Я хачу расказаць вам пра сваю маму Ларысу Міхайлаўну. Калі б вы ведалі, як я яе паважаю і люблю! Яна заўсёды клапоціцца пра нас з братам. Дапаможа зрабіць урокі, растлумачыць, падкажа. Мы заўсёды адчуваем цеплыню яе рук, дабрыню сэрца. Для нас яна і добры дарадчык і лепшы сябар. Асабліва мне падабаецца ў ёй тое, што яна ніколі не бывае ў дрэнным настроі. Гэта энергічны, жвавы, вясёлы і вельмі аптымістычны чалавек. Маці ў нашай сям'і як батарэйка, ад якой мы ўсе зараджаемся жыццялюбствам і дабрынёй.
А працуе яна кіраўніком сельскагаспадарчага вытворчага кааператыва. Усе, хто звяртаецца да яе з просьбай, застаюцца задаволенымі, бо яна кожнаму дасць параду, дапаможа, падкажа правільнае рашэнне.
Да людзей мама ставіцца з павагай, ніколі не бывае пагардлівай. Яна вельмі адказны чалавек. Калі штосьці паабяцае, то заўсёды зробіць. І што яшчэ ў ёй адметнае — яна ніколі не сядзіць на месцы і не чакае «манны нябеснай». Заўсёды дабіваецца ўсяго сама. Кожную справу даводзіць да канца. У аднавяскоўцаў карыстаецца вялікім аўтарытэтам. Нядаўна яе яшчэ раз абралі дэпутатам раённага Савета. Гаспадарка, якую яна ўзначальвае толькі чатыры гады, ужо займае першае месца ў раёне па ўсіх паказчыках. Летась маці адна з раёна ездзіла на «Дажынкі» як лепшы кіраўнік. Чаму ж мне не ганарыцца ёю?! Ды я і сам, калі скончу школу, хачу працаваць на зямлі, можа, у будучым, і кіраўніком гаспадаркі — як маці.
Чаму ў яе ўсё так добра атрымліваецца? Думаю таму, што мая маці да ўсяго ставіцца з душой, з поўнай самааддачай.
Было б добра, каб у нас стала больш такіх людзей, якія ніколі не чакаюць міласці ад Бога, а самі, сваімі рукамі робяць добрыя справы, дабіваюцца пэўных вынікаў і заўсёды ведаюць, што праца — вялікая сіла. Самаадданасць — гэта адна з самых адметных рыс характару маёй маці. Вера ў людзей і ў лепшае будучае дапамагае ёй пераадолець усе цяжкасці і з радасцю сустракаць новы дзень.
Павел ПАСЯЛЕНЦАЎ,
вучань 9 класа
Шаламоўскай базавай школы
Слаўгарадскага раёна.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».