Жыхар вёскі Замошша 92‑гадовы Андрэй Якаўлевіч Грыцкевіч беражліва захоўвае свой франтавы фотаздымак. Ветэран дагэтуль не ведае, як склаўся пасля вайны лёс яго старэйшага баявога сябра расіяніна Івана Саўкіна, з якім яны разам сфатаграфаваліся. Чырвонаармейцы рассталіся ў пераможным 1945‑м і больш ніколі не сустракаліся.
Андрэй Грыцкевіч быў старэйшым сынам у сялянскай сям'і. На вайну пайшоў з першых яе дзён, знайшоў ваенкамат і папрасіўся на фронт: лічыў сябе дарослым, хоць не меў яшчэ 18 гадоў. Першы раз па-сапраўднаму порах панюхаў пехацінцам пад Старой Русай, дзе і быў упершыню паранены. Потым быў 2‑і Беларускі фронт, у 1943‑м вызваляў Гомель і Жлобін. З паўгода стаяў пад Жлобінам, а дадому ў родны Лельчыцкі раён так і не патрапіў.
Пасля вызвалення Беларусі байцу давялося фарсіраваць Нарву ў Польшчы. На Нарве ён атрымаў другое раненне. У Польшчы ў жніўні 1944‑га і быў зроблены фотаздымак, на якім Андрэй Грыцкевіч стаіць злева.
— Івану Саўкіну было гадоў 50–60. Мы ваявалі з ім у адным узводзе з самага пачатку франтавога жыцця, — прыгадвае Андрэй Якаўлевіч. — Калі мяне параніла, больш мы не бачыліся, і я не ведаю, ці застаўся ён у жывых. Для мяне вайна завяршылася ў шпіталі.
Вярнуўшыся дадому, франтавік Грыцкевіч убачыў толькі тры ацалелыя хаты ад некалі вялікай палескай вёскі. Прыйшлося будаваць зямлянку, падобную на тыя, у якіх правёў шмат франтавых дзён. Пазней узвёў і хацінку (захавалася дагэтуль). Працаваў ездавым на валах, садзіў калгасную бульбу, цягаючы на сабе плуг. Ажаніўся ў 1951‑м, выгадаваў пяцёра дзяцей. Франтавы фотаздымак з сябрам з часам стаў для яго найдаражэйшай з усіх узнагарод.
Анатоль Кляшчук.
Фота аўтара.
Лельчыцкі раён.
Расказаў першы намеснік старшыні Дзяржаўнага камітэта па навуцы і тэхналогіях Рэспублікі Беларусь Дзяніс Каржыцкі.
Як вакцыны выратоўваюць жыцці і чаго можа каштаваць іх ігнараванне?
Аляксандр Курэц – самы малады народны выбраннік у сваім сельсавеце і адзіны дэпутат сярод сваіх калег па службе.
Васілеўскія такія: на Зямлі і ў космасе ліхія!