Бывае, жыццё падкідвае такія крутыя віражы, што і не мроіліся сцэнарыстам папулярных серыялаў... Гэта — пра іх, Віталя і Алену Кавалёвых. Яны пазнаёміліся яшчэ падчас вучобы (ён — курсант лётнага вучылішча, яна — будучая настаўніца гісторыі) і наўрад ці зазіралі настолькі далёка ў будучыню, каб прадбачыць, што асядуць у Беларусі і народзяць 6 дзяцей. А яшчэ пераадолеюць разам шэраг няпростых выпрабаванняў лёсу і прыйдуць да веры — таксама разам.
...За дзвярыма ў вялікую і адначасова ўтульную кватэру Кавалёвых нас сустракае цэлы дзіцячы дэсант: Сярожа на правах старэйшага паказвае, дзе разувацца; Ульяна і Крысціна праводзяць у гасцёўню, а маленькі Вова «патрулюе тэрыторыю» на самакаце, пакуль дарослыя вядуць гаворку. Крыху пазней прыходзіць з заняткаў Оля. У старэйшай з дачок, Машы, цяпер сесія, а старэйшы сын Дзяніс (не, ужо айцец Дыянісій), скончыўшы Жыровіцкую духоўную семінарыю, ажаніўся і жыве асобна.
— Мы сустрэліся, калі я яшчэ вучылася ў школе. Мая сям'я жыла ў Падмаскоўі, але перыядычна наведвалася да сваякоў у Валгаград, дзе вучыўся Віталь. І я пасля даволі працяглага трохгадовага рамана ў лістах ужо ведала, што буду жонкай афіцэра, таму выбар прафесіі ў пэўнай ступені быў наканаваны. Выбірала не вузкую спецыяльнасць, а тое, што магло спатрэбіцца ў жыцці. Праўда, потым высветлілася, што і гэта не асабліва спатрэбілася, — смяецца Алена Іванаўна.
Пра змену прапіскі і светапогляду
Выпускніка Качынскага вышэйшага вайсковага авіяцыйнага вучылішча, лейтэнанта Віталя Кавалёва накіравалі ў групу савецкіх войскаў у Германіі, дзе маладая сям'я пражыла 4 гады. Калі ж гэты кантынгент войскаў на пачатку 1990-х з Германіі выводзілі, Савецкі Саюз ужо не існаваў, і перспектывы ў армейцаў былі, мякка кажучы, цьмянымі: альбо накіравацца ў Туркменскую вайсковую акругу і кватараваць літаральна ў намётах у стэпе, альбо самім шукаць прызначэнне і хоць якое жытло. Паехалі ў Гродна, дзе сям'ю ўзяла пад крыло бабуля Віталя Уладзіміравіча і дзе з'явіўся на свет першынец, Дзяніс. Потым тату перавялі ў Баравуху, што пад Наваполацкам. Там нарадзілася старэйшая дачка Маша. «Хрысціць яе паехалі на радзіму да жонкі, у Сергіеў Пасад, — узгадвае бацька вялікага сямейства, — а з лёгкай рукі Аленінай сяброўкі і мяне пахрысцілі. Спачатку падалося цяжкавата прытрымлівацца царкоўных канонаў. Паступова неяк уцягнуліся і ўжо самастойна прыйшлі да веры. А праз веру, магчыма, і да вялікай сям'і». Далей — у Гродна, потым у Мінск — сям'я ўжо ішла ўцаркоўленай.
— Нейкіх строгіх абмежаванняў у нашай сям'і няма. Але праваслаўныя традыцыі выконваем — пост, штотыднёвае наведванне храма, далучэнне да сакраменту, — пералічвае Алена Іванаўна. Мабыць, таму не дзіўна, што іх старэйшы сын, яшчэ маленькім паспрабаваўшы сябе памочнікам настаяцеля ў храме і наведаўшы нядзельную школу, пазней пайшоў вучыцца ў семінарыю. Хоць для бацькоў гэты выбар у пэўным сэнсе быў нечаканым і спантанным: Дзяніс паступіў у тэхнічны каледж, яму добра даваліся дакладныя навукі — і раптам такая рэзкая змена «курсу»... Але адгаворваць не сталі: ні тады, калі сын вырашыў аддаць доўг Радзіме і пайшоў з апошняга курса ў армію, ні тады, калі абраў шлях духоўнага служэння.
Наогул, усе дзеці Кавалёвых чымсьці цікавяцца па-за вучобай, а бацькі дапамагаюць ім раскрыцца. Так, Оля — кандыдат у майстры спорту па мастацкай гімнастыцы і ўладальніца калекцыі медалёў з міжнародных спаборніцтваў, Ульяна вучыцца ў музычнай школе па класе фартэпіяна і выконвае на конкурсах джазавыя кампазіцыі...
— Атрымліваецца, вы збольшага дэмакратычныя бацькі?
— Не, даволі строгія, — мяркуе Алена Іванаўна.
— Добрыя! Але мама дабрэйшая, — удакладняюць дзеці. Зразумела: тата — падпалкоўнік у адстаўцы — як усякі ваенны, любіць дакладнасць і канкрэтыку, затое матулінай спагадлівасці хапае на ўсіх. «Нават на ўнукаў, калі тыя з'явяцца, — мы ўжо гатовы маральна плаўна перайсці са статусу бацькоў у статус бабулі і дзеда», — смяюцца Кавалёвы.
— У мяне быў крызіс выбару. Да таго, як з'явілася чацвёртае дзіця — Уля, я будавала планы наконт далейшага развіцця ў прафесіі: хацелася і аспірантуру скончыць, і кандыдацкую абараніць, у навуку пайсці... Але потым усвядоміла, што трэба кардынальна змяняць светапогляд і змірыцца з тым, што ў мяне, відаць, іншае прызванне ў жыцці, — мякка ўсміхаецца Алена Кавалёва. — Калі Бог дае дзяцей, я абсалютна пераканана: гэта не выпадковасць, а Яго задума. Напэўна, у кожнага ў жыцці здараецца момант складанага выбару паміж тым, што табе хацелася б зрабіць, і тым, як складваюцца жыццёвыя абставіны. І тут варта прыслухацца да таго, што дасылаецца зверху. Гэта не значыць, што мы знаходзімся ў нейкай эйфарыі і ўсё ўвесь час ідзе гладка і ўзорна-паказальна. Не, безумоўна, гэта вельмі цяжка. Мне ёсць з чым параўноўваць. У адрозненне ад тых шматдзетных мам, якія пасля вяселля адразу нарадзілі адно, другое дзіця і ішлі з дэкрэту ў дэкрэт, у нас паміж некаторымі дзецьмі розніца ў 5 гадоў. Так што я пабывала і ў «скуры» працуючай мамы з дзецьмі, і ў стане, калі твая галоўная прафесія — мама. Розніца вялікая, і сапраўды, калі малых некалькі, гэта вельмі цяжка.
— Калі дзеці падраслі, пачыналі дапамагаць па доме?
— Цяпер пачалася «адпускная пара» ў школах, таму я з чыстым сумленнем магу даць дзяўчаткам анучы ў рукі, Сярожу — пыласос, і прыборка робіцца значна хутчэйшай і больш эфектыўнай.
— У кожнага ёсць хоць маленькі, але свой абавязак, — дадае бацька. — Хто даглядае і прыбірае за кошкай, хто ў краму сходзіць, хто смецце выносіць...
А яшчэ яны ўсе разам рыхтуюцца да свят. Самыя любімыя ў сям'і — Каляды і Вялікдзень. Запамінальнымі стараюцца зрабіць і дзіцячыя дні нараджэння — то апрануцца ўсе ў адмысловыя касцюмы, то паклічуць дадому казачных персанажаў... Калі выпадае час, проста гуляюць то ў Батанічным садзе, то ў зялёным парку Перамогі; былі ў Мірскім замку, на чарзе — Нясвіжскі. Мараць «прафесійна» заняцца турызмам, каб аб'ехаць і паглядзець усім разам як мага больш цікавых мясцін.
Пра горкае слова «халява»
— Распаўсюджаны стэрэатып, што шматдзетныя сем'і — неўладкаваныя, у іх не глядзяць за дзецьмі, а нараджаюць дзеля квадратных метраў ды льгот...
— На побытавым узроўні сутыкаешся як з добразычлівасцю, так і з прадузятасцю. Некаторыя пачынаюць табой захапляцца — не ведаю, наколькі шчыра. Іншыя — успрымаюць у штыкі. Але часцей, на жаль, здараецца апошняе, — пагаджаецца Алена Іванаўна. — Перадусім адчуваецца зайздрасць наконт жылля: «Мы за вас падаткі плацім, а вы кватэры атрымліваеце». Ведаеце, я вазьму на сябе смеласць сказаць за многіх шматдзетных мам: мы не маем патрэбы ва ўсеагульнай падтрымцы, спансіраванні, ахвяраваннях і г.д. Але разуменне нам вельмі патрэбна. Бо вельмі непрыемна, калі прыніжаюць у паліклініках — ці то ў чэргах, ці часам самі медработнікі, мяркуючы, што ты імкнешся «па-лёгкаму праскочыць». Нямногія ведаюць, як гэта — выседзець на прыём з двума, трыма, чатырма дзецьмі. Уяўляеце, які кавалак жыцця я правяла ў паліклініках, каб прайсці прафагляды, зрабіць прышчэпкі, атрымаць бясконцыя даведкі ў садок, школу, басейн, летнік? Падобная ж сітуацыя ва ўстановах адукацыі, дзе пастаянна трэба рабіць бацькоўскія ўнёскі, прычым з кожным годам усё больш. За ўсё жыццё, мабыць, толькі двойчы я сустрэла чалавечае стаўленне і разуменне ў гэтым пытанні.
— Наогул, калі параўноўваць гарады, у якіх вам давялося жыць, дзе было больш камфортна з дзецьмі?
— Гродна — добры горад, і нам там вельмі падабалася жыць, але застаўся асадак з-за таго, што там нам адмовілі хоць у нейкай дапамозе па паляпшэнні жыллёвых умоў, — прызнаецца Алена Іванаўна. — Тады мы жылі ўжо з 4 дзецьмі ў бабулінай двухпакаёвай «хрушчоўцы», ішоў 2002 год, ужо 2 гады як дзейнічаў указ аб ільготным крэдытаванні, і муж прасіў хоць лядашчае жытло, хоць якое... Але сказалі: маўляў, нават не спадзявайцеся: 6 гадоў нічога не будуецца, чарга ў 600 сем'яў і ніякіх прэферэнцый для шматдзетных няма.
— Што да Баравухі, то гэта невялікі ваенны гарадок, у якім свая атмасфера — усе ўсіх ведаюць, — дадае Віталь Уладзіміравіч. — Там нават дзверы ў дом часта не зачыняюць, бо ўсе — як на далоні, і ў госці адно да аднаго ходзяць, бы сваякі з вялікай сям'і. Малых можна без боязі выпускаць гуляць, за імі кожны прыглядзіць... Для іх было раздолле. Але што да медыцынскага абслугоўвання, магчымасці працаўладкавання для невайскоўцаў, ды нават закупкі прадуктаў на тыдзень на ўсю сям'ю, — безумоўна, з гэтым складана. Калі не мець машыны, то кожная паездка ў горад робіцца выпрабаваннем.
У Мінску, кажуць Кавалёвы, усё нашмат зручней для шматдзетнай сям'і, большасць крам, дзіцячых паліклінік, садкоў і школ — у крокавай даступнасці. І ўсё адно, калі дзеці падрастаюць і ходзяць па секцыях, музычных і спартыўных школах, машына робіцца жыццёвай неабходнасцю. Таму, атрымаўшы новую кватэру (амаль адначасова з узнагароджаннем Алены Іванаўны ордэнам Маці), зусім нядоўга спрачаліся, што больш патрэбна — новая мэбля або машына. Перамагло пытанне эканоміі маміных сіл, здароўя і часу.
Пра ўсіх і кожнага
Нават калі малыя пачынаюць спаборнічаць за ўвагу, Алена Іванаўна не дае нарадзіцца канфлікту і для кожнага знаходзіць патрэбныя словы. Бо ведае, каго з дзяцей трэба заахвоціць, а каго і прымусіць, каго пашкадаваць, а каго падштурхнуць. «Дзяніс — вельмі дысцыплінаваны. У ім з дзяцінства адчуваўся стрыжань старэйшага сына. Я часам шкадую, што ён ужо доўга не жыве з намі (спачатку была армія, потым семінарыя), бо астатнім не было на каго раўняцца. Маша — вельмі энергічная, імпульсіўная і эмацыянальная, камунікабельная, яна душа любой кампаніі. Вось толькі маленькі штрых: яна тры гады таму скончыла школу, а настаўнікі дагэтуль яе добра памятаюць. Вольга ў нас па-сапраўднаму жаноцкая, хоць спорт унёс свае карэктывы. А яшчэ яна любіць дакладнасць ва ўсім і не любіць спазняцца, у адрозненне ад старэйшай сястры. Ульяна — чалавечак у сабе, нешматслоўная, з людзьмі сыходзіцца складана, затое вельмі прывязваецца да сяброў. Старанная і адказная — яе не трэба прымушаць займацца, а да музыкі настолькі здольная, што, я спадзяюся, гэта будзе яе прафесія. Сярожа пакуль што знаходзіцца ў пошуку сябе — мне здаецца, у яго артыстычная натура, ён цікаўны, эмацыянальны, часам нават празмерна. Яму, вядома, няпроста, бо старэйшы брат далёка, і над ім пераважаюць жанчыны ў выглядзе трох старэйшых сясцёр — але нічога, спраўляецца».
Найменшы з усіх Вова, як тое кацяня, лашчыцца да бацькоў і амаль не сыходзіць з рук. Хто б здагадаўся, што за гэтай узаемнай пяшчотай хаваецца няпростая гісторыя...
Пра выпрабаванні на трываласць
Чакаючы шостае дзіця, Алена Іванаўна цяжка захварэла. Схуднела да 46 кілаграмаў, бо нічога не магла есці, з-за слабасці і болю амаль не хадзіла. А ўрачы ўсё ніяк не маглі вызначыцца з дыягназам. «Вы ўпэўнены, што вам патрэбна шостае дзіця?» — пыталіся некаторыя медыкі. «Як быццам мы стаім на вуліцы і гаворым пра бяздомнае кацяня. Што на гэта можна адказаць? Як за 5 хвілін выкласці чалавеку свой светапогляд, усю метафізіку?» — разводзіць рукамі мама Алена. А тады яна проста сціскала зубы і моўчкі працягвала барацьбу — за малога і за сябе.
Не ведаю, якія найвышэйшыя сілы ўбачылі гэта і пачулі малітвы, але адбыўся звычайны цуд. Знайшлася ўрач, якая паставіла правільны дыягназ і «прабіла» ў калег тэрміновую аперацыю. Іх потым спатрэбілася нават некалькі. І пакуль Вова, які нарадзіўся 7-месячным, дабіраў вагу ў РНПЦ «Маці і дзіця», Алена Іванаўна змагалася з хваробай. «Пасля аперацыі ўжо на другі дзень я хадзіла самастойна па рэанімацыі. Медсястра толькі дзівілася: маўляў, за 20 гадоў такое першы раз бачу. Я кажу: «Ведаеце, колькі чалавек за мяне моляцца? Родныя, сябры, знаёмыя, знаёмыя знаёмых...».
А год таму ў Кавалёвых стала сямёра дзяцей — з Асіповіцкага прытулку пад апеку сям'і трапіла Крысціна, чыя маці пазбаўлена бацькоўскіх правоў. «Мы з Воляй наведвалі па сваіх справах бальніцу, куды прывезлі на абследаванне і Крысціну. Нехта з медсясцёр расказаў, што Крысціне перыядычна патрэбна лячэнне, і што, акрамя той маці, у дзяўчынкі больш нікога няма на ўсім свеце. Мы даўно хацелі ўзяць дзіця з прытулку, і тут, мабыць, лёс», — калі Алена Іванаўна ўзгадвае, як у душы ўсё перавярнулася, у яе крыху дрыжаць вусны. Мы размаўляем амаль паўшэптам, каб не патрывожыць горкімі ўспамінамі саму дзяўчынку, якая ўвесь час падыходзіць то паказаць тату, як яна гожа зрабіла малюнак, то абняць маму і раўніва папярэдзіць нас: «Гэта МАЯ мама!». Але і сваю, біялагічную, маму дзяўчынка таксама вельмі любіць і добра памятае: у прытулку яна правяла ўсяго паўгода. Віталь Уладзіміравіч і Алена Іванаўна гэта добра разумеюць, таму не ставяць перад сабой задачу цалкам замяніць Крысціне родных бацькоў. У іх мэта значна больш простая і складаная адначасова — падзяліцца з дзіцем шчасцем... Старэйшыя дзеці навіну аб тым, што іх стане яшчэ больш, успрынялі спакойна: маўляў, дзе шасцёра, там і сямёра, усе свае. Апеку Віталь Кавалёў аформіў на сябе. «Натуральна, мы прыкіпелі да дзіцяці. Але калі яе маці адновяць у бацькоўскіх правах, я буду толькі рада, што яны ўз'яднаюцца. Пакуль жа спрабую зрабіць усё, каб яна расла шчаслівым і добрым чалавечкам», — зазначае мама Алена. І перад тым, як развітацца, мы цікавімся ў Кавалёвых: якая яна — шчаслівая сям'я?
— Перадусім, думаю, дружная, — разважліва адказвае бацька. — Бо я сустракаў сем'і, дзе старэйшым перашкаджаюць малодшыя, а бацькам не хапае часу на дзяцей. А вось мой бацька вырас у вялікай сям'і, і яны ўжо дарослымі людзьмі ўсё жыццё сябравалі, стараліся часцей збірацца і падтрымлівалі адно аднаго.
— Шчаслівая сям'я — тая, у якой усім хочацца знаходзіцца разам. Калі паміж мужам і жонкай ёсць узаемаразуменне і давер, і стасункі будуюцца не на эгаістычным абмене «ты — мне, я — табе», а на агульным інтарэсе. А яшчэ добрая сям'я — гэта адказнасць і дакладная сістэма каштоўнасцяў. Я сваім дзяўчатам спрабую тое самае ўнушыць. Наколькі атрымаецца — жыццё пакажа.
Вікторыя ЦЕЛЯШУК.
У парадку дня — зацвярджэнне Канцэпцыі нацбяспекі і Ваеннай дактрыны.
Фіналістка праекта «Акадэмія талентаў» на АНТ — пра творчасць і жыццё.
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.