Лічаныя дні засталіся да заканчэння рэгістрацыі абітурыентаў на цэнтралізаванае тэсціраванне. Таму тым, хто яшчэ не знайшоў час, каб запасціся пропускамі на тэсты, трэба паспяшацца. У Рэспубліканскім інстытуце кантролю ведаў нагадалі, што ў бліжэйшую суботу і нядзелю пункты рэгістрацыі таксама будуць працаваць. Але 1 чэрвеня ў 18 гадзін іх дзверы зачыняцца, і аўтаматызаваная сістэма рэгістрацыі будзе адключана. На наступны дзень ні ў каго з тых, хто спазніўся, дакументы прымацца ўжо не будуць.
— Просім абітурыентаў пасля 1 чэрвеня нас не турбаваць, — папярэджвае дырэктар інстытута Мікалай ФЯСЬКОЎ. — Правілы — агульныя для ўсіх. А месяц — дастатковы тэрмін для таго, каб прайсці працэдуру рэгістрацыі. Ёсць, напрыклад, расклад руху цягнікоў ці самалётаў. І калі чалавек з нейкай прычыны спазняецца на цягнік, няхай і па самай уважлівай, ніхто ж не вяртае састаў назад на станцыю. І таму, хто спазніўся, не прыходзіць у галаву скардзіцца на чыгунку, а даводзіцца чакаць іншага цягніка... Тое ж і з рэгістрацыяй на тэсціраванне. Спазніўся — чакай наступнай прыёмнай кампаніі...
Між іншым, арганізатары ЦТ заўважылі, што ў апошні дзень пункты рэгістрацыі ніколі не пустуюць. Так, летась амаль 4 тысячы абітурыентаў прыйшлі ў пункты рэгістрацыі ўдзельнікаў цэнтралізаванага тэсціравання менавіта 1 чэрвеня.
Па інфармацыі Рэспубліканскага інстытута кантролю ведаў, за пяць дзён да заканчэння рэгістрацыі пропускі на тэсціраванне аформілі сабе 75,5 тысячы чалавек. Летась на цэнтралізаванае тэсціраванне зарэгістраваліся амаль 118 тысяч чалавек, а ў папярэднім годзе — 141,5 тысячы. Відавочна, што сёлета колькасць прэтэндэнтаў на месца ў ВНУ або сярэдняй спецыяльнай навучальнай установе зменшыцца ў чарговы раз. І хоць у апошнія дні абітурыенты крыху актывізаваліся, арганізатары мяркуюць, што колькасць тых, хто зарэгіструецца на тэсціраванне, будзе недзе ў межах 100 тысяч. Дакладна вядома, што колькасць выпускнікоў агульнаадукацыйных школ зменшылася ў параўнанні з папярэднім годам на 6%: з 11-х класаў выпускаюцца 55 тысяч чалавек.
Мікалай Фяськоў расказаў, што самая вялікая колькасць абітурыентаў — каля 56 тысяч — зарэгістравалася для здачы тэста па рускай мове. А на тэсціраванне па беларускай мове аформілі пропускі 19,5 тысячы чалавек. Дарэчы, гісторыю Беларусі на беларускай мове сёлета пажадалі здаваць усяго каля 15% ад агульнай колькасці зарэгістраваных. На іншых дысцыплінах колькасць беларускамоўных абітурыентаў вагаецца ў межах 5—6%, а грамадазнаўства на роднай мове будуць пісаць толькі 2% удзельнікаў тэсціравання па гэтым прадмеце. Як бачым, з кожным годам становіцца ўсё менш тых, хто робіць на цэнтралізаваным тэсціраванні свой выбар на карысць роднай мовы.
Жаданне здаваць на ЦТ фізіку выказалі пакуль што 21,5 тысячы чалавек, хімію — 10,5 тысячы, біялогію — 16,3 тысячы. А на англійскую мову нацэліліся каля 14 тысяч абітурыентаў.
Некаторых абітурыентаў цікавіць, ці могуць яны змяніць кола экзаменацыйных дысцыплін, калі тры пропускі на цэнтралізаванае тэсціраванне яны паспелі аформіць раней. Такое права ў абітурыентаў ёсць, але толькі да заканчэння тэрміну рэгістрацыі — гэта значыць, да 1 чэрвеня. Для гэтага ім трэба звярнуцца ў пункт рэгістрацыі з пропускам па тым прадмеце, які трэба замяніць, і квітанцыяй аб аплаце і аформіць пропуск для ўдзелу ў ЦТ па іншай дысцыпліне. У выпадку страты пропуска на ЦТ абітурыенту таксама трэба звяртацца ў пункт рэгістрацыі, каб атрымаць дублікат.
Ёсць абітурыенты, якія загадзя цікавяцца магчымасцю здаць тэсціраванне ў рэзервовы дзень, а таксама магчымасцю здаваць тэсціраванне па копіі пашпарта.
— Да здачы тэст-экзамену ў рэзервовы дзень будуць дапускацца толькі абітурыенты, якія змогуць даказаць, што ў іх былі сур'ёзныя прычыны для таго, каб прапусціць экзамен: напрыклад, прад'явяць даведку пра сваю хваробу. Дарэчы, экзамен у ДАІ не з'яўляецца ўважлівай прычынай для пропуску цэнтралізаванага тэсціравання ў вызначаны графікам дзень, — папярэдзіў Мікалай Фяськоў. — Да таго ж у рэзервовы дзень можна будзе здаць толькі адну вучэбную дысцыпліну. А для таго, каб цябе прапусцілі ў экзаменацыйную аўдыторыю, абавязкова трэба мець з сабой дакумент, які сведчыць асобу ўдзельніка ЦТ. Гэта можа быць пашпарт, від на жыхарства ў Рэспубліцы Беларусь, пасведчанне бежанца ці даведка органаў унутраных спраў, якая выдаецца ў выпадку страты (крадзяжу) дакумента. Тлумачэнні кшталту «мой пашпарт у пасольстве» пад увагу брацца не будуць. Вадзіцельскае пасведчанне для праходжання тэсціравання таксама не падыходзіць
Традыцыйна ЦТ стартуе са здачы абітурыентамі тэсціравання па беларускай мове. Сёлета першы тэст прыпадае на суботу 14 чэрвеня, а ў нядзелю 15 чэрвеня абітурыенты будуць здаваць рускую мову, 17-га — грамадазнаўства, 19-га — біялогію, 20-га — матэматыку, 22-га — гісторыю Беларусі, 23-га — хімію, 24-га — фізіку, 25-га — сусветную гісторыю найноўшага часу, 27-га — замежныя мовы і 28 чэрвеня — геаграфію.
Што тычыцца ніжняга парогу на ЦТ, то ён застаўся на мінулагоднім узроўні. Для таго, каб мець магчымасць падаць дакументы ў ВНУ, абітурыенты павінны будуць набраць не менш як 10 балаў на ЦТ па рускай і беларускай мове, 15 балаў — на ЦТ па матэматыцы, фізіцы, хіміі і біялогі і 20 балаў — на тэсціраванні па гісторыі Беларусі, сусветнай гісторыі найноўшага часу, грамадазнаўстве, геаграфіі і замежных мовах.
Але з'явіліся паслабленні для тых, хто будзе паступаць у рамках дадатковага набору ў дзяржаўныя ВНУ на бюджэтныя месцы, што засталіся вакантнымі пасля залічэння абітурыентаў. Для іх гэты парог будзе ніжэйшы на 5 балаў: у сертыфікатах па рускай і беларускай мовах абітурыентам дастаткова мець не менш як 5 балаў, па матэматыцы, фізіцы, хіміі і біялогіі — 10 балаў і 15 балаў — па гісторыі Беларусі, сусветнай гісторыі найноўшага часу, грамадазнаўстве, геаграфіі і замежных мовах.
Надзея НІКАЛАЕВА.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.