Шмат гадоў таму, калі дзеці яшчэ не ведалі, што такое айфон, айпад і Джасцін Бібер, наш герой сплёў кальчугу. Рабіў ён яе з дроту доўга і ўпарта — цэлы год. Юнацкае захапленне гісторыяй перарасло ў прафесію. Цяпер Віктар Эдуардавіч Жук — настаўнік гісторыі сярэдняй школы № 11 горада Маладзечна.
Мы заўсёды з задавальненнем наведваем яго ўрокі, бо гэта не проста 45 хвілін «сухога» тэксту з падручніка, а цікавы і пазнавальны дыялог. Педагогу ёсць чым падзяліцца з намі. Ужо дзесяць гадоў Віктар Эдуардавіч удзельнічае ў ваенна-гістарычных рэканструкцыях, з'яўляецца ўдзельнікам гістарычнага руху і членам клуба «Тун», які займаецца рэканструкцыяй зброі і амуніцыі швейцарскай пяхоты ХІV-ХV стагоддзяў. «Сярэднявечны воін» мае свае даспехі, касцюмы і зброю. Штогод ён прымае ўдзел у розных мерапрыемствах міжнароднага фармату, гістарычных фестывалях, пастановачных, у тым ліку і масавых, бітвах.
У сям'і Віктара Эдуардавіча, акрамя яго самога, ёсць яшчэ гісторыкі: сястра — кандыдат гістарычных навук, этнолаг, а яе муж — доктар асірыялогіі (навука, якая вывучае мовы, пісьменства, культуру і гісторыю Асірыі, Вавілоніі і Месапатаміі).
— Мой лепшы сябар — малодшы навуковы супрацоўнік Акадэміі навук, археолаг. Дзякуючы яму я трапіў на раскопкі старажытных гістарычных месцаў, — з захапленнем распавядае настаўнік. — Вы не ўяўляеце, якія пачуцці адольваюць, калі ўласнымі рукамі датыкаешся да гісторыі, знайшоўшы ў зямлі астанкі нашых продкаў!
Віктар Эдуардавіч — малады педагог, які працуе ў школе толькі два з паловай гады. Але ён лічыць гэта сваёй перавагай:
— Я ведаю, якую музыку слухаюць мае вучні, якія фільмы яны глядзяць, чым яны дыхаюць. Як і многія хлопчыкі, люблю гуляць у футбол. Трымаю сувязі са сваімі падапечнымі ў сацыяльных сетках. Усё гэта дапамагае мне знайсці агульную мову з вучнямі, у гэтым і ёсць мой прафесійны сакрэт.
Віктар Эдуардавіч лічыць, што настаўнік павінен быць адданы справе, якой ён займаецца, а яшчэ — быць камунікабельным, крэатыўным, мабільным, крочыць у нагу з часам. Усе гэтыя рысы характару дапамаглі маладому педагогу стаць нядаўна пераможцам абласнога этапу рэспубліканскага конкурсу «Настаўнік года», дзе ён паўстаў у вобразе «сярэднявечнага воіна», годна прадставіўшы свой досвед у творчым этапе і падчас адкрытых урокаў і майстар-класаў.
— Такога выніку дамагчыся я не здолеў бы без дапамогі творчай групы выкладчыкаў нашай кафедры на чале з намеснікам дырэктара Галінай Пятроўнай Пішчык, — з удзячнасцю падкрэслівае педагог. — Мне даводзілася ўдзельнічаць у розных конкурсных мерапрыемствах. І паколькі я прысутнічаў амаль на ўсіх міні-ўроках сваіх калег, то запазычыў для сябе шмат новых ідэй і знаходак.
У хуткім часе яны сапраўды спатрэбяцца педагогу. Зычым Віктару Эдуардавічу поспехаў у фінале рэспубліканскага конкурсу!
Вікторыя Пажыгайла,
вучаніца 9 класа СШ № 11 г. Маладзечна.
Пра аўтара
Вікторыя любіць свойскіх жывёл і птушак. Любімы прадмет у школе — гісторыя. шмат чытае, перавагу аддае беларускай літаратуры, выбіраючы класіку. У будучыні хоча стаць бухгалтарам. Прынамсі, першая адукацыя будзе эканамічнай. Апошняе захапленне — журналістыка. Чаму? «А вось захацелася!» — тлумачыць дзяўчына прычыну гэтага цалкам самастойнага кроку. Таму з нядаўняга часу яна наведвае школу журналістыкі «Маладзік» пры Маладзечанскім цэнтры творчасці дзяцей і моладзі.
Гэта дэбютны матэрыял 15-гадовай Вікторыі. Нам думаецца, што ён стаў удалым.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».