Абвешчаная напрыканцы чэрвеня віктарына па старонках гісторыі «Звязды» ў часы Вялікай Айчыннай вайны дала прыемныя вынікі. Нягледзячы на «дачны» і адпускны сезон, многія нашы чытачы праявілі актыўнасць, аператыўнасць, дасведчанасць і добрую памяць.
Лісты з адказамі, часам нават больш поўнымі, чым прадугледжвалася, заданнямі, ішлі ў рэдакцыю з Міншчыны, Гродзеншчыны, Гомельшчыны, Віцебшчыны, Брэстчыны — хіба толькі Магілёўская вобласць трапіла ў адстаючыя. Некаторыя пытанні нечакана для нас аказаліся складанымі. Напрыклад, не ўсе справіліся з задачкай «знайсці лішняга» сярод галоўных рэдактараў газеты, таксама многія памыліліся ў вызначэнні, якую ўзнагароду акупацыйныя ўлады абяцалі за выкрыццё месцазнаходжання падпольнай друкарні «Звязды», іншыя ж заблыталіся ў кінастужках...
А самымі спрытнымі і дакладнымі сталі Марыя Арцёмаўна Свірыдовіч з Любані, Алена Валяр'янаўна Мяцельская з Баранавічаў і Аляксандр Сяргеевіч Ганчароў з аграгарадка Насімкавічы Чачэрскага раёна, якія далі абсалютна правільныя адказы на ўсе 10 пытанняў. Яны і сталі пераможцамі першага тура рэдакцыйнай віктарыны «Гісторыя газеты — гісторыя краіны» і атрымалі падпіску на «Звязду» на ІV квартал. Заахвочвальныя «звяздоўскія» прызы таксама атрымаюць Юрый Мяцельскі з Палачанаў Маладзечанскага раёна, Уладзімір Драбышэўскі з Полацка, Ірына Гладкая з Чачкава Мінскага раёна, Іван Жыдзель з г.Іўе, Антаніна Ерамеева з в.Вуглы Рагачоўскага раёна і самая юная ўдзельніца першага тура віктарыны, 6-класніца Аксана Клімовіч з в. Дзівін Кобрынскага раёна.
У тых жа, хто спазніўся з адказамі або па нейкіх прычынах не змог прыняць удзел у віктарыне, яшчэ будзе магчымасць паказаць сябе: у хуткім часе стартуе наступны яе тур. Падвядзенне ж вынікаў, нагадаем, адбудзецца ў жніўні, напярэдадні дня нараджэння «Звязды». Далучайцеся!
А цяпер — правільныя адказы.
1
Помнік «Звяздзе» ўсталяваны на сталічнай вуліцы Кульман. На тым самым месцы, дзе летам 1942 года ў доме №10 па вуліцы Выдавецкай (тут жыла падпольшчыца Таццяна Яўменаўна Якавенка), друкаваліся другі і трэці нумары падпольнага выдання. На плошчы ж Незалежнасці, каля Чырвонага касцёла, стаіць помнік журналістам-падпольшчыкам. А ўсяго газеце і яе супрацоўнікам у Беларусі пастаўлены ажно 4 помнікі.
2
Гэтае пытанне з падвохам, бо падпольная «Звязда» падчас Вялікай Айчыннай вайны змяніла не адно месца «прапіскі». Таму прымаліся некалькі варыянтаў адказаў, як звалі жанчыну, у хаце якой друкавалася наша газета: Альбіна (Альбіна Адольфаўна Хадасевіч. На канспіратыўнай кватэры Пятра і Альбіны Хадасевічаў быў надрукаваны 4-ы нумар «Звязды». Уся сям'я падпольшчыкаў разам з двума сынамі загінула ў 1942 годзе ў Трасцянцы) і Марфа (Марфа Канстанцінаўна Мігун, жыхарка сяла 6-я Брыгада Любанскага раёна. У яе хаце ў партызанскай зоне ў студзені 1943 года размясцілася друкарня і рэдакцыя «Звязды». Усяго ж да 1 ліпеня 1944 года на Любаншчыне выйшла 105 нумароў «Звязды» і 39 — «Чырвонай змены»).
3
Мемарыял «Востраў Зыслаў» на месцы, дзе падчас Вялікай Айчыннай вайны знаходзіўся падпольны абкам партыі, партызанскі аэрадром і друкарня, быў адкрыты ў 1969 годзе. Дарэчы, гэты комплекс аўтарства архітэктара Георгія Заборскага занесены ў спіс гісторыка-культурных каштоўнасцяў Рэспублікі Беларусь.
4
Апошні нумар «легальнай» «Звязды» выйшаў у свет 13 жніўня 1941 года ў Гомелі. Пры дапамозе самалётаў і спецыяльных пасыльных газета дастаўлялася ў часова акупаваныя раёны рэспублікі.
5
Рэдактарам «Звязды» падчас Вялікай Айчыннай вайны не з'яўляўся Мікалай Дзялец, які рэдагаваў газету з 1969 па 1973 гг.
6
Першы нумар падпольнай «Звязды» быў надрукаваны 18 мая 1942 года ў Мінску — спачатку падпольшчыкі тайна набралі нумар у нямецкай друкарні, потым ён быў надрукаваны на канспіратыўнай кватэры Міхаіла Воранава тыражом 2500 асобнікаў.
7
Таму, хто ўкажа, дзе друкуецца «Звязда», фашысцкія акупацыйныя ўлады абвясцілі ўзнагароду — 75 тысяч марак. Дакладней, паводле ўспамінаў былых падпольшчыкаў, спачатку за ўказанне месцазнаходжання падпольнага выдавецтва была абяцана ўзнагарода ў 50 тысяч, але неўзабаве яе павысілі да 75 тысяч марак.
8
«Звязда» адзначана ордэнам Айчыннай Вайны І ступені (у 1965 годзе) і ордэнам Працоўнага Чырвонага сцяга (1967). А Уладзімір Амельянюк, дарэчы, адзіны з тагачасных рэдактараў, удастоены звання Героя Савецкага Саюза.
9
Фільм, у якім увекавечаны вобраз Уладзіміра Амельянюка — гэта 6-серыйны тэлефільм Віталя Чацверыкова «Руіны страляюць», зняты на студыі «Беларусьфільм» у 1970-1972 гг. Ролю Амельянюка ў ім выканаў Уладзімір Паначоўны (на фота).
10
На здымку — памятны знак, усталяваны на месцы партызанскага аэрадрома, узведзенага летам 1942 года сіламі партызан і мясцовага насельніцтва на востраве Зыслаў у Любанскім раёне.
Набор на бюджэтныя месцы павялічыцца.
Колькі ж каштуе гэты важны кампанент здаровага рацыёну зараз?
Не выявіць ні секунды абыякавасці.