Распрацаваная беларускімі парламентарыямі пастанова ўвайшла ў тэкст выніковага дакумента ПА АБСЕ
Дэлегацыя беларускага парламента на чале з намеснікам старшыні Палаты прадстаўнікоў Віктарам ГУМІНСКІМ прыняла ўдзел у працы 23‑й штогадовай сесіі Парламенцкай асамблеі Арганізацыі па бяспецы і супрацоўніцтве ў Еўропе, якая прайшла ў сталіцы Азербайджана Баку.
Беларускія парламентарыі прынялі актыўны ўдзел у працы агульных камітэтаў ПА АБСЕ па палітычных пытаннях і бяспецы, па эканамічных пытаннях, навуцы, тэхналогіях і навакольным асяроддзі, па пытаннях дэмакратыі, правоў чалавека і гуманітарных пытаннях.
Кіраўнік беларускай дэлегацыі сустрэўся са старшынёй Дзяржаўнай Думы Федэральнага Сходу Расійскай Федэрацыі Сяргеем Нарышкіным, а таксама з дзеючым на той момант старшынёй ПА АБСЕ, старшынёй парламента Чарнагорыі Ранка Крывакапічам. Былі абмеркаваны пытанні парадку дня і міжпарламенцкага ўзаемадзеяння.
Адбылася таксама сустрэча намесніка старшыні Палаты прадстаўнікоў з Крыстаферам Смітам са Злучаных Штатаў Амерыкі, спецыяльным прадстаўніком ПА АБСЕ па пытаннях гандлю людзьмі. Амерыканскі кангрэсмен выказаў падзяку беларускім парламентарыям за падтрымку падрыхтаванага ім праекта рэзалюцыі «Прадухіленне гандлю дзецьмі з мэтай сексуальнай эксплуатацыі і судовае праследаванне за яго».
Падчас сустрэчы Віктара Гумінскага з кіраўніком дэлегацыі Вярхоўнай Рады Украіны ў ПА АБСЕ Алегам Зарубінскім была абмеркавана сённяшняя сітуацыя ва Украіне і шляхі выхаду з крызісу.
— Пытанне па падзеях ва Украіне стаяла вельмі сур'ёзна, — паведаміў «Звяздзе» Віктар Гумінскі. — Нягледзячы на ўсе спробы расійскага боку супрацьдзеяння антырасійскай рэзалюцыі, якую прапанавалі амерыканцы, нягледзячы на тое, што многія пагаджаліся з неабходнасцю весці дыялог і адмоўнай роляй гэтай рэзалюцыі, яна, на жаль, была прынята.
Таксама Віктар Гумінскі прадставіў на пасяджэнні агульнага камітэта Парламенцкай асамблеі АБСЕ па эканамічных пытаннях, навуцы, тэхналогіях і навакольным асяроддзі падрыхтаваную беларускім бокам рэзалюцыю «Абарона і прасоўванне сацыяльна-эканамічных правоў у рэгіёне АБСЕ». Дакумент накіраваны на прыцягненне ўвагі да праблемы сацыяльна-эканамічных правоў і наданне дадатковага імпульсу дзейнасці АБСЕ ў гэтай галіне. Рэзалюцыя была аднагалосна прынята ўдзельнікамі пасяджэння. Яна ўвайшла ў склад Бакінскай дэкларацыі, якая, у сваю чаргу, была прынята на заключным пасяджэнні штогадовай сесіі ПА АБСЕ.
— Калі мы прапанавалі такую рэзалюцыю, то патрапілі ў цэль, — расказаў Віктар Гумінскі. — Для таго, каб яна была разгледжана, мы сабралі 27 галасоў з 17 дзяржаў (патрабуецца 20 галасоў з 5 дзяржаў). Гэта значная для нас перамога. Акрамя таго, мы выступілі на ўсіх трох камітэтах, унеслі шэраг паправак, больш за палову з якіх былі прыняты.
Кіраўнік беларускай дэлегацыі таксама адзначыў, што на гэты раз ні на адным з камітэтаў, ні на пленарным пасяджэнні не было выступленняў, накіраваных супраць Беларусі ў тым або іншым пытанні.
— Калі не лічыць дзве папраўкі, якія ўнёс кіраўнік працоўнай групы па Беларусі Крысціян Хольм, шведскі дэпутат. Але яго неканструктыўная пазіцыя нам здаўна вядомая, — удакладніў віцэ-спікер ніжняй палаты беларускага парламента. — І нягледзячы на тое, што мы былі супраць гэтых паправак (размова ішла пра палітычных вязняў і пра павольнае разгортванне дэмакратычных грамадзянскіх інстытутаў у Беларусі), яны ўвайшлі ў склад рэзалюцый, за якія мы не галасавалі.
Беларускія парламентарыі таксама адмовіліся ад прапанаванай спадаром Хольмам сустрэчы з Працоўнай групай па Беларусі, бо не ўбачылі, як выказаўся Віктар Гумінскі, канструктыўных крокаў з боку кіраўніка гэтай групы.
Дэлегацыя Нацыянальнага сходу Рэспублікі Беларусь правяла шэраг двухбаковых сустрэч з кіраўнікамі і членамі парламенцкіх дэлегацый дзяржаў — удзельніц АБСЕ, у тым ліку з краін СНД, а таксама Аўстрыі, Ісландыі, Італіі, Літвы, Нідэрландаў, ЗША, Турцыі, Фінляндыі, Францыі, Чарнагорыі, Чэхіі.
— Удзел у такіх сур'ёзных форумах дазваляе выбудоўваць далейшае супрацоўніцтва, — сказаў намеснік старшыні Палаты прадстаўнікоў Нацыянальнага сходу Беларусі. — Па-першае, мы працуем на імідж краіны, бо вельмі актыўна выступаем на сесіях па ўсіх пытаннях, і гэта не застаецца не заўважаным. Па-другое, мы абмяркоўваем з калегамі з іншых краін кірункі далейшага ўзаемадзеяння і паміж парламентамі, і ў гандлёва-эканамічнай сферы.
У Баку быў абраны новы старшыня Парламенцкай асамблеі АБСЕ — Ілка Канерва (Фінляндыя), які ўзначаліць сесію ў наступным годзе.
Надзея ЮШКЕВІЧ,
Вольга МЯДЗВЕДЗЕВА.
Васілеўскія такія: на Зямлі і ў космасе ліхія!
Ідэнтычнасць праз спадчыну.
Беларусь — у тройцы лідараў па захваральнасці.