Шаноўныя чытачы, мы ўдзячны вам за тое, што дасылаеце свае водгукі на выпускі краязнаўчай старонкі «Ігуменскі тракт». Для нас гэта найлепшая ацэнка працы — ваша цікавасць, тыя думкі і развагі, якія з'яўляюцца ў адказ на публікацыі. Чарговы ліст даслала Соф'я Парфір'еўна Кусянкова:
«Я з'яўляюся вашай падпісчыцай з 1989 года, да таго ж ідэйным і пастаянным аўтарам з 2002 года. «Звязду» пачала выпісваць прынцыпова — стала вельмі крыўдна за пагадлівае стаўленне да роднай мовы. У кагосьці яна не ў пашане, хтосьці яе саромеецца. Не паважаць родную мову — гэта тое ж самае, што не паважаць продкаў: яны ж на ёй гаварылі. Цяпер я выпісваю толькі «Звязду». Дзякуючы ёй я адкрыла мову ў сабе і сябе ў мове.
Псіхолагі кажуць, што гаварыць на роднай мове карысна для здароўя, бо гэта не патрабуе дадатковых высілкаў, як пры карыстанні набытай мовай. Гэта як свой ген і трансген.
У «Звяздзе» ёсць усё, што патрэбна. Не зраблю адкрыцця, калі заўважу, што акрамя таго, што газета трымаецца сваіх лепшых традыцый, яна ідзе ў нагу з часам і заўсёды ў пошуку новых праектаў. На мой погляд, праект працуе, калі ўзнікае зваротная сувязь з чытачом. Вось я і хачу выказаць сваю думку і падзяку за праект «Ігуменскі тракт». Прываблівае ўжо сама назва, яе сувязь з каранямі. Які б ні быў мітуслівы цяперашні час, да сваіх каранёў, да Радзімы, яе гісторыі людзі неабыякавыя. Узмацняецца цікавасць да свайго радаводу, гісторыі населенага пункта і г. д. І «Ігуменскі тракт» у гэтым сэнсе трапіў «у яблыка», ён запатрабаваны. Пра тое сведчыць конкурс «Мясціны, знітаваныя з душой», які таксама адбыўся і працягваецца. Людзі пішуць свае гісторыі, а значыць, гісторыю ўсёй краіны. Мінулае, як вядома, часта фальсіфікавалася, шмат што проста замоўчвалася. А тут друкуюцца непрыдуманыя непафарбаваныя аповеды. Можа аказацца, што згадаецца нейкі факт, і ў гісторыкаў з'явіцца зачэпка, каб адкрыць невядомыя старонкі нашай даўніны.
З часам многае, нават адметнае, проста сыходзіць у нябыт, таму што адыходзяць сведкі, сведчанні якіх не знайшлося каму занатаваць.
У «Мясціны» я пісала нарыс «Царква стала мостам» — пра гісторыю лучынскай царквы, якая існавала з 1172 года да 1943, калі яе ўзарвалі немцы, каб разабраць на будматэрыялы для моста цераз Дняпро. І вось жа ўпушчэнне — ужо пасля публікацыі даведалася, што, аказваецца, перад тым, як узарваць, немцы сабралі культавыя рэчы (вядома ж, найбольш каштоўнае забраўшы сабе), склалі ў вялікі куфар і сказалі, што іх можа забіраць, хто захоча. Кажуць, забраў дзед Гайдук. А вось куды гэтыя рэчы потым падзеліся, ніхто не ведае. Помню, што ў многіх былі старыя царкоўныя кнігі. На пачатку 1990‑ых, калі ў людзей не было грошай, помню, прадавалася Біблія 1905 года, прадаваўся самавар Баташова 1854 года, прадаваліся крамнёвыя сякеры (вакол Лучына многа паселішчаў каменнага веку). Усё тады скуплялі антыквары.
Быццам і нядаўна гэта было, але ўжо не верыш. Гэтак жа знікаюць і звесткі аб пэўных падзеях. Таму мы павінны іх збіраць і захоўваць, і ў гэтым можа паспрыяць «Ігуменскі тракт», зрабіўшы такія звесткі набыткам гісторыі і гісторыкаў.
У сваім нарысе я пісала, што ў «Ладдзі роспачы» Уладзімір Караткевіч згадваў «Летапіс царквы святога Міхаіла», што ў Лучыне. Караткевіч працаваў і ў Магілёўскім, і ў Віленскім архівах. Значыць, ён трымаў у руках гэты летапіс, значыць, ён існуе.
У мяне з'явілася ідэя знайсці сляды гэтага летапісу. Паўстала пытанне — чаму пра яго нічога невядома? Мо там шмат каштоўных, але невядомых гістарычных фактаў нашай Радзімы? Усё ж Лучын з ХІІ стагоддзя з'яўляўся значным пунктам на скрыжаванні часоў і тэрыторый, дзе вырашаліся лёсы дзяржаў. І яшчэ да ХVІ стагоддзя ён значыўся ў ліку 48 гарадоў ВКЛ, якія мелі права браць мыта пры таваразвароце на Дняпры. Вось якраз «Ігуменскі тракт» і ёсць той дапаможнік, дзякуючы якому можна пайсці па следзе лучынскага летапіса, падключыць навукоўцаў. Мо гэта стане калі не адкрыццём у навуцы, то значнай з'явай.
Гэтак жа кожнаму дарагая гісторыя свайго краю. І разам мы пішам непрыдуманую, часам невядомую гісторыю. А пакуль «Ігуменскі тракт» варты таго, каб тыя, хто неабыякавы, стварылі спецыяльныя папкі па яго матэрыялах. Дакладна магу сказаць, у Лучыне гэта ўжо робіцца. Асабліва, калі выходзяць матэрыялы пра наш край.
Лучын-на-Дняпры, Рагачоўскі раён».
Ад рэдакцыі
Падчас «круглага стала» ў рэдакцыі «Звязды», прысвечанага практычнаму краязнаўству, яго ўдзельнікі нямала гаварылі аб ролі краязнаўцаў-аматараў, якія на месцы пішуць гісторыю малой радзімы (гл. публікацыю «Спазнаваць радзіму і саміх сябе» ў нумары ад 29 мая). Сярод нашых чытачоў ёсць такія краязнаўцы, і ліст спадарыні Кусянковай — таму сведчанне. Цяпер, калі з'яўляецца магчымасць сабраць плён вашай даследчыцкай працы, не маўчыце, пішыце пра сябе, свае адкрыцці і знаходкі ў родную газету! У межах сумежнага з РГА «Белая русь» праекта «Край, дзе я жыву» мы зможам захаваць для нашых дзяцей і ўнукаў звесткі аб кожнай вёсачцы, ведаючы пры гэтым, што ўсе гісторыі — непаўторныя і ўнікальныя.
Чакаем вашых допісаў! Далучайцеся — будзе цікава!
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».