Сквер па вуліцы Савецкай у Гомелі ператварыўся ў Алею Герояў. Мемарыял створаны побач з карпусамі Гомельскага дзяржаўнага ўніверсітэта імя Францыска Скарыны.
Ветэран вайны Яфім Цітарэнка прыехаў з Масквы на свята Незалежнасці менавіта ў Гомель. Тут ён калісьці нарадзіўся. Член савета ветэранаў Міністэрства замежных спраў РФ, былы ваенны лётчык кажа, што гэтае вядомае ў абласным цэнтры месца набыла сапраўды новае аблічча.
Маленькі Арсеній Каляватаў, які жыве побач і прыйшоў на цырымонію адкрыцця са сваімі бацькамі, ужо добра разумее, чаму неабходна шанаваць памяць пра тых, хто загінуў у гады Вялікай Айчыннай:
— Каб дапамагаць захоўваць мір, — упэўнена кажа хлопчык.
Урачыстаму адкрыццю Алеі Герояў папярэднічала маштабная рэканструкцыя сквера, якая цалкам яго змяніла. Уздоўж цэнтральнай алеі ўсталяваны памятныя стэлы. На іх — імёны Герояў Савецкага Саюза і поўных кавалераў ордэна Славы, лёс якіх быў тым ці іншым чынам звязаны з Гомелем. Некаторыя тут нарадзіліся, іншыя — вызвалялі яго. Ёсць і тыя, хто жыў і працаваў у горадзе над Сожам. Цэнтральная частка мемарыяльнага знака зроблена ў выглядзе аркі, а ў сярэдзіне — скульптура салдата, якая знаходзілася на гэтым месцы раней, а цяпер рэканструявана. З абодвух бакоў аркі — сцены, на якіх змешчаны 44 памятныя дошкі з інфармацыяй пра абаронцаў Айчыны, пахаваных на гэтым месцы ў брацкай магіле. У ёй астанкі 135 удзельнікаў абароны Гомеля (у жніўні 1941 года), партызан, падпольшчыкаў, а таксама тых, хто ў лістападзе 1943-га прынёс у горад доўгачаканую свабоду.
Асобна, у левай частцы сквера, усталяваны помнік антыфашыстам-падпольшчыкам, расстраляным у перыяд гітлераўскай акупацыі Гомеля: чорная мармуровая пліта з белымі барэльефнымі сілуэтамі герояў паступова ператвараецца ў стылізаваную напаўразбураную сцяну з чырвонай цэглы. Побач — пліта з імёнамі падпольшчыкаў, якія загінулі.
— У нас практычна няма сем'яў, чые сваякі не ваявалі б ці не загінулі ў вайну. Мы павінны ўвекавечваць іх памяць, каб на прыкладзе подзвігу герояў выхоўваць наступнае пакаленне, — адзначыў старшыня Гомельскага гарадскога выканаўчага камітэта Пётр Кірычэнка.
Архіўныя даныя сведчаць, што пры вызваленні Гомеля загінула больш за 21 тысячу воінаў. Яшчэ большымі былі страты пры яго гераічнай абароне: толькі з 10 па 25 жніўня 1941 года загінула больш за 31 тысячу чалавек.
Ірына АСТАШКЕВІЧ. Фота аўтара.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».