Ёсць такая добрая традыцыя на фэсце — здзіўляць, не паўтарацца. Нагадаю, што летась міжнародны фестываль мастацтваў «Славянскі базар у Віцебску» змяніў фармат. У прыватнасці, стаў менш працяглым па часе, не было нацыянальных дзён (Беларусі, Украіны і Расіі), змяніўся падыход да правядзення конкурсаў юных і маладых выканаўцаў.
«Зорка» Надзеі Бабкінай
Сюрпрызам 23-га па ліку фестывалю мастацтваў стане цырымонія адкрыцця 10 ліпеня. Калі прапусціце тэлевізійную трансляцыю, потым не крыўдуйце самі на сябе. Відовішча, паверце старажылу «базару», будзе на ўзроўні самых вядомых і лепшых шоу свету. Убачыце насам-
рэч шыкоўнае, фантастычнае афармленне галоўнай сцэнічнай пляцоўкі — з 3D-эфектамі і фантанамі, якія будуць «акампаніраваць» музыцы...
У канцэрце возьмуць удзел Філіп Кіркораў, Стас Міхайлаў, Сяргей Юрскі, Пелагея, Надзея Кадышава і ансамбль «Залатое кальцо», Анастасія і Марыя Талмачовы, арт-групы «Хор Турэцкага», «Сапрана 10», групы «ПМ» і «Прэм'ер-міністр», а таксама Алёна Ланская, Тэа, Анатоль Ярмоленка і ансамбль «Сябры», Аляксандр Рыбак (Нарвегія), група «DSCHІNGHІS KHAN» (Германія) і іншыя. У праграме і фартэпіяннае шоу «BEL SUONO», балет «STREET-JAZZ» і гэтак далей.
Адна з удзельніц канцэрта, Надзея Бабкіна, сёлета стала лаўрэатам спецыяльнай узнагароды Прэзідэнта «Праз мастацтва — да міру і ўзаемаразумення». Па традыцыі, на канцэрце адкрыцця фэсту адпаведны дыплом уручае асабіста кіраўнік нашай дзяржавы. На «Алеі зорак» цяпер будзе іменная «зорка» гэтай пастаяннай удзельніцы «базару». Дарэчы, яна аж чатыры разы была членам журы конкурсу маладых выканаўцаў.
Між іншым, па новай фестывальнай традыцыі, на канцэрце адкрыцця фэсту адбудзецца прэзентацыя ўдзельнікаў конкурсаў спевакоў.
З цыганскага шоу на віцебскі фэст
Сёлета, дарэчы, зноў змяненні ў фармаце правядзення міжнароднага конкурсу выканаўцаў эстраднай песні «Віцебск-2014»: у фінал выйдуць самыя таленавітыя. Беларусь будзе прадстаўляць 23-гадовы Артур Міхайлаў. Хлопец нарадзіўся ў Маладзечне, на сцэне з 6 гадоў. Артур — лаўрэат розных конкурсаў, уладальнік Гран-пры XІV рэгіянальнага фестывалю-конкурсу выканаўцаў эстраднай песні «Адна зямля». Што цікава, малады спявак — член Беларускага грамадскага аб'яднання грэкаў «Пелапанес», бярэ ўдзел у фестывалях нацыянальных культур у Гродне. Ён — сапраўдны паліглот: выконвае песні на рускай, беларускай, грэчаскай, англійскай, французскай, сербскай, іспанскай мовах. Летась ён скончыў Інстытут сучасных ведаў імя Шырокава, дыпламаваны артыст эстрады. Вучыўся ў Пятра Ялфімава — калісьці, дарэчы, прызёра «Славянскага базару ў Віцебску». Яшчэ больш цікава, што хлопец — саліст цыганскага шоу «Алюр».
На XІІ Міжнародным дзіцячым музычным конкурсе «Віцебск-2014» выступяць дзве нашы дзяўчынкі з Мінска — 11 гадовыя Зінаіда Купрыяновіч і Мілана Рэдчанка. Нягледзячы на юны ўзрост, у іх творчай скарбонцы мноства перамог.
Будзем «хварэць» за нашых!
Што можна будзе ўбачыць упершыню
Прадстаўленне «Парад усмешак» з удзелам папулярных гумарыстаў і праграма арт-групы «Хор Турэцкага» 8 ліпеня сталі першымі канцэртамі ў Летнім амфітэатры — па-за афіцыйнай праграмай фэсту.
А што можна будзе ўбачыць упершыню? Новае «дзіця базару» — праект «Лялечны квартал». Санкт-Пецярбургскі тэатр «Лялечны фармат» на віцебскай сцэне пакажа спектакль «Русалка Света з вёскі Перамілава» і «Вершнік CUPRUM», Гродзенскі абласны тэатр лялек прэзентуе спектакль «Пікавая дама» па аднайменным творы Пушкіна... Гаспадары сцэны, віцебскія лялечнікі, падрыхтавалі для паказу спектаклі «Дэкамерон» — імправізацыя на тэмы Джавані Бакача (пастаноўка Віктара Клімчука) і «Брэменскія музыканты».
9 ліпеня будзе прэзентаваны конкурс-выстава работ студэнтаў мастацкіх спецыяльнасцяў вышэйшых навучальных устаноў «Арт-сесія». Конкурс праводзіцца ў Віцебску, пачынаючы з 1992 года. На ім прадстаўлены такія кірункі, як выяўленчае, дэкаратыўна-прыкладное мастацтва, графіці, жывапіс на асфальце, 3D-малюнкі.
Упершыню на фэсце і вечар сучаснай харэаграфіі. Віцебскі фестываль сучаснай харэаграфіі — старэйшы на тэрыторыі былога СССР і адзін з самых вядомых у свеце. Таму, безумоўна, на «базары» ён даўно заслужыў права быць прадстаўленым хаця б у скарочаным варыянце. Выступяць калектывы з Беларусі, Расіі і Украіны.
Фестываль афіцыйна скончыцца 14 ліпеня. Але зноў жа, па традыцыі, ён будзе працягвацца. 15 ліпеня адбудзецца сольны канцэрт Алега Газманава, выступяць «зоркі» шансона.
На наступны дзень (16 ліпеня) запланаваны канцэрт «Рок сустракае оперу». Пад суправаджэнне прэзідэнцкага аркестра Рэспублікі Беларусь пад кіраўніцтвам Віктара Бабарыкіна выступяць Георгій Калдун, Іван Вабішчэвіч, Пётр Ялфімаў, Аляксей Хлястоў, Наталі Баяра і іншыя. Апошнім канцэртам на фэсце стане «Рок-панарама» (выступіць легендарная група «Чайф»).
Аляксандр ПУКШАНСКІ.
Выбар саджанца для садавода — той момант, значнасць якога складана пераацаніць.
Канцэрт для дзяцей і моладзі, пластычны спектакль Ягора Дружыніна і «Рок-панарама».