Цэнтральны дзіцячы парк імя Горкага штогод становіцца адной з галоўных пляцовак для святкавання Дня Незалежнасці. Сёлета арганізатары вырашылі прывабіць наведвальнікаў незвычайнай прапановай: усім, хто прыйдзе ў парк у беларускім нацыянальным строі або з яго элементамі, абяцалі бясплатнае карыстанне адным з атракцыёнаў. Карэспандэнты «Звязды» далучыліся да святкавання і паназіралі за тым, што выйшла з такой незвычайнай ініцыятывы.
Галоўным святочным мерапрыемствам у парку Горкага быў канцэрт народнай музыкі і песні «Беларусь — крыніца натхнення». Сваімі спевамі жыхароў і гасцей сталіцы забаўлялі беларускія народныя калектывы і прафесійныя выканаўцы. Да іх выступленняў далучаліся і гледачы — асабліва калі гэта датычылася танцаў. Не абышлося тут і без конкурсаў і падарункаў пераможцам.
Непадалёк ад гэтай пляцоўкі мы і сустрэлі першых наведвальнікаў парку, якія вырашылі скарыстацца шанцам на бясплатны атракцыён. Канстанцін і Таццяна ВІШНЕЎСКІЯ з дзецьмі Анатолем і Арсенціем выбралі для свайго адпачынку парк Горкага менавіта дзякуючы прапанове аб нацыянальнай вопратцы. Праўда, тое, што адна вышыванка стала падставай для толькі аднаго бясплатнага квітка, стала невялікім расчараваннем. Аднак сям'я вельмі рада, што выбрала менавіта парк Горкага для свайго адпачынку.
На пытанне аб гісторыі яго вышыванкі спадар Вішнеўскі ўзгадвае сваё танцавальнае мінулае. Менавіта заняткі ў адным з калектываў і пакінулі ў яго шафе на памяць пра сябе беларускую кашулю з арнаментам.
— Я шчыра лічу, што наша нацыянальнае адзенне можа і павінна быць нечым большым, чым проста гістарычным артэфактам. Праблема толькі ў тым, што беларусы з падазронай лёгкасцю адмаўляюцца ад сваіх гістарычных здабыткаў. Так было з Міцкевічам, Малевічам, сімваламі Вялікага Княства Літоўскага. Прыкладна такая ж сітуацыя і з вышыванкамі. Любая традыцыя з чаго-небудзь пачынаецца. Чаму б нам не зрабіць традыцыяй апранаць вышыванкі раз у год, на Дзень Незалежнасці?
Падтрымлівае Канстанціна і рамеснік Уладзімір АЗЁМА, які прыйшоў у парк у якасці прадаўца (дарэчы, таксама ў вышыванцы):
— На маю думку, менавіта пачынаючы з вышыванак, мы можам вярнуць і нашу мову, і іншыя гістарычныя здабыткі. Бо менавіта з такіх дробязяў у рэшце рэшт складаюцца сур'ёзныя рэчы — аж да нацыянальнай ідэі.
На жаль, вялікага натоўпу людзей у вышыванках не назіралася. Да вечара ў парку было заўважана яшчэ некалькі чалавек — пераважна дарослых, — якія падтрымалі ініцыятыву арганізатараў. А купка жанчын у нацыянальных строях на выхадзе з атракцыёнаў аказалася ансамблем «Жывіца» з Лунінца, які паспеў скарыстацца сваім правам на бясплатны атракцыён паміж выступленнямі. Дарэчы, жанчыны распавялі нам, што ўсе іх вышыванкі маюць унікальны арнамент і зроблены ўласнаручна. Будзем спадзявацца, што наступнае такое мерапрыемства ў парку Горкага стане больш маштабным.
У святочным парку было шмат і гасцей сталіцы. Кітаец Ні Сян прыехаў у Брэст на вучобу з аўтаноміі Унутраная Манголія, а беларускую сталіцу вырашыў наведаць з сябрамі ў святочныя дні:
— Мне падабаецца, як вы святкуеце. Больш за ўсё ўражвае, як многа беларусаў на вуліцы падчас такіх свят. Звычайна ў вас вельмі ціхія гарады, людзей на вуліцы няшмат, а тут — сапраўднае ўсенароднае свята.
Яраслаў ЛЫСКАВЕЦ.
Інтэрв'ю з алімпійскім чэмпіёнам па фехтаванні.
Прафесійна, аператыўна, па-добраму.