На краіну свежымі вачыма паглядзелі не толькі турысты, але і самі беларусы
Рэкорд наведвання матчаў, сёмае месца айчыннай зборнай, шчырая цікавасць да беларускіх славутасцяў... Гэта толькі частка вынікаў праведзенага сусветнага першынства па хакеі. Учора ў Савеце Міністраў на апошнім пасяджэнні арганізацыйнага камітэта па правядзенні чэмпіянату свету падлічылі выгады.
Нацыянальнае свята
Прэм'ер-міністр Міхаіл Мясніковіч нагадаў, што падрыхтоўка да спаборніцтва цягнулася 5 гадоў. «І мы цяпер пасля ўсяго можам сказаць, што нашай краіне па сілах вырашаць самыя складаныя і адказныя задачы. Гэта была тонкая праца. Трэба было дагадзіць усім гасцям, і зрабіць гэта карэктна. Я думаю, што мы можам прэтэндаваць на правядзенне і іншых буйных міжнародных мерапрыемстваў», — заявіў прэм'ер. Кіраўнік урада звярнуў увагу на тое, што за ўвесь час не заўважыў ніводнага абыякавага чалавека: «Гэта быў сапраўдны пад'ём — эмацыянальны і патрыятычны».
Той жа думкі прытрымліваецца намеснік прэм'ер-міністра Анатоль Тозік: «Мы сталі іншымі. Я лічу, што чэмпіянат значна паўплываў на нашу моладзь, на іх патрыятычную свядомасць. Мы ўбачылі, што жыхары тых краін, якія мы лічым узорам развіцця, захапляліся нашай краінай». Для падтрымання патрыятычнага настрою віцэ-прэм'ер прапанаваў выкарыстоўваць дзяржаўную сімволіку ў паўсядзённым жыцці больш шырока.
Патрыятычны ўздым адзначыў і Яўген Ворсін, старшыня Федэрацыі хакея Беларусі, кіраўнік Дырэкцыі па правядзенні чэмпіянату свету па хакеі з шайбай: «Прыемна, што гэты чэмпіянат пераўтварыўся ў сапраўднае нацыянальнае свята. Як мінімум на гэтыя дні нашай нацыянальнай ідэяй стала ідэя спорту».
Добра частаваліся
Сваю ацэнку даў міністр гандлю Валянцін Чэканаў: «Гандаль, грамадскае харчаванне і бытавое абслугоўванне спрацавалі, на наш погляд, вельмі добра. У пяці фан-зонах нагандлявалі на 47 млрд рублёў. Было выпіта 420 тысяч літраў беларускага піва. Таксама было прададзена вельмі шмат беларускіх сувеніраў». Дарэчы, асаблівым попытам, па словах міністра, карыстаецца сувенірная прадукцыя, якая з'явілася ў продажы пасля заканчэння спаборніцтва. «Такое ўражанне, што людзі спецыяльна засталіся, каб дакупіць нашых сувеніраў, бо мы з лютага імі не гандлявалі. Мы нават заказалі дадатковыя партыі», — паведаміў Валянцін Чэканаў.
Анатоль Тозік таксама прывёў некалькі фактаў. Напрыклад, пра рэкорд па наведванні матчаў: усяго на 64 гульнях чэмпіянату пабывалі 651 314 заўзятараў. Паводле слоў віцэ-прэм'ера, апраўдала сябе і ўвядзенне бязвізавага рэжыму. Агульная колькасць замежных турыстаў, гасцей і ўдзельнікаў чэмпіянату — больш за 80 тысяч чалавек. Цікава, што госці наведвалі не толькі хакейныя матчы, але і бавілі час у экскурсіях па беларускіх славутасцях. Так, падчас чэмпіянату Брэсцкую крэпасць наведала ў 4,5 раза больш турыстаў, чым у аналагічны перыяд мінулага года. Наведванне замкавага комплексу «Мір» вырасла ў 3,6 раза, музея-запаведніка «Нясвіж» — у 3,2 раза. Пасля такіх вандровак турысты і добра елі. «Штодзень у зонах гасціннасці прадавалася больш за 300 кг дранікаў са смятанай. Практычна кожны госць чэмпіянату пакаштаваў гэтую нацыянальную страву», — паведаміў Анатоль Тозік.
Уладзіслаў КУЛЕЦКІ.
Амаль тысяча дзвесце чалавек сабраліся, каб вырашаць найважнейшыя пытанні развіцця краіны.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.