На месцы лагера смерці Трасцянец пачалася праца па стварэнні сучаснага мемарыяла. Прадстаўнікі з Беларусі, Германіі, Аўстрыі і Чэхіі абмяркоўваюць, якім будзе яго сэнсавае напаўненне
Сціплы абеліск, размешчаны ўздоўж Магілёўскай шашы, а таксама невялічкія помнікі на месцы былога лагера смерці Трасцянец неўзабаве ператворацца ў сучасны мемарыял. Размовы аб гэтым вяліся даўно, не за адзін дзень распрацоўваліся і праекты будучага месца памяці. Кропкай адліку ў ажыццяўленні ідэі стала цырымонія закладкі спецыяльнай капсулы на месцы стварэння мемарыяла Трасцянец. У прысутнасці кіраўніка нашай дзяржавы прадстаўнікі з Германіі, Аўстрыі і Чэхіі перадалі спісы загінулых у адным з буйнейшых канцлагераў Еўропы.
Стварэнне мемарыяла адбудзецца паэтапна. Першую чаргу будаўніцтва плануюць завяршыць да 9 мая 2015 года. Паколькі ў Трасцянцы не захавалася аўтэнтычных збудаванняў, будучы мемарыял перш за ўсё будзе ўздзейнічаць на наведвальнікаў эмацыянальна праз архітэктуру новых пабудоў.
— Будаўніцтва мемарыяла — толькі першы крок, — зазначыў дырэктар Мінскага міжнароднага адукацыйнага цэнтра імя Ё. Раў Віктар БАЛАКІРАЎ. — Існуе шмат прыкладаў таго, калі ёсць мемарыялы, але каля іх нічога не адбываецца. Таму вельмі важны другі крок, які заключаецца ў тым, каб напоўніць жыццём мемарыяльны комплекс. Для таго, каб ён адпавядаў таму прызначэнню, дзеля чаго ствараўся. Маецца на ўвазе інфармацыйна-адукацыйная работа, якая павінна праводзіцца на базе такіх мемарыялаў.
Сапраўды, каб вялася даследчыцкая работа, а таксама знаёмства, у першую чаргу моладзі, са злачынствамі фашыстаў у Трасцянцы, неабходна распрацаваць спецыяльную адукацыйна-педагагічную праграму. Улічваючы тое, што ў беларускім лагеры смерці загінулі жыхары і з заходнееўрапейскіх краін, гэтае месца вельмі падыходзіць для развіцця сумеснай культуры памяці.
Таму пакуль будуецца мемарыял, гэты час патрэбна выкарыстаць для распрацоўкі сумеснай праграмы. Дзеля гэтага ў Мінску і сабраліся навукоўцы-гісторыкі, музейшчыкі і грамадскія дзеячы. У беларусаў з'явілася ўнікальная магчымасць пазнаёміцца з вопытам працы падобных еўрапейскіх мемарыялаў. Каб стварыць свой — такі, як усюды, і ў той жа час, непаўторны, нават унікальны.
У Кёльне, напрыклад, існуе Дакументацыйны цэнтр нацыянал-сацыялізму. Гэта не толькі сховішча інфармацыі, але і бібліятэка, выставачная зала, адукацыйны, навукова-даследчы цэнтр, мемарыял ахвярам нацызму. У гэтым будынку з 1935 па 1945 год знаходзілася штаб-кватэра тайнай дзяржаўнай паліцыі (гестапа). На верхніх паверхах будынка дзейнічае пастаянная экспазіцыя, прысвечаная нацысцкаму перыяду ў гісторыі Кёльна і наогул Германіі. Школьныя групы ідуць бясконцым патокам, але ўся інфармацыя прадстаўлена на нямецкай мове, так што ствараецца ўражанне, што гэты музей, хутчэй, для ўнутранага карыстання, для своеасаблівай вакцынацыі падрастаючага пакалення ад карычневай чумы.
— Па будынку адбываецца каля 1700 экскурсій і больш чым 200 мерапрыемстваў у год, чым падкрэсліваецца значэнне педагагічнай работы з насельніцтвам, — расказаў доктар Вернер ЮНГ. — Вядома, усё выглядае не так пагрозліва, як было ў часы нацыянал-сацыялізму. На працягу апошніх 12 гадоў кожны год фіксуем новы «рэкорд» наведвальнікаў. Нас часта пытаюць: «Ці цікавяцца маладыя людзі?» На жаль, не. Каб у іх з'явілася цікавасць, патрэбныя новыя формы і метады: усё залежыць ад таго, як падаць інфармацыю. На высокім узроўні ў нас наладжана даследчыцкая праца. Па-ранейшаму працягваецца збор дакументаў, выдаюцца асобныя кнігі і дыдактычныя брашуры.
Мемарыял у Тэрэзіенштаце, што ў Чэхіі, з'явіўся ў 1947 годзе. Асаблівая ўвага да адукацыйнай працы пачала праяўляцца толькі ў 1989 годзе. Аднак турысты, якія прыязджаюць у горад (а іх вельмі шмат), не вельмі жадаюць паглядзець месца, дзе адбываліся жорсткія злачынствы.
— Мы паспрабавалі змяніць сітуацыю, пачаўшы самі запрашаць людзей, — паведаміў супрацоўнік мемарыяла ў Тэрэзіенштаце, доктар Войцех БЛОДЗІХ. — З'явіліся перадумовы пераадолення бар'ераў мінулага. Наш асноўны кірунак працы — даследаванне гісторыі. Мы змагаемся супраць гістарычных скажэнняў, спрабуем запаўняць белыя плямы. На базе нашага адукацыйнага аддзела праводзяцца сустрэчы з моладдзю, ладзяцца тэматычныя семінары. Праграмы разлічаны на шырокую аўдыторыю і падаюцца з улікам узросту. Таксама наладжаны дыялог са сведкамі. У межах спецыяльнага праекта са школьнікамі мы наведваем і іншыя месцы пахаванняў ва ўсёй Чэхіі.
Першае месца па наведвальнасці ў Чэхіі займае Яўрэйскі музей у Празе. Заснаваны ў 1906 годзе, ён і сёння прыцягвае ўвагу турыстаў з усяго свету. Больш ні адзін музей у свеце не мае столькі яўрэйскіх артэфактаў! Таму справядліва, што ён лічыцца адным з найбольш вялікіх сярод падобных музеяў у Еўропе.
Сёння музей уяўляе сабой комплекс будынкаў, якія захоўваюць спадчыну яўрэяў. Яго экспазіцыя налічвае больш чым 40 тысяч экспанатаў і 100 тысяч кніг. На тэрыторыі размешчаны 4 сінагогі, зала, у якой праводзяць абрады, і нават старыя могілкі.
— У нас прадстаўлены цэлы шэраг шматлікіх культурных, адукацыйных і асветніцкіх праграм, — падкрэсліла доктар Яна ШПЛІХАЛАВА. — Рэгулярна адбываецца апрацоўка лістоў і дакументаў перыяду Другой сусветнай вайны. Можам пахваліцца ўнікальнай калекцыяй таго часу, якая змяшчае разнастайныя матэрыялы: афіцыйныя дакументы, асабістыя рэчы, літаратурную творчасць... Шматлікія матэрыялы мы пераводзім у лічбавы варыянт і публікуем іх у інтэрнэце. Гэта вельмі карысна людзям, якія займаюцца гэтай праблемай. Асноўная частка нашых архіваў, якія мы таксама апрацоўваем, датуецца да 1945 года. Папаўняецца за кошт лістоў яўрэйскіх абшчын, якія захаваліся дагэтуль, сямейных архіваў. Таксама наладжана работа са сведкамі, размовы з якімі ў нас захоўваюцца і ў аўдыя-/відэаверсіях. Выставы, якія мы ў асноўным рыхтуем па тэме халакосту, збіраюць наведвальнікаў амаль з усяго свету.
Такім чынам, беларусам ёсць у каго павучыцца. Аднак вырашаць, якой будзе адукацыйна-педагагічная праграма ў Трасцянцы, толькі нам. Трэба мець на ўвазе, што ў многім ад гэтай канцэпцыі будзе залежаць развіццё агульнаеўрапейскай культуры памяці.
Толькі патрэбна ўлічваць адзін аспект. Вядучы спецыяліст Дакументальнага цэнтра «Тапаграфія тэрору» Томас ЛУТЦ папярэдзіў, што рэакцыя людзей на мемарыялы разнастайная. «Калі гаварыць аб міжнародным супрацоўніцтве, то ў большасці краін палітыка культуры памяці праводзіцца на дзяржаўным узроўні, — расказаў прадстаўнік Германіі. — Аднак тая ж Іспанія, напрыклад, у еўрапейскай дыскусіі ўвогуле не ўдзельнічае. У Германіі праводзіцца шэраг мерапрыемстваў, якія тычацца культуры памяці. Праўда, спачатку тут роля нацыянал-сацыялізму замоўчвалася. Першыя дзесяцігоддзі пасля вайны ў некаторых краінах існавала культура памяці, якая падкрэслівала ролю нацыяналізму, існавала палітычная калабарацыя, улічваліся толькі нацыянальныя інтарэсы Германіі. У Беларусі культура памяці іншая. Тут улічваецца гераізм народа ў Вялікай Айчыннай вайне, палітыка арыентавана на ўвекавечванне яго подзвігу, ветэраны атрымліваюць падтрымку ў дзяржавы. Гісторыя шматгранная, і белыя плямы патрэбна ліквідаваць. І тут вельмі важна ўлічваць не толькі нацыянальныя асаблівасці, але і міжнародныя».
Вераніка КАНЮТА.
Мерапрыемства праводзіцца на добраахвотнай аснове.
Не выявіць ні секунды абыякавасці.