. — У органы ўнутраных спраў ніхто з расійскіх балельшчыкаў заяўку на правядзенне шэсця 9 мая не падаваў. Інфармацыя аб намерах правесці такую акцыю ёсць у інтэрнэце. Яна пільна адсочваецца і трымаецца на кантролі. Органы ўнутраных спраў краіны прадпрымуць усе меры бяспекі, каб не дапусціць парушэння грамадскага парадку.
На ўзмоцнены варыянт нясення службы падчас масавых мерапрыемстваў пераведзены і падраздзяленні МНС.
— У сталіцы будуць створаны аператыўныя штабы па кантролі за сітуацыяй, — гаворыць намеснік начальніка ўпраўлення аварыйна-выратавальных службаў і ліквідацыі надзвычайных сітуацый МНС Беларусі Анатоль Балябін. — У месцах масавых гулянняў і запуску святочных салютаў ратаўнікі сканцэнтруюць дадатковыя сілы і сродкі. А на акваторыі Свіслачы ва ўзмоцненым рэжыме вахту будуць несці работнікі таварыства ратавання на водах.
Ратаўнікам, медыкам і міліцыянерам дапамогуць і валанцёры, якія добра валодаюць англійскай мовай. Яны будуць працаваць на адзіным тэлефонным нумары экстраннай дыспетчарскай службы — 112.
Валяр'ян ШКЛЕННІК.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!