Вось ужо 70 гадоў аддзяляюць нас ад дня вызвалення Беларусі ад нямецка-фашысцкіх захопнікаў. Выраслі новыя пакаленні, але і праз дзесяцігоддзі тэма вайны актуальнасць не страціла. Напэўна, цяпер не было б ні мяне, ні маіх бацькоў, ні маіх бабуль, каб не той шчаслівы выпадак, які адбыўся ў далёкім 1943 годзе.
Мае бацькі родам з вёскі Грабаў Жыткавіцкага раёна. Там жывуць і абедзве мае бабулі. А мы жывём за чатыры кіламетры ад іх, у вёсцы Мілевічы. Трагічны лёс Хатыні і дзясяткаў іншых вёсак падзяліла і яна. Вёску Грабаў гэтая трагедыя мінула.
Побач з маёй бабуляй жыве Марыя Кірылаўна Міхнавец. Увесну 1943 года ёй было крыху больш за пяць гадоў. Але нягледзячы на такі малы ўзрост, яна і цяпер добра памятае тое, што адбылося тады.
Марыя Кірылаўна распавядае...
— У маёй маці Харыты нас было двое: я і малодшая сястра Валянціна. Бацькі нашага ўжо не было: загінуў у першыя месяцы вайны.
У той далёкі сакавік з боку вёскі Морач ішоў на Грабаў атрад добраахвотных памагатых нямецкай арміі. Камандзірам гэтага атрада быў Радыёнаў. Па нацыянальнасці — паляк, але вельмі добра размаўляў па-руску. Услед за атрадам ішлі салдаты нямецкай арміі. На той час яны ўжо спалілі жыхароў усіх суседніх вёсак. Прыход немцаў у вёску суправаджаўся стрэламі, крыкамі... Усе ўсведамлялі, што і іх чакае такіх ж лёс...
Бабуля, маці Харыты, баялася за жыццё дачкі і ўнучак, таму хацела адправіць нас да сваёй маці, якая жыла каля самага лесу, спадзеючыся на тое, што, калі пачнецца аблава, нам удасца схавацца ў лесе. Не паспелі! Трэба ж здарыцца такому, што вышэйшыя нямецкія чыны, у тым ліку і Радыёнаў, спыніліся на ноч менавіта ў нашай хаце. Усю ноч салдаты балявалі: пілі і гулялі. Радыёнаву спадабалася мая маці. Вельмі добра запомнілася, як ён прыстаўляў пісталет да яе галавы, пагражаючы расправіцца з яе дзецьмі — з намі. Сілай ён прымусіў маці Харыту бавіць з ім час...
Раніцай таго страшнага дня, калі жыхароў вёскі загналі ў будынак школы, Радыёнаў папрасіў Харыту прыгатаваць сняданак для яго і яго паплечнікаў і абавязкова знайсці самагонку. На што Харыта жорстка і катэгарычна заявіла: «Нічога я не буду рабіць. Маю маці разам з усімі збіраешся спаліць? А можа, і мяне туды разам з дзецьмі?». Яна горка заплакала.
Радыёнаў моўчкі выйшаў і без слоў пашыбаваў да будынка школы. Тут ужо адбывалася нешта неверагоднае: гвалт, крыкі, жах, пракляцці... Дзверы зачыніліся. Ён падышоў да нямецкіх афіцэраў, перагаварыў з імі і... адчыніў дзверы! Што тут было: людзі падалі да яго ног, цалавалі боты, абдымалі. Усе разумелі, што сваім выратаваннем яны абавязаны Харыце.
Лёс вызваленых людзей склаўся па-рознаму. Адны ратаваліся ўцёкамі, хаваючыся ў лесе, іншых адправілі ў Германію.
Харыту разам з дачушкамі Радыёнаў забраў з сабой. У Старобіне нямецкія салдаты адабралі ў Харыты дзяцей. Яна была ў роспачы. Радыёнаў тут ёй нічым не мог дапамагчы. Цудам маці ўдалося ўцячы і знайсці сваіх дзяцей. Пешшу, лесам, пужаючыся кожнага гуку, яна вярнулася ў Грабаў. Хутка зразумела: цяжарная... Нарадзіўся хлопчык. Мы радаваліся свайму браціку і аберагалі яго ад усялякіх хвароб. Але пасля вайны лютаваў тыф. Чатыры годзікі было нашаму браціку, калі ён памёр.
Усё жыццё з павагай ставіліся аднавяскоўцы да Харыты, расказваючы дзецям шчымлівую гісторыю свайго ўратавання. Харыта сама выгадавала дзвюх дачок, дачакалася ўнукаў і праўнукаў.
Мяне глыбока кранула гісторыя, расказаная Марыяй Кірылаўнай. Бо тады, у будынку той школы, ва ўзросце чатырох месяцаў разам са сваёй маці была і мая бабуля, Вера Аляксандраўна Міхнавец...
Яніна МІХНАВЕЦ,
вучаніца 11 класа
Мілевіцкага дзіцячага сада—сярэдняй школы Жыткавіцкага раёна.
Пра аўтара
— Пра сябе скажу проста — люблю жыццё! Люблю сваіх бацькоў, сяброў, школу. Больш за ўсё мяне прыцягваюць маленькія дзеці, іх непасрэднасць і шчырасць. Таму мару свой далейшы лёс звязаць менавіта з імі. Вучыцца буду абавязкова ў Мінску, — распавяла 17-гадовая аўтарка.
Сваё жаданне Яніна падмацоўвае добрай вучобай і пазакласнай дзейнасцю. Дзяўчына ўдзельнічае ў даследчых, навуковых канферэнцыях па літаратуры. Дарэчы, гэта яе любімы прадмет. Уменне прыгожа гаварыць зрабіла Яніну нязменнай вядучай мерапрыемстваў не толькі ў школе, але і па-за ёй. У вольны час аўтарка наведвае спартыўныя секцыі, вакальны гурток і гурток «Юны журналіст». Яшчэ яна захапляецца вязаннем.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».