На Дзень Незалежнасці ў Жодзіне ўрачыста адкрылі новы помнік на магіле загінулых савецкіх воінаў.
На новай гранітнай пліце залатымі літарамі ззяюць 17 імёнаў і прозвішчаў тых, хто ў ліпені 44-га загінуў на подступах да Жодзіна.
— Брацкую магілу на гэтым месцы стварылі ў 1956 годзе, — распавядае краязнаўца Галіна Аніскевіч, кіраўнік музея Жодзінскай жаночай гімназіі. — Сюды перанеслі астанкі вайскоўцаў і партызан, якіх пахавалі ў непасрэднай блізкасці ад нашага горада. Праўда, адмысловага ўліку не вялі і дакладная колькасць пахаваных была невядома. Яна нават даходзіла да 32 чалавек. Працуючы з дакументамі архіваў, я даведалася, што пэўныя людзі тут проста не могуць быць пахаваны. І з'явілася ідэя ўсталяваць новы помнік з імёнамі тых, хто сапраўды тут спачывае. На гэта пайшло 7 гадоў напружанай працы і з Падольскім, і з нашым Нацыянальным архівамі. Цяпер на помніку напісаны рэальныя імёны тых людзей, хто знайшоў тут свой апошні спачын.
Дарэчы, як паведаміла Галіна Іванаўна, адгукаюцца і блізкія пахаваных у брацкай магіле. Сваякі стралка Саламона Брэйчара лічылі яго зніклым без вестак. Яны пастаянна набіралі яго прозвішча ў інтэрнэце і нарэшце дасягнулі сваёй мэты дзякуючы інфармацыі, змешчанай на сайце газеты «Жодзінскія навіны». Цяпер унук Эдуард збіраецца прыехаць у Жодзіна і ўзяць з сабой зямлю з магілы дзядулі на памяць.
Тарас ШЧЫРЫ. Фота аўтара.
Мерапрыемства праводзіцца на добраахвотнай аснове.
Не выявіць ні секунды абыякавасці.