Фестываль «Балетнае лета ў Вялікім» — новы тэатральны праект, які адкрыецца сёлета творам на нацыянальную тэматыку. 29 чэрвеня гэты твор — прэм'еру мінулага сезона — можна будзе ўбачыць перад летнім тэатральным зацішшам. Балет «Вітаўт» створаны кампазітарам Вячаславам Кузняцовым паводле лібрэта Аляксея Дударава. Пастаноўку ажыццявіў народны артыст Беларусі Юрый Траян. З чаго яшчэ пачынаць новы тэатральны праект у Беларусі, калі не з размовы пра нацыянальную гісторыю?
Якая размова, скажаце вы, — балет жа?.. Не, дзівіцца не варта: харэаграфія — сур'ёзнае мастацтва, якое гаворыць, аналізуе і адлюстроўвае з'явы жыцця, толькі галоўнымі выяўленчымі сродкамі становяцца самі артысты, пластыка іх цела. Зразумець, у чым асаблівасць гэтага віду мастацтва, якраз можна будзе дзякуючы праграме, якая працягнецца да 9 ліпеня. Складаецца яна як з класічных пастановак, так і з сучасных балетаў. Бо як жа без «Лебядзінага возера», тым больш калі галоўныя партыі будуць танцаваць салістка Вялікага тэатра Расіі Крысціна Крэтава і саліст Марыінскага тэатра Ігар Колб (дарэчы, выхаванец беларускай харэаграфічнай школы)? Яшчэ адзін зорны класічны спектакль — «Дон Кіхот» Мінкуса — дасць магчымасць пабачыць салістаў Вялікага тэатра Расіі Чынару Алізадэ і Міхаіла Лабухіна.
Айчынны глядач можа чакаць сустрэчы з Тбіліскім тэатрам оперы і балета імя Паліяшвілі: на гэты раз да нас прывязуць спектакль «Паўшыя анёлы», які выконваецца пад барабанны дробат і пастаноўку «Маленькая смерць» вядомага ўжо ў Беларусі харэографа Іржы Кіліяна. Фактычна сёлета ў рамках «балетнага лета» нас чакаюць гастролі Грузінскага балета, таму што да нас прывязуць шэраг цікавых пастановак, напрыклад, яшчэ «Таямнічы сад» у харэаграфіі С. Яўцімава і абсалютна грузінскі па духу «Сагалабелі», створаны паводле народных мелодый (харэаграфія Ю. Посахава). Але які грузінскі балет без прымы Ніны Ананіяшвілі? Легендарная балерына мала таго, што будзе танцаваць сама, дык яшчэ і ў пары з народным артыстам Беларусі Ігарам Артамонавым — у спектаклі «Маргарыта і Арман» (на музыку Ф. Ліста ў пастаноўцы Ф. Эштана).
Беларускі балет прадставіць усё лепшае, што ёсць у афішы тэатра, з акцэнтам на новыя пастаноўкі, якія будуць аб'яднаны ў тэматычныя вечары: «Вечар харэаграфіі Джорджа Баланчына», дзе пакажуць шэраг новых невялікіх спектакляў, што маюць дачыненне да гісторыі балета. І калі пра гісторыю, то адной з яе персон-наватараў у свеце стаў Іржы Кіліян, якому таксама прысвячаецца асобны вечар.
Але аматары балета (якія звычайна і самі сочаць за прэм'ерамі) найбольш будуць чакаць гала-канцэрта «зорак» сусветнага балета напрыканцы ўсёй імпрэзы, дзе выступяць артысты з Беларусі (а ў нас тут «зорак» багата), Расіі, Грузіі, Германіі, Даніі, Польшчы.
Ларыса ЦІМОШЫК.
А разам з імі навучанне, сацпакет і нават жыллё.
Беларусь — адзін з сусветных лідараў у галіне здабычы і глыбокай перапрацоўкі торфу.
«Мы зацікаўлены, каб да нас прыязджалі».